ପଟ୍ଟାଙ୍ଗି,୧୭।୭(ଶରତ କୁମାର ଧଳ): ସାରା ରାଜ୍ୟରେ ଗୋଟିଏ ଦିନରେ ରଥଯାତ୍ରା ବା ରଥଟଣା ହେଉଥିବା ବେଳେ ରାଜ୍ୟର କିଛି ସ୍ଥାନରେ ଦିନକ ପରେ ରଥଯାତ୍ରା ବା ରଥଟଣା ହୋଇଥାଏ । ସେଥିମଧ୍ୟରୁ କୋରାପୁଟ ଜିଲା ପଟ୍ଟାଙ୍ଗି ବ୍ଲକ ଅଧୀନରେ ରହିଥିବା କୋଟିଆ ପଞ୍ଚାୟତରେ ଗୁରୁବାର ପ୍ରଭୁ ଜଗନ୍ନାଥ , ବଳଭଦ୍ର ଏବଂ ଦେବୀ ସୁଭଦ୍ରାଙ୍କୁ ପୂଜାର୍ଚ୍ଚନା ପରେ ପହଣ୍ଡି କରି ରଥ ଉପରକୁ ଅଣାଯାଇଥିଲା । ଯାହା ରୀତିନୀତି ଅନୁସାରେ ଶୁକ୍ରବାର ରଥଟଣା କାର୍ଯ୍ୟ ହୋଇଥିଲା। ଏଥିରେ
ଶାବର ଶ୍ରୀକ୍ଷେତ୍ର ପୂଜକ ପ୍ରଶାନ୍ତ କୁମାର ପଣ୍ଡା ଏବଂ କୋଟିଆ ଜଗନ୍ନାଥଙ୍କ ନିତିଦିନ ପୂଜକ ମୁଗୁରୀ ତାଡିଙ୍ଗିଙ୍କ ଦ୍ୱାରା ରଥ ଉପରେ ପୂଜାର୍ଚ୍ଚନା ହେବା ପରେ ରଥଟଣା କାର୍ଯ୍ୟରେ ଯୋଗ ଦେଇଥିବା ପଟ୍ଟାଙ୍ଗି ବିଧାୟକ ରାମଚନ୍ଦ୍ର କାଡାମ , କୋରାପୁଟ ବିଧାୟକ ରଘୁରାମ ମାଛ , ପୂର୍ବତନ ସାଂସଦ ଜୟରାମ ପାଙ୍ଗି , ପୂର୍ବତନ ବିଧାୟକ ପ୍ରୀତମ ପାଢୀ , ବ୍ଲକ ଅଧ୍ୟକ୍ଷା କଳ୍ପନା ପାଙ୍ଗି , ସରପଞ୍ଚ ଲିଉ ଗେମେଲ , ଜିଲା ପରିଷଦ ସଭ୍ୟ ଲଇଚନ ଖରା , ସମିତି ସଭ୍ୟା ଅମ୍ବିକା ପାଙ୍ଗି , ଅବସରପ୍ରାପ୍ତ ଜିଲାପାଳ ଗଦାଧର ପରିଡ଼ା , ଭାଜପା ରାଜ୍ୟ ଆଦିବାସୀ ମୋର୍ଚ୍ଚା ଉପସଭାପତି ଚୈତନ୍ୟ ନନ୍ଦିବାଲି ପ୍ରମୁଖ ଯୋଗଦେଇ ପ୍ରଭୁ ଜଗନ୍ନାଥଙ୍କୁ ଦର୍ଶନ କରି ପୂଜା କରିବା ପରେ ପଞ୍ଚାୟତର କିଛି ମାନ୍ୟଗଣ୍ୟଙ୍କୁ ରଥ ଉପରେ ଉତ୍ତରୀୟ ଦେଇ ସମ୍ମାନିତ କରାଯାଇଥିଲା । ଏହା ପରେ ରାଜାଙ୍କ ଛେରାପହଁରା କାର୍ଯ୍ୟ ପୂର୍ବତନ ସରପଞ୍ଚ ସିଧେଶ୍ୱର ଗେମେଲଙ୍କ ଦ୍ୱାରା କରାଯିବାପରେ ଉପରୋକ୍ତ ଅତିଥିଙ୍କ ସମେତ ଜିଲାପାଳ ମନୋଜ ସତ୍ୟବାନ ମହାଜନ , ଜିଲା ଆରକ୍ଷୀ ଅଧିକ୍ଷକ ରୋହିତ ବର୍ମା , ସିଡିପିଓ ବେଣୁଧର ଶବର , ଏଡିଏମ , ସୁନାବେଡା ଏସଡିପିଓ ସୁମିତ୍ରା ଜେନା , ତହସିଲଦାର ଦେବେନ୍ଦ୍ର ବାହାଦୂର ସିଂ ଧାରୁଆ ପ୍ରମୁଖଙ୍କ ସହ ବ୍ଲକ କାର୍ଯ୍ୟାଳୟ କର୍ମଚାରୀ ଏବଂ ସୀମାନ୍ତବାସୀ ମିଳିମିଶି ରଥ ଟାଣି ଅଙ୍ଗନବାଡ଼ି କେନ୍ଦ୍ରରେ ହୋଇଥିବା ଗୁଣ୍ଡିଚା ମନ୍ଦିର ବା ମାଉଁସି ମା’ଘରେ ରଥ ପହଞ୍ଚାଇଥିଲେ । ପଞ୍ଚାୟତରେ ରଥଟଣା କାର୍ଯ୍ୟକ୍ରମକୁ ଦୃଷ୍ଟିରେ ରଖି ପୋଲିସ ପ୍ରଶାସନ ପକ୍ଷରୁ କୋଟିଆ , ପଟ୍ଟାଙ୍ଗି , ସେମିଳିଗୁଡା , ସୁନାବେଡା ଥାନାଧିକାରୀ ଯୋଗଦେଇ ସୁରକ୍ଷା ବ୍ୟବସ୍ଥାକୁ କଡାକଡି କରିଥିଲେ । ସେପଟେ ଜିଲା ତଥା ରାଜ୍ୟର ଏକ ସୀମା ବିବାଦୀୟ ପଞ୍ଚାୟତରେ ମହାଆଡମ୍ବରରେ ରଥଟଣା କାର୍ଯ୍ୟରେ ସ୍ଥାନୀୟ ଗଣମାଧ୍ୟମ ପ୍ରତିନିଧିମାନଙ୍କୁ ପୂର୍ବ ସୂଚନା ଦେବାରେ ବ୍ଲକ ପ୍ରଶାସନ କୁଣ୍ଠାବୋଧ କରିଥିଲେ ମଧ୍ୟ ଜିଲା ଓ ବ୍ଲକର ଗଣମାଧ୍ୟମ ପ୍ରତିନିଧିମାନେ ଯୋଗଦେଇ ରଥଯାତ୍ରା ସମ୍ପର୍କରେ ଖବର ସଂଗ୍ରହ କରିବାରେ ପଛାଇନଥିଲେ। ବ୍ଲକ ପ୍ରଶାସନର ଏହିପରି କୁଣ୍ଠାବୋଧ ଉପରେ ଜିଲା ପ୍ରଶାସନ ଦୃଷ୍ଟି ଦେବା ଆବଶ୍ୟକ ରହିଛି ବୋଲି ମତପ୍ରକାଶ ପାଇଛି ।
