ନୂଆଦିଲ୍ଲୀ,୧୪।୩: ଆଇପିଏଲ ୨୦୨୬ ସିଜନ ଆରମ୍ଭ ହେବାକୁ ମାତ୍ର ଦିନ କେଇଟା ବାକି। ନିକଟରେ ଟି-୨୦ ବିଶ୍ୱକପ ଶେଷ ହେବା ପରେ ଏବେ ପ୍ରଶଂସକ ଏହି ଟୁର୍ନାମେଣ୍ଟକୁ ଅପେକ୍ଷା କରି ରହିଛନ୍ତି। ମାର୍ଚ୍ଚ ୨୮ରୁ ଲିଗ୍ର ୧୯ତମ ସିଜନ ଆରମ୍ଭ ହେବ। ସବୁଥର ପରି ଏଥର ମଧ୍ୟ ୧୦ଟି ଦଳ ମଧ୍ୟରେ ଜୋରଦାର ଲଢ଼େଇ ଦେଖିବାକୁ ମିଳିବ। କିନ୍ତୁ ପଡ଼ିଆରେ ଖେଳ ଆରମ୍ଭ ହେବା ପୂର୍ବରୁ ହିଁ ଦଳଗୁଡ଼ିକ ମଧ୍ୟରେ ଶବ୍ଦ ଯୁଦ୍ଧ ଆରମ୍ଭ ହୋଇଯାଇଛି। ପୂର୍ବତନ ଚାମ୍ପିଅନ କୋଲକାତା ନାଇଟ ରାଇଡର୍ସ (KKR) ଏକ ଭିଡିଓ ଜରିଆରେ ବର୍ତ୍ତମାନର ଚାମ୍ପିଅନ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (RCB)କୁ ଟାର୍ଗେଟ କରି ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି।
ଶନିବାର, ୧୪ ମାର୍ଚ୍ଚରେ କୋଲକାତା ନାଇଟ ରାଇଡର୍ସ ନିଜର ନୂଆ ଜର୍ସି ଲଞ୍ଚ କରିଛି। ଏଥିପାଇଁ ଦଳ ପକ୍ଷରୁ ଏକ ପ୍ରମୋସନାଲ ଭିଡିଓ ରିଲିଜ କରାଯାଇଛି। ଏହି ଭିଡିଓରେ କିଛି ନିର୍ଦ୍ଦିଷ୍ଟ ସଂଖ୍ୟା (Numbers)ର ବ୍ୟବହାର କରାଯାଇଛି, ଯାହାଦ୍ୱାରା RCBର ମଜା ଉଡ଼ା ଯାଇଛି।
ଭିଡିଓର ଏକ ଦୃଶ୍ୟରେ ଟ୍ରାଫିକ ସିଗ୍ନାଲ ଦେଖାଯାଇଛି, ଯେଉଁଠାରେ ଟାଇମରେ ‘୪୯’ ଲେଖା ହୋଇଛି। ସାଧାରଣ ଭାବେ ଏହା ୪୯ ସେକେଣ୍ଡକୁ ବୁଝାଉଥିଲେ ମଧ୍ୟ, ଆଇପିଏଲ ଇତିହାସରେ ଏହି ନମ୍ବର RCB ପାଇଁ ଏକ କଳା ଇତିହାସ। ଆଇପିଏଲ ଇତିହାସରେ RCB ମାତ୍ର ୪୯ ରନ୍ରେ ଅଲ୍-ଆଉଟ୍ ହୋଇଯାଇଥିଲା, ଯାହା ଲିଗ୍ର ସର୍ବନିମ୍ନ ସ୍କୋର। ଏହି ମ୍ୟାଚ୍ KKR ବିପକ୍ଷରେ ହିଁ ଖେଳାଯାଇଥିଲା।
କେବଳ ୪୯ ନୁହେଁ, KKR ନିଜର ସଫଳତା ଦେଖାଇବା ସହ RCB କୁ ଚିଡ଼ାଇବା ପାଇଁ ଆହୁରି କିଛି ନମ୍ବର ବ୍ୟବହାର କରିଛି। ଯେମିତିକି, ୧୫୮, ଆଇପିଏଲ୍ର ପ୍ରଥମ ମ୍ୟାଚ୍ରେ ବ୍ରାଣ୍ଡନ ମ୍ୟାକକୁଲମଙ୍କ ସ୍କୋର, ଯାହା RCB ବିପକ୍ଷରେ ଥିଲା। ୧୦୫/୬, ପାୱାର-ପ୍ଲେ (୬ ଓଭର) ରେ KKR ର ସର୍ବାଧିକ ସ୍କୋର, ଏହା ମଧ୍ୟ ୨୦୧୭ରେ RCB ବିପକ୍ଷରେ ଆସିଥିଲା।୨୭୨/୭, ଏକ ସ୍କୁଟର ନମ୍ବର ପ୍ଲେଟ ଜରିଆରେ KKR ନିଜର ସର୍ବାଧିକ ସ୍କୋରକୁ ଦର୍ଶାଇଛି, ଯାହା ଗତ ସିଜନରେ ଦିଲ୍ଲୀ କ୍ୟାପିଟାଲ୍ସ ବିପକ୍ଷରେ ହୋଇଥିଲା।
ଏହି ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ଉଭୟ ଦଳର ପ୍ରଶଂସକଙ୍କ ମଧ୍ୟରେ ଯୁକ୍ତିତର୍କ ଆରମ୍ଭ ହୋଇଯାଇଛି। ଆଗାମୀ ମ୍ୟାଚ୍ରେ RCB ଏହାର ଜବାବ ପଡ଼ିଆରେ କିଭଳି ଦେଉଛି, ତାହା ଦେଖିବାକୁ ବାକି ରହିଲା।
