ଢେଙ୍କାନାଳ ,୧୬ା୧୦(ରତନ ନାୟାର): ଢେଙ୍କାନାଳ ଐତିହ୍ୟ ପଦଯାତ୍ରାର ସପ୍ତମ ସଂସ୍କରଣ ରବିବାର ସ୍ଥାନୀୟ କୁଞ୍ଜକାନ୍ତ ମନ୍ଦିରଠାରେ ଅନୁଷ୍ଠିତ ହୋଇଯାଇଛି। ଐତିହ୍ୟକୁ ଜାଣିବା ଓ ତାହା ସମ୍ପର୍କରେ ତଥ୍ୟ ସଂଗ୍ରହ କରି ଭବିଷ୍ୟତ ପିଢ଼ି ପାଇଁ ସଂରକ୍ଷିତ ରଖି ଜନ ସଚେତନତା ସୃଷ୍ଟି କରିବା ନିମନ୍ତେ ଏହାର ଉଦ୍ଦେଶ୍ୟ। ଢେଙ୍କାନାଳ ସହର ମଧ୍ୟଦେଇ ଯାଇଥିବା ମୁଖ୍ୟ ରାସ୍ତା କଡରେ ପାଣି ଓହଳା ପର୍ବତର ଠିକ ପାଦଦେଶର ଉଚ୍ଚସ୍ଥାନରେ ରହିଛି ଏହି ସୁନ୍ଦର ମନ୍ଦିର। ମନ୍ଦିରର ପ୍ରବେଶ ଦ୍ୱାର ଏକ ରାଜ ପ୍ରାସାଦର ଭ୍ରମ ସୃଷ୍ଟି କରୁଥିଲେ ହେଁ ବାସ୍ତବରେ ଏହା ଏକ ମନ୍ଦିର ଏବଂ ଏହା ଭିତରେ ପୂଜା ପାଉଛନ୍ତି ବୃନ୍ଦାବନଚନ୍ଦ୍ର ଶ୍ରୀକୃଷ୍ଣ ଓ ମହାମାୟୀ ଶ୍ରୀରାଧା। ଏଠି ଶ୍ରୀକୃଷ୍ଣଙ୍କୁ କୁଞ୍ଜକାନ୍ତ ଭାବରେ ସମ୍ବୋଧନ କରାଯାଏ। ସିଂହାସନ ଉପରେ ଅଷ୍ଟ ପାଟବଂଶୀ ପରିବେଷ୍ଠିତ ଶ୍ରୀକୃଷ୍ଣଙ୍କ ଚାରି ଫୁଟ୍ ଉଚ୍ଚତା ପ୍ରତିମାଟି କଳା ମୁଗୁନି ପଥରରେ ଓ ଶ୍ରୀରାଧାଙ୍କ ମୂର୍ତ୍ତିଟି ଅଷ୍ଟଧାତୁରେ ନିର୍ମିତ। ୧୯୧୭ରେ ତକତ୍ାଳୀନ ରାଜା ସୁରପ୍ରତାପଙ୍କ ଦ୍ୱାରା ଏହି ମନୋରମ ମନ୍ଦିରଟି ନିର୍ମିତ ହୋଇଥିଲା। ରାଜର୍ଷି ସୁରପ୍ରତାପଙ୍କ ଅକାଳ ବିୟୋଗ ପରେ ତାଙ୍କ ମହାରାଣୀ କୃଷ୍ଣପ୍ରିୟା ଦେବୀ ଏଠାରେ ରହି ଭଗବାନଙ୍କ ସେବାରେ ସାରା ଜୀବନ ଅତିବାହିତ କରିଥିଲେ। ମନ୍ଦିର ପରିସରରେ ଝୁଲଣ ମଣ୍ଡପ ଓ ବେଢା ବାହାରେ ଦୋଳ ମଣ୍ଡପ ସହିତ ଏକ ସୁନ୍ଦର ରାଣୀହଂସପୁର ରହିଛି । ଏହିଠାରେ ହିଁ ରାଣୀ କୃଷ୍ଣପ୍ରୀୟା ଅବସ୍ଥାନ କରୁଥିଲେ। ମୁଖ୍ୟ ମନ୍ଦିରଟି ରାଜପୁତନା ଶୈଳୀରେ ନିର୍ମିତ ଏକ ମାର୍ବଲ୍ ଆଚ୍ଛାଦିତ ଗୃହ। ଏଥିରେ ବ୍ୟବହୃତ ଲୌହ ଖୁମ୍ବଗୁଡିକ ଦେଖିବା ପାଇଁ ଖୁବ୍ ଆକର୍ଷଣୀୟ। ମନ୍ଦିରର ଉପରି ଭାଗରେ ଖୁବ୍ ସୂକ୍ଷ୍ମ କାରୁକାର୍ଯ୍ୟ ଏବେ ମଧ୍ୟ ଅକ୍ଷୂର୍ଣ୍ଣ ରହିଛି। ଦୀର୍ଘ ୧୦୦ ବର୍ଷରୁ ଅଧିକ କାଳଧରି ସ୍ଥାନୀୟ ରାଜ ପରିବାର ଦ୍ୱାରା ପରିଚାଳିତ ହୋଇ ଆସୁଥିବା ଏହି ମନ୍ଦିରରେ ଜନ୍ମାଷ୍ଟମୀ ଓ ଅନ୍ୟାନ୍ୟ ପର୍ବପର୍ବାଣି ଖୁବ୍ ନିଷ୍ଠାର ସହିତ ପାଳନ କରାଯାଏ। ଢେଙ୍କାନାଳ ଐତିହ୍ୟ ପଦଯାତ୍ରାର ଆବାହକ ସୁରେଶ ପ୍ରସାଦ ମିଶ୍ରଙ୍କ ଆବାହକତ୍ୱରେ ରବିବାର ସକାଳେ ପଦଯାତ୍ରୀ ଦଳ ଏଠାରେ ପହଁଚିବା ପରେ ପରେଶ କୁମାର ମିଶ୍ର ମନ୍ଦିରର ଇତିହାସ ସମ୍ପର୍କରେ ବିସ୍ତୃତ ସୂଚନା ପ୍ରଦାନ କରିଥିଲେ। ଅନ୍ୟମାନଙ୍କ ମଧ୍ୟରେ ଡଃ ମୃଣାଳ ଚାଟାର୍ଜୀ, କଟକ ହେରିଟେଜ୍ ୱାକ୍ର ସଦସ୍ୟ ବିଶ୍ୱରଞ୍ଜନ ଦେହୁରୀ, ରମେଶ ଚନ୍ଦ୍ର ପତି, ବିପିନ ବିହାରୀ ପାଣି, ଅଧ୍ୟାପକ ଅକ୍ଷୟ ପାତ୍ର, ଶାନ୍ତନୁ ନାୟକ, ସୁନୀତା ମହାପାତ୍ର, ଆଦିତ୍ୟ ମିଶ୍ର, ନାରାୟଣ ପଟ୍ଟନାୟକ, ଧୀରେନ୍ କୁମାର ମିଶ୍ର, ସ୍ବର୍ଣ୍ଣଲତା ସେଠୀ, ଢେଙ୍କାନାଳ ସ୍ବୟଂଶାସିତ ମହାବିଦ୍ୟାଳୟର ଅନେକ ପିଜି ଛାତ୍ର ପଦଯାତ୍ରାରେ ସାମିଲ ହୋଇଥିଲେ।
