ସିନାପାଲି,୨୪।୮(ମନଫୁଲ ମେହେର): ନୂଆପଡ଼ା ଜିଲା ସିନାପାଲି ବ୍ଲକ ଗୋଡାଲ ଗ୍ରାମପଞ୍ଚାତ ଅନ୍ତର୍ଗତ ମହଗାଁରେ କିଡ୍ନୀ ରୋଗ ବ୍ୟାପିଛି। ଏହି ଘଟଣା ଜଣାପଡ଼ିବା ପରେ ବୁଧବାର ମେଡିକାଲ ଟିମ ଉକ୍ତ ଗାଁରେ ପହଞ୍ଚତ୍ ତଦନ୍ତ ଆରମ୍ଭ କରିଛି। ସିନାପାଲି ଗୋଷ୍ଠୀ ସ୍ବାସ୍ଥ୍ୟ ଅଧିକାରୀ ଡ଼ା ଶ୍ରୀମାନ ସାହୁଙ୍କ ନେତୃତ୍ୱରେ ଏକ ଟିମ ମହଗାଁ ଯାଇ ସମସ୍ତ କିଡ୍ନୀ ଆକ୍ରାନ୍ତଙ୍କୁ ଭେଟି ଥିଲେ। ସେମାନଙ୍କ ମଧ୍ୟରୁ ପ୍ରାୟ ୯ଜଣ ରୋଗୀଙ୍କ ସମସ୍ୟା ଗୁରୁତର ହୋଇଥିବା ଡ଼ା ସାହୁ ପ୍ରକାଶ କରିଛନ୍ତି। ହେଲେ କ’ଣ ପାଇଁ ଏଠାରେ କିଡ୍ନୀ ରୋଗ ବ୍ୟାପିଛି, ତାହା ଆଗରୁ କହିହେବ ନାହିଁ ବୋଲି କହିଛନ୍ତି। ଅନ୍ୟପକ୍ଷରେ ସିନାପାଲି ଗ୍ରାମୀଣ ଜଳ ଓ ପରିମଳ ବିଭାଗ ପକ୍ଷରୁ ମଧ୍ୟ ଗ୍ରାମର ସମସ୍ତ ପାନୀୟ ଜଳ ଉତ୍ସରୁ ପରୀକ୍ଷା ପାଇଁ ଜଳ ସଂଗ୍ରହ କରାଯାଇଛି। ସୂଚନାଯୋଗ୍ୟ ଯେ, ଏହି ଗ୍ରାମରେ ଗତ ୨ ବର୍ଷରେ ୩ ଜଣ କିଡ୍ନୀ ରୋଗୀ ମୃତ୍ୟୁବରଣ କରିଥିବାବେଳେ ପ୍ରାୟ ୧୪ଜଣ ବ୍ୟକ୍ତି କିଡ୍ନୀ ରୋଗାକ୍ରାନ୍ତ ହୋଇ ଚିକିତ୍ସିତ ହେଉଥିବା କଥା ଗ୍ରାମବାସୀ କହିଥିଲେ। ବର୍ତ୍ତମାନ ଏହି ଘଟଣାକୁ ନେଇ ଗ୍ରାମାସୀଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହୋଇଛି। ସ୍ବାସ୍ଥ୍ୟ ବିଭାଗ ପକ୍ଷରୁ ଆବଶ୍ୟକ ପଦକ୍ଷେପ ଗ୍ରହଣ କରାଯିବ ବୋଲି ତଦନ୍ତ ଟିମ ମୁଖ୍ୟ ଡ଼ା ସାହୁ ପ୍ରକାଶ କରିଛନ୍ତି। ଅନ୍ୟପକ୍ଷରେ ଖଡିଆଳ ବିଧାୟକ ଏ ସଂକ୍ରାନ୍ତରେ ସୂଚନା ପାଇ ତାଙ୍କର ପ୍ରତନିଧିଙ୍କୁ ଉକ୍ତ ଗ୍ରାମକୁ ପଠାଇ ସମସ୍ୟା ବୁଝିଛନ୍ତି।
