ଲୋଇସିଂହା,୨୨।୪(ଡି.ଏନ୍.ଏ.): ବଲାଙ୍ଗୀର ଜିଲା ଆଗଲପୁର ବ୍ଲକ ତଥା ଲୋଇସିଂହା ଥାନା ଅନ୍ତର୍ଗତ ଲୁହୁରାମୁଣ୍ଡା ଗାଁର ବାଳକୃଷ୍ଣ ବାରିକ ହତ୍ୟା ଘଟଣାର ମୁଖ୍ୟ ଅଭିଯୁକ୍ତ ନୀଳମଣି ସାହୁ(୫୮)ଙ୍କୁ ପୋଲିସ ଗୁରୁବାର ଗିରଫ କରିଛି। ୧୯୯୨ରେ ଜାମିନରେ ଆସିବା ପରେ ସେ ଫେରାର ହୋଇ ଯାଇଥିଲେ। ଦୀର୍ଘ ୩୦ ବର୍ଷ କାଳ ପୋଲିସ ଆଖିରେ ଧୂଳି ଦେଇ ଆସିଥିବା ନୀଳମଣିଙ୍କୁ ଶେଷରେ ପୋଲିସ ଲୁହୁରାମୁଣ୍ଡାରୁ ଧରି ଜେଲ ହାଜତକୁ ପଠାଯାଇଥିବା ଆଇଆଇସି ସଂଗ୍ରାମ ପଟ୍ଟନାୟକ କହିଛନ୍ତି।
ରାଜନୈତିକ ଆକ୍ରୋଶରୁ ୧୯୮୪ ନଭେମ୍ବର ୧୯ ତାରିଖରେ ବାଳକୃଷ୍ଣଙ୍କୁ ହତ୍ୟା କରାଯାଇଥିଲା। ଏହି ଘଟଣା ସେତେବେଳେ ଜିଲାରେ ଚର୍ଚ୍ଚାର ବିଷୟ ହୋଇଥିଲା। ଅଭିଯୋଗ ଆଧାରରେ ପୋଲିସ ମୁଖ୍ୟ ଅଭିଯୁକ୍ତ ନୀଳମଣିଙ୍କ ସହ ୧୭ ଜଣଙ୍କୁ ଗିରଫ କରି ଜେଲ ପଠାଇଥିଲା। ୧୯୯୨ରେ ନୀଳମଣି ଏବଂ ଅନ୍ୟ ୪ ଅଭିଯୁକ୍ତ ଜାମିନରେ ଆସି ଆଉ ଜେଲକୁ ଫେରି ନ ଥିଲେ। ଘଟଣାକ୍ରମରେ ସେହିବର୍ଷ ମାମଲାର ବିଚାର କରି ବଲାଙ୍ଗୀର ଜିଲା ଓ ଦୌରାଜଜ୍ ଅଭିଯୁକ୍ତମାନଙ୍କୁ ଆଜୀବନ ସଜା ଓ ଅନ୍ୟାନ୍ୟ ମାମଲାରେ ଅଧିକ ୬ବର୍ଷ ଜେଲ ଦଣ୍ଡାଦେଶ କରିଥିଲେ। ଏହି ଘଟଣାରେ ୩ଜଣ ରାଜକ୍ଷମା ପାଇଥିଲେ। ସଜା କାଟି ସାରିଥିବା ୯ ଜଣଙ୍କ ମଧ୍ୟରୁ ଇତିମଧ୍ୟରେ ୭ଜଣଙ୍କର ମୃତ୍ୟୁ ଘଟିଲାଣି। ଫେରାର ଥିବା ଅନ୍ୟ ୫ ଅଭିଯୁକ୍ତଙ୍କ ମଧ୍ୟରୁ ବିଭିନ୍ନ ସମୟରେ ସୁପଳ ତାଣ୍ଡି, ସମାରୁ ତାଣ୍ଡି, ପାଚଲା ସାହୁ, କଳିକର ବାରିକଙ୍କୁ ଗିରଫ କରାଯାଇଥିବା ବେଳ ମୁଖ୍ୟ ଅଭିଯୁକ୍ତ ନୀଳମଣି ସାହୁ ଫେରାର ଥିଲେ।
ଗିରଫ ଅଭିଯୁକ୍ତ।
