ବରଗଡ଼ ଜିଲାର ଡେବ୍ରିଗଡ଼ ଅଭୟାରଣ୍ୟ। ଏଠାରେ ରହିଥିବା ଖୋଲ (ପାହାଡ଼ ମଝିରେ ଫାଙ୍କ) ରେ ସର୍ବଦା ପାଣି ଜମି ରୁହେ। ଲୋକେ ତାକୁ କୁହନ୍ତି ଆପ୍ଖୋଲ। ସେଠାରେ ୩ଟି ବଡ଼ ଝରଣା ରହିଛି। ଏହା ଉପରକୁ ରହିଛି ଆଉ ଏକ ଝରଣା। ତାକୁ ବଡ଼ଆପ୍ ବୋଲି କୁହାଯାଏ। ଜଙ୍ଗଲର ସମସ୍ତ ଜୀବଜନ୍ତୁ ସେଠାକୁ ପାଣି ପିଇବାକୁ ଆସନ୍ତି। ଏହା ଏକ ପିକ୍ନିକ୍ ସ୍ପଟ୍। ଜୀବଜନ୍ତୁଙ୍କ ସୁରକ୍ଷା ଦୃଷ୍ଟିରୁ ଏଠାରେ ପଲିଥିନ ପକାଇବା ମନା। ଏଭଳି ଏକ ପର୍ଯ୍ୟଟନସ୍ଥଳୀ ପ୍ରଶାସନର ଦୃଷ୍ଟି ଆଢ଼ୁଆଳରେ ରହିଯାଇଛି। ସବୁଦିନିଆ ରାସ୍ତା ସହିତ ଏହାର ଉନ୍ନତୀକରଣ ଦିଗରେ ପଦକ୍ଷେପ ନିଆଗଲେ ଏଠାରେ ପର୍ଯ୍ୟଟକଙ୍କ ସଂଖ୍ୟା ବୃଦ୍ଧି ପାଇବ।
କେମିତି ଯିବେ
ବରଗଡ଼ଠାରୁ ଭଟଲି ରାସ୍ତାରେ ୧୮କି.ମି ଗଲେ ଗୋପାଳପୁର ଏବଂ ସେଠାରୁ ଡାହାଣକୁ ମୂଲବାର ରାସ୍ତାରେ ଶରଧାପାଲି ଗ୍ରାମ ଦେଇ ୧୫କି.ମି ରାସ୍ତା ଅତିକ୍ରମ କଲେ ଆପ୍ଖୋଲରେ ପହଞ୍ଚି ହେବ। ସେହିପରି ଅମ୍ବାଭୋନା ରାସ୍ତାର ମେଣ୍ଢାପାଲି ଛକରୁ ମଧ୍ୟ ଜଙ୍ଗଲି ରାସ୍ତାରେ ପ୍ରାୟ ୧୦କି.ମି ଗଲେ ଆପ୍ଖୋଲ ପଡିବ। କାର୍, ଅଟୋ, ବାଇକ୍ରେ ସେଠାକୁ ଯାଇହେବ। ପାହାଡ଼ ତଳେ ଗାଡ଼ି ରଖି ଆପ୍ଖୋଲ ଝରଣା ପାଣିର ଧାରେ ଧାରେ ପ୍ରାୟ ୧୦କି.ମି ରାସ୍ତା ଚାଲି ଚାଲି ଯିବାର ମଜା ନିଆରା।
ରିପୋର୍ଟ: ପ୍ରେମାନନ୍ଦ ଖମାରୀ/ସଞ୍ଜୀବ ଷଡ଼ଙ୍ଗୀ
