ଢେଙ୍କାନାଳ ଅଫିସ,୧୦ା୫: ଢେଙ୍କାନାଳ ଜିଲା ତଥା ରାଜ୍ୟର ପ୍ରସିଦ୍ଧ ଶୈବପୀଠ କପିଳାସରେ ବ୍ୟାପକ ଅବ୍ୟବସ୍ଥାକୁ ନେଇ ସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ଦେବୋତ୍ତର ବିଭାଗ ପକ୍ଷରୁ ପୀଠକୁ ଯିବା ପାଇଁ ପାହାଚ ରାସ୍ତା ନିକଟରେ ଶ୍ରଦ୍ଧାଳୁମାନଙ୍କ ନିମନ୍ତେ ନିର୍ମିିତ ଶୌଚାଳୟ ବହୁଦିନ ଧରି ବ୍ୟବହାର ନ ହୋଇ ପଡିବା ପରେ ଚଳିତବର୍ଷ ଜଣେ ବ୍ୟକ୍ତିଙ୍କୁ ଏହା ନିଲାମ ପ୍ରଦାନ କରାଯାଇଥିଲା। ଫଳରେ ବର୍ତ୍ତମାନ ଉକ୍ତ ଶୌଚାଳୟଟି ଏକ ଲଜ୍ରେ ପରିଣତ ହୋଇଥିବା ଅଭିଯୋଗ ହୋଇଛି। ଶୌଚାଳୟର ପ୍ୟାନ ଓ ପାଣି ପାଇପ୍ ସିଷ୍ଟମକୁ ବନ୍ଦ କରି ଏହାକୁ ହୋଟେଲ ଭଳି ବ୍ୟବହାର କରାଯିବା ସହିତ ଏଠାରେ ଅନୈତିକ କାର୍ଯ୍ୟ ହେଉଥିବା ଅଭିଯୋଗ ହୋଇଛି। ସେହିପରି କପିଳାସ ଛକଠାରେ ଏକ ଫାଣ୍ଡି ଥିଲେ ମଧ୍ୟ ଏଥିପ୍ରତି କୌଣସି ଦୃଷ୍ଟି ପ୍ରଦାନ କରାଯାଉନାହିଁ। ଏହି ଘଟଣାର ବିଧିବଦ୍ଧ ତଦନ୍ତ ଦାବି କରିଛନ୍ତି ପୂର୍ବତନ ବିଧାୟକ ନବୀନ ନନ୍ଦ।
ପୂର୍ବତନ ବିଧାୟକ ନନ୍ଦ କହିଛନ୍ତି, ଠାକୁରଙ୍କ ପାଇଁ ଅର୍ଥର ଏତେ ଅଭାବ ପଡ଼ିଲା ଯେ ଶୌଚାଳୟକୁ ମଧ୍ୟ ନିଲାମ କରିବାକୁ ପଡୁଛି। ରାଜ୍ୟ ଏବଂ ଦେଶରେ ଥିବା ତୀର୍ଥସ୍ଥଳୀଗୁଡ଼ିକରେ କେଉଁଠି ହେଲେ ଶୌଚାଳୟକୁ ବ୍ୟବସାୟ ଭିତ୍ତିରେ ନିଲାମ ଦିଆଯାଇନାହିଁ। ଏଥିସହିତ ଶ୍ରଦ୍ଧାଳୁମାନଙ୍କ ପାଇଁ ଉଦ୍ଦିଷ୍ଟ ବିଶ୍ରାମାଗାରକୁ ମଧ୍ୟ ନିଲାମ ଦିଆଯାଇ ହୋଟେଲ କରି ବ୍ୟବହାର କରାଯାଉଛି। ରାଜ୍ୟ ସରକାରଙ୍କ ପକ୍ଷରୁ ପୀଠର ଉନ୍ନତୀକରଣ ପାଇଁ ବହୁ କୋଟି ଟଙ୍କା ଆସୁଥିବା ବେଳେ ଏହା ଶ୍ରଦ୍ଧାଳୁଙ୍କ କାମରେ ଆସୁନାହିଁ। ଗତ ଦୁଇବର୍ଷ ତଳେ ମୁଖ୍ୟମନ୍ତ୍ରୀଙ୍କ ସ୍ବତନ୍ତ୍ର ପାଣ୍ଠିରୁ ୫୦ ଲକ୍ଷ ଟଙ୍କା ବ୍ୟୟରେ ଯାତ୍ରୀମାନଙ୍କ ବିଶ୍ରାମ ଓ ସୁବିଧା ପାଇଁ କପିଳାସ ପୀଠର ପାଦଦେଶରେ ଏକ ବିଶ୍ରାମ ଗୃହ ନିର୍ମିତ ହୋଇଥିଲା। କିନ୍ତୁ ଏହା ଯାତ୍ରୀଙ୍କ ସୁବିଧାରେ ନ ଲାଗି ସେଠାରେ ପୋଲିସ ଫାଣ୍ଡି ଖୋଲାଯାଇଛି। ଜିଲା ପ୍ରଶାସନ ଏ ସଂକ୍ରାନ୍ତରେ ବିଧିବଦ୍ଧ ତଦନ୍ତ କରି ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ପୂର୍ବତନ ବିଧାୟକ ଓ ଅଞ୍ଚଳବାସୀ ଦାବି କରିଛନ୍ତି। ଏ ସଂକ୍ରାନ୍ତରେ ଜିଲା ଦେବୋତ୍ତର ଅଧିକାରୀ ତଥା ଢେଙ୍କାନାଳ ଉପଜିଲାପାଳ ସ୍ନିଗ୍ଧାରାଣୀ ଧଳ କହିଛନ୍ତି, ଅଭିଯୋଗ ସମ୍ପର୍କରେ ଖବର ମିଳିଛି। ବୁଧବାର ଅତିରିକ୍ତ ଦେବୋତ୍ତର ଅଧିକାରୀଙ୍କୁ ଘଟଣାସ୍ଥଳକୁ ପଠାଇ ସତ୍ୟାସତ୍ୟ ଜାଣିବା ପରେ ପଦକ୍ଷେପ ଗ୍ରହଣ କରାଯିବ।
