ପଟ୍ଟାମୁଣ୍ଡାଇ, ୩୧ା୩(ସ୍ବ.ପ୍ର.):ପଟ୍ଟାମୁଣ୍ଡାଇ ଗ୍ରାମାଞ୍ଚଳ ଥାନା ଅଞ୍ଚଳର ଜଣେ ବ୍ୟକ୍ତିଙ୍କ ୯ମ ଶ୍ରେଣୀରେ ପଢୁଥିବା ୧୪ବର୍ଷର ଛାତ୍ରୀଙ୍କୁ କେହି ଜଣେ ଅପହରଣ କରି ନେଇଛନ୍ତି। ଏଥିସହ ମୁଣ୍ଡ ଜାମିନ ରଖି ପରିବାରଠାରୁ ଲକ୍ଷେ ଟଙ୍କା ଦାବି କରୁଥିବା ନେଇ ଥାନାରେ ଅଭିଯୋଗ ହୋଇଛି। ଏ ନେଇ ଥାନାରେ ଦଫା ୩୬୩ରେ ନଂ.୨୧୬/୨୩ରେ ମାମଲା ରୁଜୁ ହୋଇଛି। ପୋଲିସର ଘଟଣାର ଛାନ୍ଭିନ୍ ଚଳାଇଛି। ପ୍ରକାଶ ଯେ, ଥାନା ଅଞ୍ଚଳର ଜଣେ ବ୍ୟକ୍ତିଙ୍କ ୯ମ ଶ୍ରେଣୀରେ ପଢୁଥିବା ନାବାଳିକା ଝିଅ ନିକଟକୁ ଏକ ଅଜଣା ଫୋନ ନଂ.୯୮୬୧୬୮୩୫୯୪ରୁ କଲ ଆସିଥିଲା। ଏହି ନମ୍ବରରୁ ଫୋନ କରିଥିବା ଅଜଣା ବ୍ୟକ୍ତିଙ୍କ ଜଣକ ସମ୍ପୃକ୍ତା ଛାତ୍ରୀଙ୍କୁ ବିଭିନ୍ନ ପ୍ରଲୋଭନରେ ପ୍ରଲୋଭିତ କରି ତାଙ୍କ ସହ ପଳାଇ ଯିବାକୁ ବାରମ୍ବାର କହି ଆସୁଥିଲା। ଗତ ୬ ତାରିଖରେ କେହି ଅଜଣା ବ୍ୟକ୍ତି ନାବାଳିକା ଛାତ୍ରୀଙ୍କୁ ଅପହରଣ କରି ନେଇଥିଲେ। ୭ ତାରିଖରେ ଅପହରଣକାରୀ ପରିବାର ଲୋକଙ୍କୁ ଲକ୍ଷେ ଟଙ୍କା ଦାବି କରିଥିଲେ। ଏ ନେଇ ପରିବାର ପକ୍ଷରୁ ଥାନାରେ ୮ ତାରିଖରେ ଏତଲା ଦିଆଯାଇଥିଲା। ପରିବାର ଲୋକେ ଏତଲା ଦେବା ସହ ବିଭିନ୍ନ ଆଡେ ଖୋଜାଖୋଜି କରିଥିଲେ। ଏବେ ଫୋନ ନଂ. ୬୩୭୧୫୮୩୭୧୪ରୁ କେହି ଅଜଣା ବ୍ୟକ୍ତି ନିଜକୁ ପୁରୀ ଜିଲା ପିପିଲି ଅଞ୍ଚଳର କହିବା ସହ କେତେବେଳେ ଆନ୍ଧ୍ରପ୍ରଦେଶର ବିଶାଖାପାଟଣା ଅଞ୍ଚଳର ବୋଲି କହୁଥିବା ନାବାଳିକାଙ୍କ ବାପା ଅଭିଯୋଗ କରିଛନ୍ତି। ଏହି ଅଜଣା ବ୍ୟକ୍ତି ଜଣକ ଲକ୍ଷେ ଟଙ୍କା ଦାବି କରିଛନ୍ତି। ଟଙ୍କା ନ ଦେଲେ ଝିଅକୁ ପାଇବା ସ୍ବପ୍ନ ବୋଲି ବାରମ୍ବାର ପରିବାର ଲୋକଙ୍କୁ ଧମକ ଦେଇ ଆସୁଛନ୍ତି। ନିଜ ଝିଅର ଜୀବନ ବିପଦରେ ଥିବା ବାପା ଆଶଙ୍କା କରିଛନ୍ତି। ସମ୍ପୃକ୍ତ ନାବାଳିକା ଛାତ୍ରୀଙ୍କ ପରିବାର ଆଶା ଓ ଆଶଙ୍କାରେ ଥିବାବେଳେ ଝିଅର ଜୀବନ ପ୍ରତି ବିପଦ ଥିବା ଜାଣି ଭାଙ୍ଗି ପଡିଛନ୍ତି। ଅଭିଯୋଗ ପାଇବା ପରେ ଥାନା ଅଧିକାରୀ ଅନ୍ତର୍ଯ୍ୟାମୀ ବିଶ୍ୱାଳ ଅପହୃତା ନାବାଳିକା ଛାତ୍ରୀଙ୍କ ଉଦ୍ଧାର କରିବା ପାଇଁ ବିଭିନ୍ନ ସ୍ଥାନରେ ଚଢାଉ ଜାରି ରଖିଥିବା କହିଛନ୍ତି।
