ନୂଆଦିଲ୍ଲୀ, ୧୪।୩: ଆଇପିଏଲ ୨୦୨୬ ପାଇଁ ସମସ୍ତ ଦଳ ନିଜର ପ୍ରସ୍ତୁତି ଜୋରଦାର କରିଛନ୍ତି। କେଉଁଠି ନୂଆ ଜର୍ସି ଲଞ୍ଚ ହେଉଛି ତ କେଉଁଠି ଖେଳାଳିମାନେ ଅଭ୍ୟାସ କ୍ୟାମ୍ପରେ ପହଞ୍ଚୁଛନ୍ତି। କିନ୍ତୁ ଏହି ସବୁ ମଧ୍ୟରେ ଦିଲ୍ଲୀ କ୍ୟାପିଟାଲ୍ସ ଶିବିରରୁ ଏକ ବଡ଼ ଖବର ସାମ୍ନାକୁ ଆସିଛି। ଲିଗ ଆରମ୍ଭ ହେବାର ଠିକ ୧୪ ଦିନ ପୂର୍ବରୁ ଦଳର ମେଣ୍ଟର ତଥା ଇଂଲଣ୍ଡର ପୂର୍ବତନ କ୍ରିକେଟର କେଭିନ ପିଟରସନ ଦଳରୁ ବିଦାୟ ନେଇଛନ୍ତି।
ପିଟରସନ ଶନିବାର ସୋସିଆଲ ମିଡିଆରେ ଏକ ପୋଷ୍ଟ କରି ଏହି ଘୋଷଣା କରିଛନ୍ତି। ବିଶେଷ କଥା ହେଉଛି ସେ ହିନ୍ଦୀରେ ପୋଷ୍ଟ ଲେଖି ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛନ୍ତି। ପିଟରସନ କହିଛନ୍ତି ଯେ, ଏହି କାମ ପାଇଁ ଯେତିକି ସମୟ ଆବଶ୍ୟକ, ସେ ଚଳିତ ସିଜନ୍ରେ ସେତିକି ସମୟ ଦେଇପାରିବେ ନାହିଁ। ତେବେ ସେ ଆଇପିଏଲ ସମୟରେ ମଇଦାନରେ ମେଣ୍ଟର ଭାବେ ନୁହେଁ, ବରଂ କମେଣ୍ଟ୍ରି ବକ୍ସରେ ସେ ନଜର ଆସିବେ।
ପିଟରସନ ନିଜ ପୋଷ୍ଟରେ ଲେଖିଛନ୍ତ, “ମୁଁ ଚଳିତ ଆଇପିଏଲ ସିଜନ୍ରେ ଦିଲ୍ଲୀ କ୍ୟାପିଟାଲ୍ସ ପାଇଁ ମେଣ୍ଟର ହୋଇପାରିବି ନାହିଁ। କାମ ପାଇଁ ଆବଶ୍ୟକ ସମୟ ମୁଁ ଦେଇପାରୁ ନାହିଁ। ସମସ୍ତ ଖେଳାଳିଙ୍କୁ ଶୁଭକାମନା। କିନ୍ତୁ ମୁଁ ଆପଣମାନଙ୍କୁ କମେଣ୍ଟ୍ରି ବକ୍ସରେ ଭେଟିବି! ଆଇପିଏଲ ବିଶ୍ୱର ସବୁଠାରୁ ଭଲ ଲିଗ୍ ଏବଂ ମୁଁ ଆପଣ ସମସ୍ତଙ୍କୁ ଦେଖିବାକୁ ଅପେକ୍ଷା କରିଛି।”
🚨 समाचार 🚨
मैं आईपीएल के इस सीजन में दिल्ली कैपिटल्स के लिए मेंटर नहीं बन सकता।
मैं उस समय के लिए प्रतिबद्ध नहीं हो सकता, जो काम की आवश्यकता है।
सभी खिलाड़ियों को इस सीजन के लिए शुभकामनाएं! ❤️
हालांकि मैं आपको कॉम बॉक्स में वापस देखूंगा! आईपीएल दुनिया की सबसे अच्छी लीग है…
— Kevin Pietersen🦏 (@KP24) March 14, 2026
ଗତ ବର୍ଷ ପିଟରସନ ଦିଲ୍ଲୀ ସହ ମେଣ୍ଟର ଭାବେ ଯୋଡ଼ି ହୋଇଥିଲେ। ଦଳ ଭଲ ଆରମ୍ଭ କରିଥିଲେ ମଧ୍ୟ ଶେଷ ଆଡ଼କୁ ଫର୍ମ ହରାଇଥିଲା। ମାତ୍ର ୧ ପଏଣ୍ଟ ପାଇଁ ଦଳ ପ୍ଲେ-ଅଫ୍ରୁ ବାଦ ପଡ଼ିଥିଲା ଏବଂ ୧୫ ପଏଣ୍ଟ ସହ ପଞ୍ଚମ ସ୍ଥାନରେ ରହିଥିଲା।
ଚଳିତ ବର୍ଷ ହେଡ କୋଚ ହେମାଙ୍ଗ ବଦାନୀଙ୍କ ନେତୃତ୍ୱରେ ଦଳ ଟାଇଟଲ ଜିତିବା ଲକ୍ଷ୍ୟରେ ମଇଦାନକୁ ଓହ୍ଲାଇବ। ୧ ଏପ୍ରିଲରେ ପ୍ରଥମ ମ୍ୟାଚ ଲକ୍ଷ୍ନୌ ସୁପର ଜାଏଣ୍ଟସ ବିପକ୍ଷରେ ଖେଳିବ। ୪ ଏପ୍ରିଲରେ ଦଳ ମୁମ୍ବାଇ ଇଣ୍ଡିଆନ୍ସ ବିପକ୍ଷରେ (ହୋମ ଗ୍ରାଉଣ୍ଡ)ରେ ଖେଳିବ। ସେହିଭଳି ୮ ଏପ୍ରିଲରେ ଗୁଜରାଟ ଟାଇଟନ୍ସ ବିପକ୍ଷରେ ଏବଂ ୧୧ ଏପ୍ରିଲରେ ଚେନ୍ନାଇ ସୁପର କିଙ୍ଗସ ବିପକ୍ଷରେ ମ୍ୟାଚ୍ ରହିଛି।
