କୋଟା,୧୪।୧୦: କୋଚିଂ ସିଟି କୋଟାରେ କୋଚିଂ ଛାତ୍ରଙ୍କ ଆତ୍ମହତ୍ୟା ଘଟଣା ଦିନକୁ ଦିନ ସହରକୁ ବଦନାମ କରୁଥିବାବେଳେ ଏବେ ଆଉ ଏକ ହୃଦୟ ବିଦାରକ ଘଟଣା ସାମ୍ନାକୁ ଆସିଛି। କୋଟାରେ ନିଟ୍ ପ୍ରସ୍ତୁତି କରୁଥିବା ବିହାରର ଜଣେ ୧୫ ବର୍ଷୀୟ କୋଚିଂ ଛାତ୍ରୀଙ୍କୁ ବଳାତ୍କାର କରାଯାଇଛି। ଖୋଦ୍ ହଷ୍ଟେଲର କର୍ମଚାରୀ ଛାତ୍ରୀଙ୍କୁ ବଳାତ୍କାର କରିଥିବା ଜଣାପଡିଛି। ଏହି ମାମଲା ସମ୍ପର୍କରେ ସୂଚନା ପାଇବା ପରେ ପୋଲିସ ଅଭିଯୁକ୍ତ ହଷ୍ଟେଲ କର୍ମଚାରୀ ତଥା ହଷ୍ଟେଲ ମୁଖ୍ୟଙ୍କୁ ଗିରଫ କରିଛି।
ପୋଲିସର ସୂଚନାନୁସାରେ, କୋଟାରେ ରହି କୋଚିଂ ନେଉଥିବା ନାବାଳିକା ଛାତ୍ରୀ ଜବାହର ନଗର ପୋଲିସ ଷ୍ଟେସନରେ ବଳାତ୍କାର ରିପୋର୍ଟ ଦାଖଲ କରିଛନ୍ତି। ପୀଡିତାଙ୍କ କହିବାନୁସାରେ, ହଷ୍ଟେଲ ମେସରେ କାମ କରୁଥିବା ଧୀରଜ ଭିଲ ତାଙ୍କୁ ବଳାତ୍କାର କରିଥିଲେ। ଯେତେବେଳେ ସେ ହଷ୍ଟେଲ ମୁଖ୍ୟ କୁଲଦୀପ ବାଜପେୟୀଙ୍କ ନିକଟରେ ଅଭିଯୋଗ କରିଥିଲେ, ସେତେବେଳେ ସେ ତାଙ୍କୁ ଚାପ ପକାଇବା ସହ ଫଟୋ ଏବଂ ଭିଡିଓ ଭାଇରାଲ କରିବାକୁ ଧମକ ଦେଇଥିଲେ।
ପୀଡିତା ଆହୁରି କହିଛନ୍ତି, ଅଭିଯୁକ୍ତ ତାଙ୍କୁ ଫେବୃଆରୀ ୨୦୨୩ରେ ସାକ୍ଷାତ କରିବାକୁ ଡାକିଥିଲେ। ପରେ ସେ ତାଙ୍କୁ ମଦ୍ୟପାନ କରାଇ ବଳାତ୍କାର କରିଥିଲେ। ଏହା ପରେ ସେ ତାଙ୍କୁ ବ୍ଲାକମେଲ କରିବା ଆରମ୍ଭ କଲେ। ଅଭିଯୁକ୍ତ ଧୀରଜ ଭିଲ ପିପାଲଦା ଅଞ୍ଚଳର ବାସିନ୍ଦା। ସେ ବର୍ତ୍ତମାନ କୋଟାର ବାଲାଜୀ ନଗର ଅଞ୍ଚଳରେ ରୁହୁଛନ୍ତି। ହଷ୍ଟେଲ ମୁଖ୍ୟ ମଧ୍ୟପ୍ରଦେଶ ଗୱାଲିଅରର ବାସିନ୍ଦା। ସେ କୋଟାରେ ଏହି ହଷ୍ଟେଲ ପରିଚାଳନା କରନ୍ତି।
ପୀଡିତା ଜବାହର ନଗର ପୋଲିସ ଷ୍ଟେସନରେ ଅଭିଯୋଗ କରିବା ପରେ ପୋଲିସ ତତ୍କ୍ଷଣାତ ଆକ୍ସନ ନେଇଛି। କିଛି ଘଣ୍ଟା ମଧ୍ୟରେ ପୋଲିସ ଅଭିଯୁକ୍ତ ମେସ କର୍ମଚାରୀ ଧୀରଜ ଭିଲ ଏବଂ ସହଯୋଗୀ ହଷ୍ଟେଲ ମୁଖ୍ୟ କୁଲଦୀପ ବାଜପେୟୀଙ୍କୁ ଗିରଫ କରିଛି। ତେବେ ପୋଲିସ ଏହି ଘଟଣାର ତଦନ୍ତ କରୁଛି। ସୂଚନାଯୋଗ୍ୟ ଯେ କୋଟାରେ ଗତ ଏକ ବର୍ଷ ମଧ୍ୟରେ ଅନେକ କୋଚିଂ ଛାତ୍ର ମାନସିକ ଚାପରେ ରହି ଆତ୍ମହତ୍ୟା କରୁଛନ୍ତି। ଏଥିସହ ଜଣେ ନାବାଳିକା କୋଚିଂ ଛାତ୍ରୀ ସନ୍ତାନ ଜନ୍ମ ଦେଇଥିବାର ଖବର ସାମ୍ନାକୁ ଆସିଥିଲା।
