ନୟାଗଡ଼,୨୮।୬(ଲୋକନାଥ ମିଶ୍ର): ଜଳସମ୍ପଦ ବିଭାଗର ଖାମଖିଆଲି ନୀତି କାରଣରୁ ନୟାଗଡ଼ ବ୍ଲକ ଡାହୁକାନଦୀର କ୍ରୀଦାଶପୁର କେନାଲର ବନ୍ଧ ଭାଙ୍ଗି ଯାଇଛି । କେନାଲ ବନ୍ଧ ଭାଙ୍ଗିବା କାରଣରୁ ଡାହୁକା ନାଳ ଓ କେନାଲ ଶୁଖିଲା ପଡ଼ିଛି । ବର୍ଷାଋତୁରେ ନାଳ ଓ କେନାଲ ଶୁଖିଲା ପଡିଥିବାରୁ ବର୍ଷା ନ ହେଲେ ଚଳିତ ବର୍ଷ ମରୁଡ଼ିର ଭୟ ଚାଷୀଙ୍କୁ ଘାରିଛି । ପଥର ପ୍ୟାଚିଂ କାମ ଠିକରେ ନ ହେବାରୁ କେନାଲ ବନ୍ଧ ଭାଙ୍ଗି ଗଲା ବୋଲି ଅଭିଯୋଗ ହୋଇଛି। ଅନ୍ୟପକ୍ଷେ ନଦୀରେ ବନ୍ୟାଜଳ ଅଧିକ ପ୍ରବାହିତ ହେବା କାରଣରୁ ବନ୍ୟାର ଭୟ ଦେଖା ଦେଇଛି । ବାଲିକୁଦିଆ, ଗଦାଧରପ୍ରସାଦ, ଚମ୍ପତିପୁର ଗଁା ଭିତରେ ବନ୍ୟା ଜଳ ପ୍ରବେଶ କରିପାରେ । ବର୍ଷା ଅଧିକ ହେଲେ ମାଳବନ୍ଧ ଭାଙ୍ଗିବାର ଭୟ ସୃଷ୍ଟି ହୋଇଛି ।
ପ୍ରକାଶ ଯେ, ବାଘୁଆ ନଦୀ ଓ ଲୁଣିଝରା ନଦୀ ମିଳନ ହୋଇ ଯଦୁପୁର ଗଁା ନିକଟରେ ଡାହୁକା ନଦୀ ହୋଇଛି । ଡାହୁକା ନଦୀରେ ଆନିକଟ ହୋଇଥିଲା। ଏହି ଆନିକଟଠାରେ ବରପଲ୍ଲୀ ଓ କ୍ରୀଦାଶପୁର ଅଞ୍ଚଳ ପାଇଁ ୨ଟି କେନାଲ ବ୍ୟବସ୍ଥା ଥିଲା । ନଦୀର ଶଟର ପଡିଲେ ଦୁଇ କେନାଲରେ ପାଣି ଯିବା ପାଇଁ ବ୍ୟବସ୍ଥା ହୋଇଛି। ଆନିକଟଠାରେ ନଦୀ ଗର୍ଭର ବାଲି ଓ ପଟୁମାଟି ପ୍ରାୟ ୪୦ ବର୍ଷ ହେଲା ଜମା ହୋଇ ରହିଥିଲା। ତେବେ ଜଳସମ୍ପଦ ବିଭାଗ ପକ୍ଷରୁ ବାଲି ଓ ପଟୁମାଟି କଢ଼ା ଯାଇ ନ ଥିଲା । ଆନିକଟ ନିକଟରେ ନଦୀ ମଝିରେ ବାଲି ଓ ପଟୁମାଟି ଜମା ହୋଇ ନଦୀପଠା ପୋତି ହୋଇଗଲା । ନଦୀ ପଠା ପୋତି ହୋଇ ଯିବାରୁ ଶଟର ବନ୍ଦ ଥାଇ ମଧ୍ୟ କ୍ରୀଦାଶପୁର ଓ ବରପଲ୍ଲୀ ଅଞ୍ଚଳ ଦେଇ ଯାଇଥିବା କେନାଲରେ ଅଧିକ ନଦୀର ଜଳ ପ୍ରବାହିତ ହୋଇଥିଲା। ନଦୀର ଜଳ ଅଧିକ ଯିବା ଓ କେନାଲ ବନ୍ଧ ମଜଭୁତ ନ ଥିବାରୁ କ୍ରୀଦାଶପୁରକୁ ଯାଇଥିବା କେନାଲ ଓ ପାର୍ଶ୍ୱ (ପରୀ) କେନାଲ ପ୍ରାୟ ୮ଦିନ ତଳେ ଭାଙ୍ଗି ଗଲା । କେନାଲ ପାର୍ଶ୍ୱରେ ପଥର ପ୍ୟାଚିଂ ସତ୍ତ୍ୱେ କେନ୍ାଲ ବନ୍ଧ ଭାଙ୍ଗିବା ନିମ୍ନମାନର କାମକୁ ପ୍ରମାଣିତ କରୁଛି । ଅନ୍ୟପକ୍ଷେ କେନାଲର ବନ୍ଧ ଭାଙ୍ଗି ଯିବା ଦ୍ୱାରା ଯଦୁପୁର, ବାରବାଟୀ, ହରିପୁର, ଗଦାଧରପ୍ରସାଦ, ଚମ୍ପତିପୁର ଅଞ୍ଚଳର ଚାଷ ଜମିରେ ପାଣି ମାଡି ମାରୁନି। ସେହିପରି ଡାହୁକା ନଦୀରୁ ବାହାରିଥିବା ଡାହୁକା ନାଳରେ ପାଣି ଯାଉନି । ଡାହୁକା ନାଳରେ ପାଣି ନ ଯିବା ଦ୍ୱାରା ବୋଦାପଡା, ବରପଲ୍ଲୀ, ଲକ୍ଷ୍ମୀପ୍ରସାଦ, ଘଡୁଆଳ, ଇଟାମାଟି, ପଣ୍ଡୁସର ଅଞ୍ଚଳର ଜମିକୁ ମଧ୍ୟ ଅନୁରୂପ ପାଣି ଯାଉ ନାହିଁ । ଏଣୁ ଉପରୋକ୍ତ ଅଞ୍ଚଳରେ ମରୁଡ଼ିର ଭୟ ଘାରିଛି ।
ଏନେଇ ଜଳସମ୍ପଦ ବିଭାଗ ବିଭଗାର କନିଷ୍ଠ ଯନ୍ତ୍ରୀ କ୍ଷୀରୋଦ ଜାଲି କୁହନ୍ତି, ବାଲିବସ୍ତା ପ୍ୟାକ କରାଯାଇ ଅସ୍ଥାୟୀ ବନ୍ଧ କରାଯାଇଛି । ମରୁଡ଼ି ପରିସ୍ଥିତି ସୃଷ୍ଟି ହେବ ନାହିଁ । ଆଗରୁ ଯେପରି ପାଣି ଯାଉଥିଲା ସେପରି ଯିବ । ସବୁ କିଛି ଠିକ୍ଠାକ ହୋଇଯିବ । ଜଣେ ଚାଷୀ ନିଜ ନାମ ଗୋପନ ରଖି କହିଛନ୍ତି, କେନାଲ ବନ୍ଧ ଭାଙ୍ଗିଯିବା ଦ୍ୱାରା ନଦୀ ପାଣି ନଦୀରେ ଗଲା । ନଦୀ ପଠା ଗଁାରେ ବନ୍ୟାର ଭୟ ଦେଖା ଦେବ । ଜଳ ସମ୍ପଦ ପକ୍ଷରୁ ବାଲିବସ୍ତା ପକାଇ ଦେଲେ କାମ ଦେବନି । ବର୍ଷାଋତୁରେ କେନାଲ ଓ ନାଳ ଶୁଖିଲା ପଡିଛି । ମରୁଡ଼ି ସମୟରେ ଜମି ଜଳସେଚିଚତ ହେବାର ଆଶା ନିରର୍ଥକ ବୋଲି ସେ କହିଛନ୍ତି।
