ନୂଆଦିଲ୍ଲୀ, ୮ା୮ (ପି.ଟି.)- ଭାରତୀୟ ପୁରୁଷ ହକି ଦଳର ଅଧିନାୟକ ମନପ୍ରୀତ ସିଂ ଓ ଅନ୍ୟ ୩ଜଣ ଖେଳାଳି କରୋନା ପଜିଟିଭ୍ ବୋଲି ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ) ତରଫରୁ ଶୁକ୍ରବାର ସୂଚନା ଦିଆଯାଇଛି। ବେଙ୍ଗାଲୁରୁରେ ଏକ ଜାତୀୟ କ୍ୟାମ୍ପ ପୂର୍ବରୁ ଖେଳାଳିମାନଙ୍କର କୋଭିଡ୍-୧୯ ଟେଷ୍ଟ ହୋଇଥିଲା। ମନପ୍ରୀତଙ୍କ ବ୍ୟତୀତ ମହାମାରୀ ଭୂତାଣୁ ଦ୍ୱାରା ସଂକ୍ରମିତ ହୋଇଥିବା ଅନ୍ୟ ଖେଳାଳିମାନେ ହେଲେ ଡିଫେଣ୍ଡର ସୁରେନ୍ଦର କୁମାର, ଜସକରନ ସିଂ, ଡ୍ରାଗ୍ ଫ୍ଲିକର ବରୁଣ କୁମାର ଏବଂ କ୍ରିଷନ ବାହାଦୁର ପାଠକ। ମନପ୍ରୀତ କହିଛନ୍ତି, ସେ ସାଇ କ୍ୟାମ୍ପସ୍ରେ ସେଲ୍ଫ କ୍ୱାରାଣ୍ଟାଇନ୍ରେ ଥିଲେ। ପରିସ୍ଥିତିକୁ ସାଇ କର୍ତ୍ତୃପକ୍ଷ ଯେପରି ଭାବେ ହାତେଇଲେ ସେଥିରେ ସେ ଖୁସି। ଖୁବ୍ଶୀଘ୍ର ସୁସ୍ଥ ହେବେ ବୋଲି ସେ ଆଶା ପ୍ରକାଶ କରି କହିଛନ୍ତି। ମାସେ ଛୁଟି ପରେ ବେଙ୍ଗାଲୁରୁସ୍ଥିତ ଜାତୀୟ ହକି କ୍ୟାମ୍ପକୁ ଫେରିବା ପରେ ଖେଳାଳିମାନଙ୍କର କୋଭିଡ୍ ଟେଷ୍ଟ ହୋଇଥିଲା। ପୂର୍ବରୁ ଭାଇରସ୍ ସଂକ୍ରମଣକୁ ରୋକିବା ଉଦ୍ଦେଶ୍ୟରେ ଦେଶବ୍ୟାପୀ ଲକ୍ଡାଉନ୍ ଲାଗୁ କରାଯିବାରୁ ଖେଳାଳିମାନେ ବେଙ୍ଗାଲୁରୁ ସାଇ ସେଣ୍ଟରରେ ଦୁଇମାସରୁ ଅଧିକ ସମୟ ଧରି ଅଟକି ରହିଥିଲେ। ସାଇ ତରଫରୁ ସେଣ୍ଟରରେ ଟ୍ରେନିଂ ଆରମ୍ଭ ପୂର୍ବରୁ ଖେଳାଳିମାନଙ୍କ ଲାଗି କ୍ୱାରାଣ୍ଟାଇନ୍ ବାଧ୍ୟତାମୂଳକ କରାଯାଇଛି। କରୋନାରେ ସଂକ୍ରମିତ ଏହି ସମସ୍ତ ଖେଳାଳି ନିଜ ଘରୁ ବେଙ୍ଗାଲୁରୁ ଅଭିମୁଖେ ଯାତ୍ରା ସମୟରେ ଭାଇରସ୍ ଦ୍ୱାରା ସଂକ୍ରମିତ ହୋଇଥିବା ସନ୍ଦେହ କରାଯାଉଛି।
କ୍ୟାମ୍ପ୍କୁ ଫେରିବା ବେଳେ ସେମାନଙ୍କର ପ୍ରଥମେ କୋଭିଡ୍-୧୯ ରାପିଡ୍ ଟେଷ୍ଟ ହୋଇଥାଏ। ରାପିଡ୍ ଟେଷ୍ଟରେ ଏହି ସମସ୍ତ ୫ ଜଣ ଖେଳାଳିଙ୍କର ନେଗେଟିଭ୍ ଆସିଥିଲା। କିନ୍ତୁ ମନପ୍ରୀତ ଓ ସୁରେନ୍ଦରଙ୍କଠାରେ କୋଭିଡ୍-୧୯ର କିଛି ଲକ୍ଷଣ ଦେଖିବାକୁ ମଳିଥିଲା। ସେମାନେ ଅନ୍ୟ ଯେଉଁ ୧୦ ଜଣ ଖେଳାଳିଙ୍କ ସହ ମିଳିତ ଭାବେ ଯାତ୍ରା କରିଥିଲେ ସେମାନଙ୍କର ଗୁରୁବାର କ୍ୱାଣ୍ଟିଟେଟିଭ୍ ଆରଟି-ପିସିଆର୍ ଟେଷ୍ଟ ହୋଇଥିଲା। ସେମାନଙ୍କ ମଧ୍ୟରୁ ଉକ୍ତ ୫ଜଣଙ୍କର ପଜିଟିଭ ଆସିଥିଲା। ଟେଷ୍ଟ ଫଳାଫଳ ଯଦିଓ ଏପର୍ଯ୍ୟନ୍ତ ସାଇକୁ ହସ୍ତାନ୍ତର କରାଯାଇ ନାହିଁ ରାଜ୍ୟ ସରକାର କିନ୍ତୁ ସାଇ କର୍ତ୍ତୃପକ୍ଷଙ୍କୁ ଫଳାଫଳ ଜଣାଇ ଦିଆଯାଇ ଥିବା ସାଇ ପକ୍ଷରୁ କୁହାଯାଇଛି। ପୁନଶ୍ଚ ଅନ୍ୟ କେତେଜଣ ଖେଳାଳିଙ୍କ ଟେଷ୍ଟ ଫଳାଫଳକୁ ଅପେକ୍ଷା କରାଯାଇଥିବା କୁହାଯାଉଛି। ସୂଚନାଯୋଗ୍ୟ, ମନପ୍ରୀତଙ୍କ ସମେତ ଯେଉଁ ସମସ୍ତ ଖେଳାଳି କ୍ୟାମ୍ପରେ ରିପୋର୍ଟ କରିଥିଲେ, ସ୍ବାସ୍ଥ୍ୟ ମନ୍ତ୍ରଣାଳୟ ଗାଇଡ୍ ଲାଇନ୍ ଅନୁସାରେ ସେମାନଙ୍କୁ ବାଧ୍ୟତାମୂଳକ ଭାବେ କ୍ୱାରାଣ୍ଟାଇନ୍ରେ ରହିବାକୁ ପଡ଼ିଥିଲା। କ୍ୱାରାଣ୍ଟାଇନ୍ରେ ରହିଥିବା ଖେଳାଳିମାନଙ୍କୁ ଯେଉଁମାନେ ପୂର୍ବରୁ କ୍ୟାମ୍ପରେ ଉପସ୍ଥିତ ଥିଲେ ସେମାନଙ୍କ ସହିତ କଥାବାର୍ତ୍ତା ପାଇଁ ମନା ଥିଲା। କ୍ୟାମ୍ପସରେ ରାଜ୍ୟ ସରକାର ଏବଂ ସାଇ ତରଫରୁ ଜାରି କରାଯାଇଥିବା ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର (ଏସ୍ଓପି) କଡ଼ାକଡ଼ି ଭାବେ ପାଳନ କରାଯାଉଛି।
