ଗଞ୍ଜାମ,୧୦।୮ (ବିଦ୍ୟାଧର ସାହୁ ): ଗଞ୍ଜାମ ବ୍ଲକ ଅନ୍ତର୍ଗତ କାଇଁଚ ପୁର ପଞ୍ଚାୟତ ମାଳୀ ଜଗନ୍ନାଥ ପୁର ନିକଟସ୍ଥ ବାବା ବାଲୀ ଲୋକନାଥ, ପାଳିବନ୍ଧ ପଞ୍ଚାୟତ କଣ୍ଟିଆଗଡ଼ ସ୍ଥିତ ବାବା ବଟେଶ୍ୱର ଏବଂ ହୁମା ପଞ୍ଚାୟତ ବୋରିଗାଁ ସ୍ଥିତ ବାବା ଝାଡେଶ୍ୱର ଓ ମକେରେଶ୍ୱର ଶୈବ ପୀଠରେ ହଜାର ହଜାର କାଉଡିଆଙ୍କ ଜଳାଭିଷେକ ଦେଖିବାକୁ ମିଳିଥିଲା। ଜିଲା ଓ ଜିଲା ବାହାରୁ ବହୁ ଭକ୍ତ ପ୍ରଥମେ ଦାମୋଦର ପୁର ଗ୍ରାମ ନିକଟସ୍ଥ ଋଷିକୂଲ୍ୟା ନଦୀ ଘାଟରୁ ପାଣିଭାର ଧରି ଗଞ୍ଜାମ ସହର ଦେଇ ବିଭିନ୍ନ ଶୈବ ପୀଠ ଅଭିମୁଖେ ବାହାରିଥିଲେ । ସେଠାରେ ରାତ୍ରିଯାପନ ପରେ ସକାଳୁ ଜଳ ଢାଳିଥିଲେ। ସମସ୍ତ ପୀଠ ଗୁଡିକରେ ଲମ୍ବା ଲାଇନରେ କାଉଡିଆମାନେ ଶିବଙ୍କ ମସ୍ତକରେ ଜଳ ଢାଳି ମାନସିକ ପୂର୍ଣ୍ଣ କରିଥିଲେ। କାଉଡିଆମାନଙ୍କ ନିମନ୍ତେ ମନ୍ଦିର ପରିଚାଳନା କମିଟି ପକ୍ଷରୁ ବ୍ୟାପକ ବନ୍ଦୋବସ୍ତ କରାଯାଇଥିଲା l କେଉଁଠି ମାଗଣା ଅର୍ଣ୍ଣ ପ୍ରସାଦ ତ କେଉଁଠି ଜଳଖିଆ ଆଦି ବ୍ୟବସ୍ଥା କରାଯାଇଥିଲା l କାଉଡିଆଙ୍କ ଜଟିଆ ବାବା ପାର କରେଗା,ବୋଲ ବମ ହରହର ବମରେ ପ୍ରକମ୍ପିତ ହୋଇଥିଲା ସହର । ଆଉ ଦୁଇଟି ସୋମବାରରେ ମଧ୍ୟ ଜଳ ଭାର ଧରି ଆସୁଥିବା କାଉଡିଆମାନଙ୍କ ପାଇଁ ସମସ୍ତ ସୁବିଧା ସହଯୋଗ ଯୋଗାଇ ଦିଆଯିବ ବୋଲି ବାଲୀ ଲୋକନାଥ ମନ୍ଦିର ପରିଚାଳନା କମିଟି ସଭାପତି ବି ବନମାଳୀ, ବଟେଶ୍ୱର ଐତିହ୍ୟ ସଂରକ୍ଷଣ ପରିଚାଳନା କମିଟି କାର୍ଯ୍ୟକାରୀ ସଭାପତି ଶିବ ପ୍ରସାଦ ସ୍ବାଇଁ ଓ ଝାଡେଶ୍ୱର ମନ୍ଦିର ପରିଚାଳନା କମିଟି ସଭାପତି କୃଷ୍ଣ ଚନ୍ଦ୍ର ପଲେଇ ଗଣମାଧ୍ୟମକୁ ସୂଚନା ଦେଇଛନ୍ତି l
