ରାୟଗଡ଼ା,୨୯।୬(ଆଶିଷ ରଞ୍ଜନ ପଣ୍ଡା)ସମସ୍ତ ବାଣିଜ୍ୟ ପ୍ରତିଷ୍ଠାନରେ ଓଡ଼ିଆ ନାମଫଳକ ଲାଗିବା ନେଇ ରାଜ୍ୟ ସରକାରଙ୍କ ନିର୍ଦ୍ଦେଶକୁ ଶ୍ରମ ବିଭାଗ ଅଣଦେଖା କରୁଥିବା ଅଭିଯୋଗ ହେଉଛି। ଜିଲାର ୨ ପୌର ପରିଷଦ ରାୟଗଡ଼ା, ଗୁଣପୁର ଓ ଗୁଡ଼ାରି ଏନ୍ଏସିରେ ବହୁ ପ୍ରତିଷ୍ଠାନରେ ଓଡ଼ିଆରେ ନାମଫଳକ ନାହିଁ। ହେଲେ ଶ୍ରମ ବିଭାଗର ଆନ୍ତରିକତା ଅଭାବ ଯୋଗୁ ବର୍ତ୍ତମାନ ସୁଦ୍ଧା ରାୟଗଡ଼ା ପୌର ପରିଷଦରେ ରହିଥିବା କୌଣସି ବି ବାଣିଜ୍ୟ ପ୍ରତିଷ୍ଠାନରେ ଓଡ଼ିଆ ନାମଫଳକ ଲାଗି ନ ଥିବା ଜଣାଯାଇଛି।
ଭାଷାକୁ ଗୁରୁତ୍ୱ ଦେବା ପାଇଁ ରାଜ୍ୟ ସରକାରଙ୍କ ଶ୍ରମ ବିଭାଗ ପକ୍ଷରୁ ଏ ନେଇ ଏପ୍ରିଲ ୧୧ ତାରିଖରେ ଚିଠି ନଂ. ୨୨୦୨ରେ ନିର୍ଦ୍ଦେଶ ରହିଥିଲା ଯେ, ପ୍ରତ୍ୟେକ ବାଣିଜ୍ୟ ପ୍ରତିଷ୍ଠାନରେ ଓଡ଼ିଆରେ ନାମଫଳକ ବାଧ୍ୟତାମୂଳକ ରହିବ ା ଓଡ଼ିଆ ନାମଫଳକ ନ ଥିବା ବାଣିଜ୍ୟ ପ୍ରତିଷ୍ଠାନ ଉପରେ ଚଢ଼ାଉ କରାଯାଇ ଜରିମାନା ଆଦାୟ ସହ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସରକାରୀ ନିର୍ଦ୍ଦେଶ ରହିଛି। ତେବେ ବିଭାଗୀୟ ଅଧିକାରୀମାନେ ଚଢ଼ାଉକରି ଜରିମାନା ଆଦାୟ କରିବା ପରିବର୍ତ୍ତେ ବାଣିଜ୍ୟ ପ୍ରତିଷ୍ଠାନ ପ୍ରତି ଅନୁକମ୍ପା ଦେଖାଉଥିବା ଅଭିଯୋଗ ହେଉଛି। ସହକାରୀ ଶ୍ରମ ଅଧିକାରୀ ସଞ୍ଜୟ କୁମାର ରାଉତ ୭ଟି ଅନୁଷ୍ଠାନ ଉପରେ ଚଢ଼ାଉ କରିଥିବା ବେଳେ ସେଥିରୁ ୨ଟି ପ୍ରତିଷ୍ଠାନରେ ଓଡ଼ିଆ ନାମଫଳକ ଲଗାଇ ସରକାରୀ ପୋର୍ଟାଲ ପରେ ଶ୍ରମ ବିଭାଗ ପୋର୍ଟାଲରେ ତଥ୍ୟ ଅପ୍ଲୋଡ୍ କରାଯାଇଛି। ଅନ୍ୟ ୫ଟି ପ୍ରତିଷ୍ଠାନକୁ କାରଣ ଦର୍ଶାଅ ନୋଟିସ ଜାରି କରାଯାଇଥିବା ସୂଚନା ମିଳିଛି ା ସେହିଭଳି ଅନ୍ୟ ଜଣେ ଶ୍ରମ ଅଧିକାରୀ ଗୋପାଳକୃଷ୍ଣ ମଙ୍ଗରାଜ ୫ଟି ପ୍ରତିଷ୍ଠାନ ଉପରେ ଚଢ଼ାଉ କରିଥିବା ବେଳେ ସେଥିରୁ ୩ଟି ପ୍ରତିଷ୍ଠାନ ପରବର୍ତ୍ତୀ ସମୟରେ ନାମଫଳକ ଲଗାଇଥିବା ସୂଚନା ମିଳିଛି ା ଅନ୍ୟ ୨ଟି ପ୍ରତିଷ୍ଠାନକୁ କାରଣ ଦର୍ଶାଅ ନୋଟିସ ଜାରି କରାଯାଇଛି ା ହେଲେ ରାୟଗଡ଼ା ପୌର ପରିଷଦରେ ଏଭଳି ଶତାଧିକ ବାଣିଜ୍ୟ ପ୍ରତିଷ୍ଠାନରେ ଓଡ଼ିଆ ନାମଫଳକ ଲାଗି ନ ଥିବା ସତ୍ତ୍ୱେ ଶ୍ରମ ବିଭାଗ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁ ନ ଥିବା ସମସ୍ତଙ୍କୁ ଚକିତ କରିଛି। ଅପରପକ୍ଷେ ଗୁଣପୁର ପୌରାଞ୍ଚଳ ଓ ଗୁଡ଼ାରି ଏନ୍ଏସିରେ ମଧ୍ୟ ବହୁ ସଂଖ୍ୟାରେ ବାଣିଜ୍ୟ ପ୍ରତିଷ୍ଠାନ ରହିଥିବା ବେଳେ ବର୍ତ୍ତମାନ ସୁଦ୍ଧା ସେଠାରେ କାର୍ଯ୍ୟାନୁଷ୍ଠାନ ଶୂନ ା
ସୂଚନାଯୋଗ୍ୟ, ଓଡ଼ିଶା ବାଣିଜ୍ୟ ଓ ପ୍ରତିଷ୍ଠାନ ୧୯୫୬ ଆକ୍ଟ ଅନୁଯାୟୀ ଓଡ଼ିଆ ନାମଫଳକ ଲାଗି ନ ଥିବା ବାଣିଜ୍ୟ ପ୍ରତିଷ୍ଠାନକୁ ୫ ହଜାର ଟଙ୍କାରୁ ୨୫ ହଜାର ଟଙ୍କା ପର୍ଯ୍ୟନ୍ତ ଜରିମାନା ନିୟମ ରହିଛି ା ହେଲେ ଶ୍ରମ ବିଭାଗ ଏଥିପାଇଁ କୌଣସି ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରୁ ନ ଥିବାରୁ ରାୟଗଡ଼ା ସହରର ବହୁ ପ୍ରତିଷ୍ଠାନରେ ଆଜି ବି ଓଡ଼ିଆ ନାମଫଳକ ଲାଗିନାହିଁ ା ସେହିଭଳି ଜିଲାର ବହୁ ବେସରକାରୀ ବିଦ୍ୟାଳୟରେ ମଧ୍ୟ ଓଡ଼ିଆ ନାମଫଳକ ଲାଗିନାହିଁ ା ଏ ସମ୍ପର୍କରେ ଜିଲା ଶ୍ରମ ଅଧିକାରୀ ଜସ୍ମିନ ସାହୁଙ୍କୁ ପଚାରିବାରୁ ଜୁନ୍ ୩୦ ପର୍ଯ୍ୟନ୍ତ ସମସ୍ତ ବାଣିଜ୍ୟ ପ୍ରତିଷ୍ଠାନଗୁଡ଼ିକୁ ଓଡ଼ିଆ ନାମଫଳକ ଲଗାଇବା ପାଇଁ ସମୟସୀମା ଦିଆଯାଇଥିଲା ା ଜୁଲାଇ ପହିଲାରୁ ଶ୍ରମ ବିଭାଗ ପକ୍ଷରୁ ପୁଣି ଥରେ ଏନ୍ଫୋର୍ସମେଣ୍ଟ ଆରମ୍ଭ କରାଯିବ ବୋଲି କହିଛନ୍ତି ା
