ମୁମ୍ବାଇ,୨୪।୪: କୋଲ୍କାତା ନାଇଟ୍ ରାଇଡର୍ସ (କେକେଆର୍) ଅଲ୍ରାଉଣ୍ଡର ଆନ୍ଧ୍ରେ ରସେଲ ଶନିବାର ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍) ଇତିହାସର ପ୍ରଥମ ବୋଲର ଭାବେ ଗୋଟିଏ ଓଭର ବୋଲିଂ କରି ୪ ଉଇକେଟ ସଫଳତା ହାସଲ କରିଛନ୍ତି। ଗୁଜରାଟ ଟାଇଟନ୍ସ (ଜିଟି) ବିପକ୍ଷ ମ୍ୟାଚ୍ରେ ସେ ଏହି ସଫଳତା ପାଇଥିଲେ। ମ୍ୟାଚ୍ରେ ଆଦୌ ବୋଲିଂ କରି ନ ଥିବା ରସେଲ ଅନ୍ତିମ ଓଭର ପକାଇଥିଲେ। ଏଥିରେ ସେ ଅଭିନବ ମନୋହର, ଲୋକି ଫର୍ଗୁସନ, ରାହୁଲ ଟଓ୍ବୋଟିଆ ଓ ୟଶ୍ ଦୟାଲଙ୍କୁ ଆଉଟ୍ କରିଥିଲେ।
ପୂର୍ବରୁ ଏହି ରେକର୍ଡର ଅଧିକାରୀ ଥିଲେ କୋଲ୍କାତାର ପୂର୍ବତନ ଅଲରାଉଣ୍ଡର ଲକ୍ଷ୍ମୀ ରତନ ଶୁକ୍ଳା। ସେ ୨୦୦୮ରେ ଦିଲ୍ଲୀ ଡେୟାରଡେଭିଲ୍ସ ବିପକ୍ଷରେ ଗୋଟିଏ ଓଭର ବୋଲିଂ କରି ୬ ରନ୍ ଦେଇ ୩ ଉଇକେଟ ଅକ୍ତିଆର କରିଥିଲେ। କିନ୍ତୁ ଅନ୍ତିମ ଓଭରରେ ରସେଲଙ୍କ ସାହସିକତା ସତ୍ତ୍ୱେ କେକେଆର୍କୁ ପରାଜୟର ସମ୍ମୁଖୀନ ହେବାକୁ ପଡ଼ିଥିଲା। ୧୫୭ ରନ୍ର ଟାର୍ଗେଟ ନେଇ ଓହ୍ଲାଇଥିବା କେକେଆର୍ ବିଜୟ ଲକ୍ଷ୍ୟଠାରୁ ମାତ୍ର ୯ ରନ୍ ପଛରେ ରହି ଯାଇଥିଲା।
