ଦୁବାଇ, ୫।୧୦: ଚଳିତ ଆଇପିଏଲ୍ର ସୋମବାର ଖେଳାଯାଇଥିବା ୧୯ତମ ମୁକାବିଲାରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆର୍ସିବି) ଓ ଦିଲ୍ଲୀ କ୍ୟାପିଟାଲ୍ସ ପରସ୍ପର ସାମ୍ନା ସାମ୍ନି ହୋଇଛନ୍ତି। ସ୍ଥାନୀୟ ଦୁବାଇ ଇଣ୍ଟରନ୍ୟାଶନାଲ କ୍ରିକେଟ୍ ଷ୍ଟାଡିୟମରେ ଅନୁଷ୍ଠିତ ଏହି ମ୍ୟାଚ୍ରେ ଟସ୍ ଜିତି ଆର୍ସିବି ଅଧିନାୟକ ବିରାଟ କୋହଲି ପ୍ରଥମେ ଫିଲ୍ଡିଂ କରିବାକୁ ନିଷ୍ପତ୍ତି ନେଇଛନ୍ତି। ଫଳରେ ଦିଲ୍ଲୀ କ୍ୟାପିଟାଲ୍ସ ଅଧିନାୟକ ଶ୍ରେୟାସ ଆୟାର ଟସ୍ ହାରିଥିଲେ ମଧ୍ୟ ପ୍ରଥମେ ବ୍ୟାଟିଂ କରିବାର ସୁଯୋଗ ପାଇଛନ୍ତି। ଚଳିତ ଟୁର୍ନାମେଣ୍ଟରେ ଦିଲ୍ଲୀ ବର୍ତ୍ତମାନ ସୁଦ୍ଧା ୪ ମ୍ୟାଚ୍ରୁ ୩ ବିଜୟ ସହ ୬ ପଏଣ୍ଟ ପାଇ ମୁମ୍ବାଇ ଇଣ୍ଡିଆନ୍ସ ପଛକୁ ଟେବୁଲ ତାଲିକାର ୨ୟ ସ୍ଥାନରେ ରହିଛି। ଅପରପକ୍ଷରେ ବାଙ୍ଗାଲୋର ୪ ମ୍ୟାଚ୍ରୁ ୩ ବିଜୟ ହାସଲ କରିଥିଲେ ମଧ୍ୟ ରେଟିଂ ଦୃଷ୍ଟିରୁ ୩ୟ ସ୍ଥାନରେ ରହିଛି। ଆଘାତଜନିତ ସମସ୍ୟା ଲାଗି ଚଳିତ ଆଇପିଏଲ୍ର ବଳକା ମ୍ୟାଚ୍ରୁ ବାଦ୍ ପଡ଼ିଥିବା ଅମିତ୍ ମିଶ୍ରାଙ୍କ ସ୍ଥାନରେ ଦିଲ୍ଲୀ ଦଳରେ ଅକ୍ଷର ପଟେଲଙ୍କୁ ସୁଯୋଗ ମିଳିଛି। ସେହିଭଳି ଆଡାମ ଜାମ୍ପା ଓ ଗୁରକୀରଟ୍ ସିଂ ମନ୍ନଙ୍କ ସ୍ଥାନରେ ମୋଇନ ଅଲୀ ଓ ମହମ୍ମଦ ସିରାଜ ବାଙ୍ଗାଲୋର ଦଳରେ ଚୂଡ଼ାନ୍ତ ଏକାଦଶରେ ସ୍ଥାନ ପାଇଛନ୍ତି।
