ଭୋପାଳ,୧୮।୨: ମଧ୍ୟପ୍ରଦେଶ ରାଜନୀତିରେ ଅଶାନ୍ତି ଲାଗି ରହିଛି। ଏହାର କାରଣ ହେଉଛି ରାଜ୍ୟର ପୂର୍ବତନ ମୁଖ୍ୟମନ୍ତ୍ରୀ କମଲ ନାଥ ଏବଂ ତାଙ୍କ ପୁଅ ଏମ୍ପି ନକୁଲ ନାଥ। ପ୍ରାୟ ଏକ ସପ୍ତାହ ଧରି ମଧ୍ୟପ୍ରଦେଶରୁ ଦିଲ୍ଲୀ ପର୍ଯ୍ୟନ୍ତ ରାଜନୈତିକ ସର୍କଲରେ ଚର୍ଚ୍ଚା ଚାଲିଛି ଯେ ବରିଷ୍ଠ କଂଗ୍ରେସ ନେତା କମଲ ନାଥ ଏବଂ ତାଙ୍କ ପୁଅ ଭାରତୀୟ ଜନତା ପାର୍ଟିରେ ଯୋଗଦେବାକୁ ଯାଉଛନ୍ତି। ଏଥିସହ ଭାଜପା, କଂଗ୍ରେସ ଏବଂ ଶିବସେନା (ୟୁବିଟି) ର ନେତାଙ୍କ ଠାରୁ ମଧ୍ୟ ଅନେକ ବିବୃତ୍ତି ଆସିଛି।
କିନ୍ତୁ ସେପଟେ କମଲ ନାଥ ରବିବାର ଦିଲ୍ଲୀରେ ନିଜର ପ୍ରତିକ୍ରିୟା ଦେଇଛନ୍ତି। ଭାଜପାରେ ଯୋଗଦେବା ନେଇ କଳ୍ପନା ଜଳ୍ପନାର ବିଷୟ ମଧ୍ୟପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ତଥା କଂଗ୍ରେସ ନେତା କମଲ ନାଥ ଗଣମାଧ୍ୟମକୁ କହିଛନ୍ତି, ମୁଁ ଗତକାଲି କହିଥିଲି ଯେ ଯଦି ଏପରି କିଛି ଘଟେ, ତେବେ ମୁଁ ତୁମ ସମସ୍ତଙ୍କୁ କହିବି। ମୁଁ କାହା ସହିତ କଥାବାର୍ତ୍ତା କରି ନାହିଁ। ଆଜି ବି ତାହା ହିଁ କହୁଛି। ମୁଁ ଭାଜପାରେ ଯୋଗଦେବା ନେଇ କୌଣସି ନେତାଙ୍କ ସହ କଥା ହୋଇନାହିଁ।
