ନୂଆପଡ଼ା ଅଫିସ,୧୮।୧୦: ନୂଆପଡା ଜିଲାର ୮୦ ଭାଗ ଲୋକ ଚାଷ ଉପରେ ନିର୍ଭର କରନ୍ତି। ବର୍ଷର ୬ ମାସ ଚାଷ କରି ଅମଳ ପରେ ଅଧା ୬ ମାସ କାମ ଅନ୍ନେଷଣରେ ବାହାର ରାଜ୍ୟକୁ ଦାଦନ ଯାଇଥାନ୍ତି। ନୂଆପଡା ଏକ ଦାଦନ ପ୍ରବଣ ଜିଲା ହୋଇଥିବାରୁ ପ୍ରତିବର୍ଷ ହଜାର ହଜାର ଲୋକ କାମ ଧନ୍ଦା ଅନ୍ନେଷଣରେ ତେଲଙ୍ଗାନା, ଆନ୍ଧ୍ରପ୍ରଦେଶ, ତାମିଲନାଡୁ, ମହାରାଷ୍ଟ୍ର, ଗୁଜରାଟ, ଉତ୍ତରପ୍ରଦେଶ ଭଳି ବାହାର ରାଜ୍ୟକୁ ଦାଦନ ଯାଇଥାନ୍ତି। ସରକାର ଦାଦନ ରୋକିବା ପାଇଁ ଅନେକ ଯୋଜନା କରିଛନ୍ତି। ହେଲେ ନୂଆପଡା ସଦର ବ୍ଲକ ବୋଇରଭାଡି ଗାଁରେ ଏସବୁ ଯୋଜନା କାମକୁ ଆସୁନାହିଁ। ୪ ୱାର୍ଡ ବିଶିଷ୍ଟ ବୋଇରଭାଡି ଗାଁର ପ୍ରାୟ ୧୦ଟି ପରିବାର ବାହାର ରାଜ୍ୟକୁ ଦାଦନ ଖଟିବାକୁ ଯାଇ ସାରିଥିବା ବେଳେ ଆଗକୁ ଆହୁରି ୭୦ ପରିବାର ଦାଦନ ଯିବା ପାଇଁ ପ୍ରସ୍ତୁତ ହୋଇଛନ୍ତି। ଗାଁର ତିଜିଆ ପାଣ୍ଡେ ନାମକ ଜଣେ ମହିଳାଙ୍କ ସ୍ବାମୀ ଦୁଇ ବର୍ଷ ତଳେ ଅଜଣା ରୋଗରେ ପଡି ମୃତ୍ୟୁବରଣ କରିଥିଲେ। ତାଙ୍କର ଦୁଇ ପୁଅ ସେ ସମୟରେ ବାପାଙ୍କ ଚିକିତ୍ସା ପାଇଁ ୨ ଲକ୍ଷ ଟଙ୍କା ଧାର କରଜ କରିଥିଲେ। ଧାର ଟଙ୍କା ସୁଜିବା ପାଇଁ ଦୁଇ ପୁଅ ଭରତ ପାଣ୍ଡେ ଓ ଭୋଲା ପାଣ୍ଡେ ପରିବାର ସହ ବାହାର ରାଜ୍ୟକୁ ଦାଦନ ଖଟିବା ପାଇଁ ଯାଇ ସାରିଲେଣି। ସେହି ଗାଁର ସନ୍ତରାମ ପାଣ୍ଡେ ଓ ରାଧେ ପାଣ୍ଡେଙ୍କ ପରିବାର ମଧ୍ୟ ବାହାର ରାଜ୍ୟରେ ଦାଦନ ଖଟୁଛନ୍ତି। କିଛି ପରିବାରର ସମସ୍ତ ଲୋକ ଦାଦନ ଯାଇଥିବାରୁ ଘରେ ତାଲା ଝୁଲୁଛି। ସ୍ଥାନୀୟ ୱାର୍ଡମେମ୍ବରଙ୍କ କହିବାନୁଯାୟୀ ଗାଁରେ ଅନେକ ଲୋକଙ୍କ ଜମିବାଡି ବେଶି ନ ଥିବା ବେଳେ ଏମ୍ଜିଏନ୍ଆର୍ଇଜିଏସ୍ରେ କାମ ହେଉ ବା ସ୍ବୟଂ ସହାୟକ ଗୋଷ୍ଠୀ ଦ୍ୱାରା ମହିଳାମାନଙ୍କୁ ଆବଶ୍ୟକ ଅନୁସାରେ କାମରେ ନିୟୋଜିତ କରାଯାଇ ପାରୁ ନାହିଁ । ଫଳରେ ଲୋକେ ବାଧ୍ୟ ହୋଇ ଅନ୍ୟ ଉପାୟ ନ ପାଇ ବାହାର ରାଜ୍ୟକୁ ଦାଦନ ଖଟିବା ପାଇଁ ଯାଇ ହଇରାଣ ହେଉଛନ୍ତି। ଅନେକ ସମୟରେ ଦାଦନ ନିର୍ଯାତନା କଥା ସାମନାକୁ ଆସୁଥିବା ବେଳେ ଶ୍ରମିକ ସୁରକ୍ଷା ଆଇନ ଅନୁସାରେ ବାହାର ରାଜ୍ୟକୁ ଦାଦନ ଯାଇଥିବା ଶ୍ରମିକମାନଙ୍କ ସମସ୍ତ ତଥ୍ୟ ପ୍ରଶାସନ ରଖିବା ଜିଲାରେ ସମ୍ଭବ ହୋଇପାରୁନାହିଁ। ପ୍ରସ୍ତୁତ ହୋଇ ରହିଥିବା ଶ୍ରମିକମାନେ ଆମକୁ ଉଚିତ ପାରିଶ୍ରମିକ ଓ ଠିକ ସମୟରେ କାମ ମିଳିଲେ କାହିଁକି ବାହାର ରାଜ୍ୟକୁ କାମ କରିବାକୁ ଯିବୁ ବୋଲି ଲୋକେ କହିଛନ୍ତି। ଏ ସଂକ୍ରାନ୍ତରେ ଜିଲା ସହ ଶ୍ରମ ଅଧିକାରୀ ଦିବ୍ୟ ଶଙ୍କର ଧରୁଆଙ୍କୁ ପଚାରିବାରୁ ବର୍ତ୍ତମାନ ସୁଦ୍ଧା ଲୋକେ ଦାଦାନ ଯିବା ଭଳି ଜଣାପଡୁ ନାହିଁ। ଆମ ଟିମ ଗାଁ ଗାଁ ଯାଇ ସଚେତନ କରୁଛି। ଯେଉଁ ଗାଁରୁ ଖବର ଆସିଲେ, ସେହି ଗାଁକୁ ଯାଇ ନାମ ପଞ୍ଜୀକରଣ କରି ଶ୍ରମ କାର୍ଡ କରାଯାଉଛି ବୋଲି କହିଥିଲେ।
