କୃଷ୍ଣପ୍ରସାଦ,୧।୫ (କୈଳାଶ ଚନ୍ଦ୍ର ପଟନାୟକ ): ପୁରୀ ଜିଲା କୃଷ୍ଣପ୍ରସାଦ ବ୍ଲକରେ କାଳ ରାତ୍ରିରେ କାଳ ସାଜିଲା କାଳବୈଶାଖୀ। ମଧ୍ୟ ରାତ୍ରରେ ପ୍ରଚଣ୍ଡ ଶବ୍ଦ କରି ବଜ୍ରାଘାତ ସାଙ୍ଗକୁ ଖୁବ୍ ଜୋର୍ରେ ଝଡତୋଫାନ ହୋଇଥିଲା। ରାତ୍ରୀ ୧୦ ଟାରୁ ଝିପି ଝିପି ବର୍ଷା, ବିଜୁଳି,ପବନ ଲୋକଙ୍କ ଆଖିରୁ ନିଦ ହଜାଇ ଦେଇଥିବା ବେଳେ ମଧ୍ୟ ରାତ୍ରିରେ ତାଣ୍ଡବ ରଚିଛି। ମାଲୁଦରୁ କୃଷ୍ଣପ୍ରସାଦ, ଏବଂ ମାଲୁଦରୁ ମୋରଡା ଦେଇ ଜହ୍ନିକୁଦା ଯାଏ ରାସ୍ତାରେ ବଡ ବଡ ଗଛ ଭାଙ୍ଗି ପଡିଛି । ଯାହା ଫାଇଲିନ ବାତ୍ୟାକୁ ମନେ ପକାଇଦେଇଛି। ବର୍ତ୍ତମାନ ବ୍ଲକ ମୁଖ୍ୟ କାର୍ଯ୍ୟାଳୟ, ଏବଂ ଜିଲା ମୁଖ୍ୟ କାର୍ଯ୍ୟାଳୟ ପୁରୀ ଯାତାୟାତ ରାସ୍ତା ଠପ୍ ହୋଇଯାଇଛି। ସେହିଭଳି ବାଲୁଗାଁ ଠାରୁ କୃଷ୍ଣପ୍ରସାଦ ଯାତାୟାତ କରୁଥିବା ଲଞ୍ଚ ବନ୍ଦ ହୋଇଥିବା ବେଳେ ସାତପଡ଼ା ଜହ୍ନିକୁଦାକୁ ଯାତାୟାତ କରୁଥିବା ଭସାପୋଲ ଚଳାଚଳକୁ ବନ୍ଦ କରାଯାଇଛି। ଯାହାଦ୍ୱାରା କୃଷ୍ଣପ୍ରସାଦ ଅଂଚଳବାସୀ ବାହ୍ୟଜଗତ ଯାତାୟାତରୁ ବିଚ୍ଛିନ୍ନ ହୋଇଛି। ସେହିଭଳି କୃଷ୍ଣପ୍ରସାଦ ବ୍ଲକ ବୁଦ୍ଧିବର ଗ୍ରାମ ପଞ୍ଚାୟତ ପ୍ରଧାନଗାଁରେ ଏକ ବିରାଟକାୟ ବର ଗଛ ଉପୁଡି ଗୋଟିଏ ଛାତ ଘର, ଚାଳ ଛପର ଘର, ଗୋଟିଏ କ୍ୟାଭିନ ଭାଙ୍ଗି ପଡିଛି। ବଜ୍ରାଘାତ ଯୋଗୁ ପ୍ରଧାନଗାଁର ଗୋଟିଏ ଛାତ ଘର କାନ୍ଥ ଭାଙ୍ଗି ଯାଇଥିବା ଜଣାଯାଇଛି। ଖବରପାଇ କୃଷ୍ଣପ୍ରସାଦ ଥାନା ଆରକ୍ଷୀ ନିରୀକ୍ଷକ ବିଚିତ୍ରାନନ୍ଦ ପ୍ରଧାନ ଘଟଣାସ୍ଥଳରେ ପହଞ୍ଚି ଅଗ୍ନିଶମ ବିଭାଗକୁ ଖବର ଦେଇଥିଲେ। ପୋଲିସର ଏଭଳି କାର୍ଯ୍ୟ କୁ ଜନସାଧାରଣରେ ପ୍ରଶଂସା କରାଯାଇଛି। ଖବରପାଇ ମାଲୁଦ ଅଗ୍ନିଶମ ବିଭାଗ ମୁଖ୍ୟ ଅଗ୍ନିକ ଦିବ୍ୟ ସୁନ୍ଦର କୁଅଁରଙ୍କ ନିର୍ଦ୍ଦେଶରେ , ଅଗ୍ନିକ ଜୟନ୍ତ ଥାଟୋଇ, ଅଗ୍ନିକ ଭୀମସେନ ସେଠୀ, ଅଗ୍ନିକ ବନମାଳୀ ବେହେରା, ଅଗ୍ନିକ ଗୌର ପ୍ରସାଦ ଦଳେଇ,ଅଗ୍ନିକ ଏସକେ ନମନ ଘଟଣାସ୍ଥଳରେ ପହଞ୍ଚି ଗଛ କାଟି ଲୋକଙ୍କୁ ଉଦ୍ଧାର କରିଥିଲେ। ଗଛ ପଡି ପ୍ରଧାନ ଗାଁର ବଂଶୀଧର ପ୍ରଧାନ, ପ୍ରଭାତ କୁମାର ପ୍ରଧାନ, ମେଘନାଦ ପ୍ରଧାନ, ଆରତ ପ୍ରଧାନ ବିପିନ ପ୍ରଧାନଙ୍କ ଘର ଭାଙ୍ଗି ପଡ଼ିଥିବା ଜଣାଯାଇଛି। ତେବେ କ୍ଷତିପୂରଣ ଅଟକଳ ପାଇଁ ଏଯା ରାଜସ୍ବ ବିଭାଗର କୌଣସି କର୍ମଚାରୀ ପହଞ୍ଚି ନ ଥିବା ଜଣାପଡିଛି।
