ଗଜପତି,୧।୫(ଗିରିଧାରୀ ପରିଛା): ଗଜପତି ଜିଲାରେ ଶୁକ୍ରବାର କାଳବୈଶାଖୀ ପ୍ରକୋପ ଦେଖିବାକୁ ମିଳିଛି। କାଳବୈଶାଖୀ ପ୍ରଭାବରେ ଝଡ଼ ତୋଫାନ ସାଙ୍ଗକୁ ପ୍ରବଳ ବର୍ଷା ହୋଇଛି। ଫଳରେ ଗୋସାଣି ବ୍ଲକ ବାଘଶଳା ଗ୍ରାମଛକ ନିକଟରେ ଥିବା ଏକ ବିରାଟ ଉସ୍ତ ଗଛ ଦୋକାନ ଉପରେ ପଡିବାରୁ ଜଣଙ୍କର ମୃତ୍ୟୁ ହୋଇଥିବା ବେଳେ ଅନ୍ୟଜଣେ ଗୁରୁତର ଆହତ ହୋଇଛନ୍ତି।
ଗୁରୁବାର ବିଳମ୍ବିତ ରାତିରେ କାଳବୈଶାଖୀ ପ୍ରଭାବରେ ଅଞ୍ଚଳରେ ଝଡତୋଫାନ ହୋଇ ପ୍ରବଳ ବର୍ଷା ହୋଇଥିଲା। ସେହିପରି ଶୁକ୍ରବାର ସନ୍ଧ୍ୟାରେ ପୁଣି କାଳବୈଶାଖୀର ପ୍ରଭାବରେ ପବନ ସାଙ୍ଗକୁ ବର୍ଷା ଯୋଗୁ ବାଘଶାଳା ଗ୍ରାମରେ ଏକ ଗଛ ଉପୁଡି ଦୋକାନ ଉପରେ ପଡ଼ିଥିଲା। ଫଳରେ ଘଟଣାସ୍ଥଳରେ ଜଣଙ୍କର ମୃତ୍ୟୁ ହୋଇଥିବା ବେଳେ ଅନ୍ୟଜଣେ ଗୁରୁତର ହୋଇଥିଲେ। ଗୁରୁତରଙ୍କୁ ଉଦ୍ଧାର କରି ପାରଳାଖେମୁଣ୍ଡି ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ମୃତକ ହେଲେ ୟାଇ ମନ୍ମଥ ରାଓ ଏବଂ ଆହତ ଜଣକ ହେଲେ ୟାଇ ଶ୍ରୀନୁ ବୋଲି ଜଣାପଡ଼ିଛି।
ଅନ୍ୟପକ୍ଷେ ସ୍ଥାନୀୟ ଲୋକଙ୍କ ସହ ପାରଳାଖେମୁଣ୍ଡି ଅଗ୍ନିଶମ କର୍ମଚାରୀ ଘଟଣାସ୍ଥଳରେ ପହଞ୍ଚି ଗଛ କାଟି ଉଦ୍ଧାର କାର୍ଯ୍ୟ ଜାରି ରଖିଛନ୍ତି। ଆହତ ଜଣକ ଜିନିଷ କିଣିବା ପାଇଁ ଦୋକାନକୁ ଆସିଥିବା ବେଳେ ଏହି ଘଟଣା ଘଟିଥିଲା।
