ଯାଜପୁର ଟାଉନ,୩ା୯(ପ୍ରଯକ୍ତା ପ୍ରିୟଦର୍ଶନୀ ମହାନ୍ତି)ଯାଜପୁର ଟାଉନ ଥାନା ଅନ୍ତର୍ଗତ କୁଅଁାସରପୁର ଗ୍ରାମରେ ଶନିବାର ଏକ ହତ୍ୟାକାଣ୍ଡ ଘଟିଛି। ଜଣେ ଯୁବକ ମାତ୍ର ୧୦ ଟଙ୍କା ପାଇଁ ତାଙ୍କ ମା’ଙ୍କ ମୁଣ୍ଡକୁ ହେମଦସ୍ତା ପୁଆରେ ଛେଚି ହତ୍ୟା କରିଛନ୍ତି। ହତ୍ୟାର ଶିକାର ହୋଇଛନ୍ତି ଗ୍ରାମର ନରେଶ ସାହୁଙ୍କ ସ୍ତ୍ରୀ ନିରୁପମା। ପୋଲିସ ତାଙ୍କ ପୁଅ ଶୁଭମ୍ ଓରଫ୍ ବାବୁନ୍(୨୦)ଙ୍କୁ ଗିରଫକରି ତଦନ୍ତ ଚଳାଇଛି। ଶୁଭମ୍ ପ୍ରତ୍ୟେକ ଦିନ ଡ୍ରଗ୍ସ ସେବନ କରନ୍ତି ବୋଲି ସ୍ଥାନୀୟ ଲୋକଙ୍କଠାରୁ ଜଣାପଡ଼ିଛି। ଡ୍ରଗ୍ସ ନିଶାରେ ସେ ଏଭଳି ଘଟଣା ଘଟାଇଥିବା ଲୋକେ କହିଛନ୍ତି।
ସୂଚନା ମୁତାବକ, ମଧ୍ୟାହ୍ନରେ ଶୁଭମ୍ ତାଙ୍କ ମା’ ନିରୁପମାଙ୍କୁ ୧୦ ଟଙ୍କା ମାଗିଥିଲେ। ହେଲେ ନିରୁପମା ପଇସା ନାହିଁ ବୋଲି କହିଥିଲେ। ଏତିକିରେ ଶୁଭମ୍ ହଠାତ୍ ରାଗିଯାଇ ମା’ଙ୍କୁ ଅଶ୍ଳୀଳ ଭାଷାରେ ଗାଳିଗୁଲଜ କରିବା ସହ ଘରେ ପୂରାଇ ଭିତରପଟୁ କବାଟ ବନ୍ଦ କରି ଦେଇଥିଲେ। ପରେ ଶୁଭମ୍ ଘରେ ଥିବା ଏକ ହେମଦସ୍ତା ପୁଆରେ ମା’ଙ୍କ ମୁଣ୍ଡକୁ ନିସ୍ତୁକ ପିଟିଥିଲେ। ନିରୁପମାଙ୍କ ଚିତ୍କାର ଶୁଣି ପଡ଼ୋଶୀ ମନୋରମା ସାହୁ ଦୌଡ଼ିଯିବାରୁ ଘରର ଭିତର ପଟୁ କବାଟ ଦିଆଯାଇଥିବା ଦେଖିଥିଲେ। ଏହାପରେ ସେ ପାଖ ଲୋକଙ୍କୁ ଡାକ ପକାଇଥିଲେ ଏବଂ ମନୋରମା ଝରକାରେ ଦେଖିବାକୁ ପାଇଥିଲେଯେ, ଶୁଭମ୍ ତାଙ୍କ ମା’ଙ୍କ ମୁଣ୍ଡକୁ ହେମଦସ୍ତା ପୁଆରେ ପିଟି ବଶ ବାହାର କରିଦେଇଛନ୍ତି। ସ୍ଥାନୀୟ ଲୋକେ ଘଟଣାସ୍ଥଳରେ ପହଞ୍ଚତ୍ କବାଟ ଭାଙ୍ଗି ଶୁଭମ୍ଙ୍କୁ କାବୁ କରିବା ସହ ଏକ ବିଦ୍ୟୁତ୍ ଖୁଣ୍ଟରେ ବାନ୍ଧି ଦେଇଥିଲେ। ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚତ୍ ଶୁଭମ୍ଙ୍କୁ ଗିରଫ କରିଥିଲା। ପରେ ନିରୁପମାଙ୍କ ମୃତଦେହ ଜବତକରି ବ୍ୟବଚ୍ଛେଦ ପାଇଁ ଯାଜପୁର ଜିଲା ମୁଖ୍ୟ ଚିକିତ୍ସାଳୟକୁ ପଠାଇଥିଲା। ଏନେଇ ଥାନାରେ ଏକ ମାମଲା ନଂ.(୩୨୭/୨୩) ରୁଜୁ ହୋଇଛି। ଏହି ଘଟଣା ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।
