ବେଙ୍ଗାଲୁରୁ,୧୧।୫: କର୍ନାଟକ ବିଧାନସଭା ପାଇଁ ଭୋଟ ଗ୍ରହଣ ବୁଧବାର ଶେଷ ହୋଇଛି। ଏହାପରେ ଏକଜିଟ ପୋଲର ଫଳାଫଳ ଯାହା ଆସିଛି ସେଥିରେ କଂଗ୍ରେସ କର୍ନାଟକରେ ସରକାର ଗଠନ କରିପାରେ ବୋଲି ଅନୁମାନ କରାଯାଉଛି। ହେଲେ ନିର୍ବାଚନର ଅସଲ ଫଳାଫଳ ମେ’ ୧୩ରେ ଆସିବ। କଂଗ୍ରେସ ଏବେଠାରୁ ତା’ର ବିଜୟ ପକ୍କା ବୋଲି ଧରି ନେଇଛି। ଏପଟେ ଭାରତୀୟ ଜନତା ପାର୍ଟି(ଭାଜପା)ଏହି ଏକଜିଟ ପୋଲକୁ ମିଛ ବୋଲି କହିବା ସହ ଫଳାଫଳ ଦିନ ଏହା ଓଲଟି ଯିବ ବୋଲି ଦାବି କରିଛି।
ଭାଜପା ନେତା ଅମିତ ମାଲବିୟ ଏକଜିଟ ପୋଲ ପରେ ସମସ୍ତ କଂଗ୍ରେସ ନେତା ଓ ପ୍ରବକ୍ତାଙ୍କ ବୟାନ ପରେ ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି, ମତଦାନ ପ୍ରତିଶତରେ ନା ଗ୍ରାଉଣ୍ଡ ଜିରୋରେ ଏମିତି କିଛି ଦେଖିବାକୁ ମିଳିନାହିଁ ଯେ କଂଗ୍ରେସ ଏତେବଡ ବିଜୟ ହାସଲ କରିବ। ସେଥିପାଇଁ ଏବେ ଶାନ୍ତ ରୁହନ୍ତୁ ଓ ୧୩ ତାରିଖର ଫଳାଫଳକୁ ଅପେକ୍ଷା ରଖନ୍ତୁ।
ମାଲବିୟ ଆହୁରି ମଧ୍ୟ କହିଛନ୍ତି, ଏହା କେବଳ ଏକଜିଟ ପୋଲ ଏହାକୁ ଏକ ଚେତାବନୀ ଭାବେ ଧରି ନିଅନ୍ତୁ ଏହା ଭୁଲ ବି ହୋଇପାରେ। ସେ କହିଛନ୍ତି ପରିଣାମ ଓଲଟିବା ସ୍ଥିତିରେ ଆମ୍ବୁଲାନ୍ସ ପ୍ରସ୍ତୁତ ରଖିଥାଆନ୍ତୁ, ଯାହାର ବହୁତ ସମ୍ଭାବନା ରହିଛି।
ସୂଚନାଯୋଗ୍ୟ, କର୍ନାଟକ ବିଧାନସଭାକୁ ନେଇ ବିଭିନ୍ନ ନ୍ୟୁଜ ଚ୍ୟାନେଲର ଏକଜିଟ ପୋଲରେ କଂଗ୍ରେସର ସରକାର ଗଠନ ହେବ ବୋଲି ଦେଖାଯାଇଛି। ମୋଟ ୮ଟି ପୋଲରୁ ୭ଟିରେ କଂଗ୍ରେସ ବିଜୟୀ ହେବ ବୋଲି କୁହାଯାଇଛି। ଏହାସହ ୩ଟି ପୋଲ କଂଗ୍ରେସକୁ ପୂର୍ଣ୍ଣ ବହୁମତ ଦେଇଛି।
