ଭାରତୀୟ କ୍ରିକେଟ ଦଳର ପୂର୍ବତନ ଲେଗ୍ ସ୍ପିନର ଅନିଲ କୁମ୍ବଲେ। ଇଞ୍ଜିନିୟରିଂ କରିବା ପରେ ଫଟୋଗ୍ରାଫର ଓ ପରବର୍ତ୍ତୀ ସମୟରେ ଭାରତୀୟ ଦଳ ପକ୍ଷରୁ ସେ ଖେଳିଥିଲେ । ଜୁମ୍ବୋ ନାମରେ ପରିଚିତ ଏହି ଖେଳାଳି ଜଣଙ୍କ ଭାରତୀୟ ଟେଷ୍ଟ ଇତିହାସରେ ସର୍ବାଧିକ ଉଇକେଟ ହାସଲକାରୀ ବୋଲର। ଦିନିକିଆ କ୍ରିକେଟ ବିଶ୍ୱକପ୍ରେ ୧୮ ମ୍ୟାଚ୍ ଖେଳି ୩୧ ଉଇକେଟ ନେଇଥିବା କୁମ୍ବଲେଙ୍କ ଜନ୍ମଦିନରେ ବିଶ୍ୱକପ୍ର କିଛି ସ୍ମରଣୀୟ ଇନିଂସ ଓ ଘଟଣା
ବେଙ୍ଗାଲୁରୁସ୍ଥିତ ମାଇସୋରରେ ୧୭ ଅକ୍ଟୋବର ୧୯୭୦ରେ ଅନିଲ କୁମ୍ବଲେଙ୍କ ଜନ୍ମ। ଆରମ୍ଭରୁ ପେସ୍ ବୋଲିଂ କରୁଥିବା ବେଳେ ପରବର୍ତ୍ତୀ ସମୟରେ ଲେଗ୍ ସ୍ପିନ୍ ବୋଲିଂ କରିଥିଲେ। ବଲ୍କୁ ଟର୍ନ କରାଇବାରେ ଏତେ ଦକ୍ଷ ନ ଥିଲେ ମଧ୍ୟ ଉଇକେଟ ହାସଲ ପାଇଁ ସେ ପିଚ୍ ଉପରେ ନିର୍ଭରଶୀଳ ରୁହନ୍ତି ନାହିଁ। ଜଣେ ଦୃଢମନା କ୍ରିକେଟର ଭାବରେ କୁମ୍ବଲେ ବେଶ୍ ପ୍ରସିଦ୍ଧ। ଓ୍ବେଷ୍ଟଇଣ୍ଡିଜ୍ ଗସ୍ତରେ ଥିବା ସମୟରେ ବଲ୍ ବାଜି ମୁହଁ ଫାଟି ଯାଇଥିବା ବେଳେ ବ୍ୟାଣ୍ଡେଜ ବାନ୍ଧି ବୋଲିଂ କରିଥିଲେ। ଭାରତୀୟ ଦଳର ମୁଖ୍ୟ କୋଚ୍ ଭାବରେ କାର୍ଯ୍ୟ କରି ସାରିଥିବା କୁମ୍ବଲେ ମଙ୍ଗଳବାର ୫୩ ବର୍ଷରେ ପଦାର୍ପଣ କରିଛନ୍ତି। ଭାରତୀୟ ଦଳର ସ୍ପିନର ଭାବରେ ଉଭୟ ଘରୋଇ ଓ ବିଦେଶୀ ପିଚ୍ରେ ସଫଳତା ହାସଲ କରିଥିବା କୁମ୍ବଲେ ୧୩୨ ଟେଷ୍ଟରୁ ୬୧୯ ଉଇକେଟ ନେଇଥିବା ବେଳେ ୨୭୧ ଦିନିକିଆରୁ ୩୩୭ ଉଇକେଟ ନେଇଛନ୍ତି। ଟେଷ୍ଟ କ୍ରିକେଟରେ ପ୍ରଥମ ଭାରତୀୟ ତଥା ବିଶ୍ୱର ଦ୍ୱିତୀୟ ଖେଳାଳି ଭାବରେ ଗୋଟିଏ ଇନିଂସରେ ୧୦ ଉଇକେଟ ସଫଳତା ହାସଲ କରିଥିଲେ କୁମ୍ବଲେ। ୧୯୯୬ରେ ପ୍ରଥମ ବିଶ୍ୱକପ୍ ଖେଳିଥିବା କୁମ୍ବଲେ ୨୦୦୭ରେ ଖେଳିଥିଲେ ଅନ୍ତିମ ବିଶ୍ୱକପ୍। ଦିନିକିଆ ବିଶ୍ୱକପ୍ରେ ୧୮ ମ୍ୟାଚ୍ ଖେଳି ସେ ଅକ୍ତିଆର କରିଥିଲେ ୩୧ ଉଇକେଟ। ୩୨ ରନ୍ ଦେଇ ୪ ଉଇକେଟ ତାଙ୍କର ସର୍ବଶ୍ରେଷ୍ଠ ପ୍ରଦର୍ଶନ ରହିଥିଲା। ଏହା ସହିତ ସେ ସମୁଦାୟ ୧୪ଟି କ୍ୟାଚ୍ ନେଇଛନ୍ତି। ୧୭୩.୧ ଓଭର ବୋଲିଂ କରିଥିବା ଏହି ବୋଲର ଜଣଙ୍କ ୫ ଓଭର ମେଡେନ୍ ପକାଇଥିବା ବେଳେ ୧୩.୭୩ର ଚମତ୍କାର ଆଭରେଜ୍ ରହିଛି।
୧୯୯୬ରେ ଭାରତୀୟ ଦଳ ପାଇଁ ଚମତ୍କାର ପ୍ରଦର୍ଶନ କରିଥିବା କୁମ୍ବଲେ ବିଶ୍ୱକପ୍ରେ ୭ ମ୍ୟାଚ୍ରୁ ଅକ୍ତିଆର କରିଥିଲେ ୧୫ ଉଇକେଟ। ଏହା ସହ ସେ ଉକ୍ତ ସଂସ୍କରଣର ସର୍ବାଧିକ ଉଇକେଟ ହାସଲକାରୀ ବୋଲର ପାଲଟିଥିଲେ। ଓଡ଼ିଶାର ଐତିହାସିକ ବାରବାଟୀ ଷ୍ଟାଡିୟମରେ କୁମ୍ବଲେ ନିଜର ବିଶ୍ୱକପ୍ ପଦାର୍ପଣ କରିଥିବା ବେଳେ ନେଇଥିଲେ ୩ ଉଇକେଟ।
୧୯୯୯ ବିଶ୍ୱକପ୍ରେ ପୂର୍ବ ସଫଳତା ଦୋହରାଇବାରେ ସଫଳ ହୋଇ ନ ଥିଲେ। ୭ଟି ଯାକ ମ୍ୟାଚ ଖେଳିଥିଲେ ମଧ୍ୟ ସେ ମାତ୍ର ୮ ଉଇକେଟ ନେଇଥିଲେ। ତେବେ ଇଂଲିଶ ପରିବେଶରେ ତାଙ୍କର ଇକୋନୋମି ଓ କଞ୍ଜୁସ ବୋଲିଂ ଦଳକୁ ଫାଇଦା ପ୍ରଦାନ କରିଥିଲା।
ଦକ୍ଷିଣ ଆଫ୍ରିକାରେ ଅନୁଷ୍ଠିତ ଏହି ସଂସ୍କରଣରେ ହରଭଜନ ସିଂ ଭାରତର ପ୍ରଥମ ପସନ୍ଦର ସ୍ପିନର ରହିଥିଲେ। କୁମ୍ବଲେ ଦ୍ୱିତୀୟ ସ୍ପିନର ରହିଥିବା ବେଳେ ୩ ମ୍ୟାଚ୍ ଖେଳି ନେଇଥିଲେ ୫ ଉଇକେଟ। ଏହା ସହିତ ବିଶ୍ୱକପ୍ରେ ସେ ନିଜର ସର୍ବଶ୍ରେଷ୍ଠ ବୋଲିଂ ଫିଗର(୪/୩୨) ମଧ୍ୟ ରେକର୍ଡ କରିଥିଲେ।
ଭାରତ ଏହି ସଂସ୍କରଣର ବିଶ୍ୱକପ୍ର ପ୍ରଥମ ରାଉଣ୍ଡରୁ ବିଦାୟ ନେଇଥିଲା। ତେବେ କୁମ୍ବଲେଙ୍କୁ ମାତ୍ର ଗୋଟିଏ ମ୍ୟାଚ୍ ଖେଳିବାର ସୁଯୋଗ ମିଳିଥିବା ବେଳେ ସେ ନେଇଥିଲେ ୩ ଉଇକେଟ।
ବିଶ୍ୱକପ୍ରେ କୁମ୍ବଲେ ୧୮ ମ୍ୟାଚ୍ରୁ ୩୧ ଉଇକେଟ ନେଇଥିବା ବେଳେ ଭାରତୀୟଙ୍କ ମଧ୍ୟରେ ଏହା ଚତୁର୍ଥ ଶ୍ରେଷ୍ଠ ପ୍ରଦର୍ଶନ। ଜାହିର ଖାନ୍ ଓ ଜାଭାଗଲ ଶ୍ରୀନାଥ ୪୪ ଉଇକେଟ ସହ ଯୁଗ୍ମ ଭାବରେ ପ୍ରଥମ ସ୍ଥାନରେ ରହିଛନ୍ତି। ଅନ୍ୟପକ୍ଷରେ ମହମ୍ମଦ ଶାମି ଓ ଅନିଲ କୁମ୍ବଲେ ଉଭୟ ୩୧ ଲେଖାଏ ଉଇକେଟ ନେଇଛନ୍ତି।
