ନୂଆଦିଲ୍ଲୀ,୫।୨: ରାଜ୍ୟ ମାନ୍ୟତା ସମେତ ୪ ଦାବି ନେଇ ଲଦାଖରେ ସମ୍ପୂର୍ଣ୍ଣ ବନ୍ଦ ପାଳନ କରାଯାଇଛି। ଅନ୍ୟ ଦାବି ମଧ୍ୟରେ ରହିଛି ସମ୍ବିଧାନର ଷଷ୍ଠ ଅନୁଚ୍ଛେଦରେ ଲଦାଖକୁ ସାମିଲ କରାଯାଇ ଏହାକୁ ଆଦିବାସୀ ମାନ୍ୟତା ପ୍ରଦାନ କରିବା, ସ୍ଥାନୀୟ ଯୁବତୀଯୁବକଙ୍କ ପାଇଁ ନିଯୁକ୍ତିରେ ସଂରକ୍ଷଣ ବ୍ୟବସ୍ଥା ଏବଂ ଲେହ ଓ କାର୍ଗିଲ ପାଇଁ ଅଲଗା ପାର୍ଲାମେଣ୍ଟ ଆସନ।
ଉପରୋକ୍ତ ଦାବି ନେଇ ଶନିବାର ଲେହ ଜିଲାରେ ବିଶାଳ ବିକ୍ଷୋଭ ଶୋଭାଯାତ୍ରା କରାଯାଇଥିଲା। ଲକ୍ଷାଧିକ ଲୋକ ରାଲିରେ ସାମିଲ ହୋଇ ସ୍ଲୋଗାନ ଦେଉଥିବା ଦେଖାଯାଇଛି। ଲେହ ଆପେକ୍ସ ବଡି (ଏଲ୍ଏବି), କାର୍ଗିଲ ଡେମୋକ୍ରାଟିକ୍ ଆଲିଆନ୍ସ (କେଡିଏ) ପକ୍ଷରୁ ଗତ ମାସ ୨୩ରେ ଲଦାଖ ବନ୍ଦ ଡାକରା ଦିଆଯାଇଥିଲା। ଉକ୍ତ କେନ୍ଦ୍ରଶାସିତ ଅଞ୍ଚଳକୁ ରାଜ୍ୟ ମାନ୍ୟତା ପ୍ରଦାନ ଏବଂ ଷଷ୍ଠ ଅନୁଚ୍ଛେଦରେ ସାମିଲ କରିବା ନେଇ ଦୁଇ ସଂଗଠନ ସ୍ବରାଷ୍ଟ୍ର ମନ୍ତ୍ରଣାଳୟକୁ ସ୍ମାରକପତ୍ର ଦେଇଥିଲେ।
ଲଦାଖ କେନ୍ଦ୍ରଶାସିିତ ଅଞ୍ଚଳ ହେବା ଦିନଠାରୁ ଲେହ ଆପେକ୍ସ ବଡି ଏବଂ କେଡିଏ ୪-ସୂତ୍ରୀ ଏଜେଣ୍ଡା ଉପରେ ଦାବି ଜଣାଇ ଆସୁଥବା ଏହାର ଆଇନ ଉପଦେଷ୍ଟା ହାଜି ଗୁଲାମ ମୁସ୍ତାଫା କହିଛନ୍ତି। ଜମ୍ମୁ-କଶ୍ମୀର ବିଭାଜନ ପୂର୍ବରୁ ବିଧାନସଭାରେ ଲଦାଖରୁ ୪ ଜଣ ଏବଂ ବିଧାନ ପରିଷଦରେ ୨ ଜଣ ସଦସ୍ୟ ଥିଲେ। ଏବେ ବିଧାନସଭାରେ ଲଦାଖରୁ କେହି ପ୍ରତିନିଧିତ୍ୱ କରୁନାହାନ୍ତି। ସ୍ବରାଷ୍ଟ୍ର ରାଷ୍ଟ୍ରମନ୍ତ୍ରୀ ନିତ୍ୟାନନ୍ଦ ରାୟଙ୍କ ଅଧ୍ୟକ୍ଷତାରେ ଏକ ଉଚ୍ଚସ୍ତରୀୟ କମିଟି ଡିସେମ୍ବର ୪ରେ ଉପରୋକ୍ତ ୨ ସଂଗଠନର ପ୍ରତିନିଧିଙ୍କ ସହ ଆଲୋଚନା କରି ଦାବି ସମ୍ପର୍କରେ ଲିଖିତ ଭାବେ ଜଣାଇବାକୁ କହିଥିଲେ। ଜମ୍ମୁ-କଶ୍ମୀରକୁ ରାଜ୍ୟ ମାନ୍ୟତା ଫେରାଇବା ପାଇଁ ସୁପ୍ରିମକୋର୍ଟ ରାୟ ଦେଇଥିବାବେଳେ ଲଦାଖ ପାଇଁ କୌଣସି ବ୍ୟବସ୍ଥା ନ ଥିବା ସ୍ମାରକପତ୍ରରେ ଦର୍ଶାଯାଇଥିଲା।
ସୂଚନାଯୋଗ୍ୟ, ୨୦୧୯ ଅଗଷ୍ଟ ୫ରେ କେନ୍ଦ୍ର ସରକାର ଜମ୍ମୁ-କଶ୍ମୀରରୁ ସମ୍ବିଧାନର ଅନୁଚ୍ଛେଦ ୩୭୦ ଉଚ୍ଛେଦ କରିବା ସହ ଉକ୍ତ ରାଜ୍ୟକୁ ଦୁଇଟି କେନ୍ଦ୍ରଶାସିତ ଅଞ୍ଚଳ ଜମ୍ମୁ-କଶ୍ମୀର ଏବଂ ଲଦାଖରେ ବିଭକ୍ତ କରିଥିଲେ। ଜମ୍ମୁ-କଶ୍ମୀରକୁ ରାଜ୍ୟ ମାନ୍ୟତା ଫେରାଇବା ପାଇଁ ସୁପ୍ରିମକୋର୍ଟ ନିକଟରେ ରାୟ ଦେବା ପରେ ଲଦାଖରେ ଅନୁରୂପ ଦାବି ଜୋର୍ ଧରିଛି। ସ୍ମାରକପତ୍ରରେ ମିଜୋରାମ, ତ୍ରିପୁରା, ସିକିମ ଓ ଅନ୍ୟ ଉତ୍ତରପୂର୍ବାଞ୍ଚଳ ରାଜ୍ୟର ଉଦାହରଣ ଦିଆଯାଇ ଲଦାଖକୁ ମଧ୍ୟ ଅନୁରୂପ ସୁବିଧା ମିଳିବା ଆବଶ୍ୟକ ବୋଲି କୁହାଯାଇଛି।
