ଦିଗପହଣ୍ଡି,୫|୬(ଅଶେଷ ନାଥ ମିଶ୍ର): ପ୍ରକୃତି ସଂରକ୍ଷଣ ଓ ପରିବେଶ ସୁରକ୍ଷା କ୍ଷେତ୍ରରେ ଦିଗପହଣ୍ଡି ବ୍ଳକର କଇଠଖଣ୍ଡି ପଞ୍ଚାୟତକୁ ପ୍ରକୃତି ମିତ୍ର ସମ୍ମାନରେ ସମ୍ମାନୀତ କରାଯିବା ସହ ପୁରସ୍କାର ପ୍ରଦାନ କରାଯାଇଛି । ଶୁକ୍ରବାର ବିଶ୍ବ ପରିବେଶ ଦିବସ ଅବସରରେ ଜଙ୍ଗଲ , ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗ ପକ୍ଷରୁ ଦିଗପହଣ୍ଡି ବ୍ଳକ ସ୍ତରରେ କଇଠଖଣ୍ଡି ପଞ୍ଚାୟତ ସର୍ବୋତ୍କୃଷ୍ଟ ବିବେଚିତ ହୋଇଥିବାରୁ ପ୍ରୋତ୍ସାହନ ରାଶି ସ୍ଵରୁପ ୨୦ ହଜାର ଟଙ୍କା ପୁରସ୍କାର ସହ ପ୍ରମାଣ ପତ୍ର ପ୍ରଦାନ କରାଯାଇଥିଲା । ସ୍ଥାନୀୟ ସରପଞ୍ଚ ମନୋରଞ୍ଜନ ଗୈାଡ ବ୍ରହ୍ମପୁର ବନଖଣ୍ଡ ଅଧିକାରୀଙ୍କ କାର୍ଯ୍ୟାଳୟରେ ପହଞ୍ଚି ଏହି ପୁରସ୍କାର ଗ୍ରହଣ କରିଥିବା ବେଳେ ତାଙ୍କୁ ବନ ବିଭାଗ ପକ୍ଷରୁ ସମ୍ବର୍ଦ୍ଧିତ କରାଯାଇଥିଲା । ବୃକ୍ଷକୁ ଭଲ ପାଉଥିବା ଏବଂ ବୃକ୍ଷକୁ ନିଜର ଜୀବନ ବୋଲି ଭାବୁଥିବା ସରପଞ୍ଚ ପ୍ରତ୍ୟେକ ବର୍ଷ ନିଜର ପଞ୍ଚାୟତ ସମେତ ଦିଗପହଣ୍ଡି ଆଖପାଖ ଅଞ୍ଚଳରେ ବହୁ ସଂଖ୍ୟକ ବୃକ୍ଷ ଚାରା ରୋପଣ କରି ଆସୁଛନ୍ତି । ତାଙ୍କର ଜନ୍ମଦିନ ହେଉ କିମ୍ବା ଭତ୍ତା ବଣ୍ଟନ ଏବଂ ସାମାଜିକ କାର୍ଯ୍ୟକ୍ରମରେ ପ୍ରତ୍ୟେକ ଲୋକଙ୍କୁ ବିଭିନ୍ନ କିସମର ବୃକ୍ଷ ଚାରା ବଣ୍ଟନ କରି ପରିବେଶର ସୁରକ୍ଷା ପାଇଁ ଲୋକଙ୍କୁ ସଚେତନତା କରାଇ ସେ ସମସ୍ତଙ୍କ ପ୍ରିୟ ଭାଜନ ହୋଇପାରିଛନ୍ତି । ତାଙ୍କର ଏହି ପ୍ରୟାସ ଆଗକୁ ମଧ୍ୟ ଜାରି ରହିବ ବୋଲି ପୁରସ୍କାର ଗ୍ରହଣ ପରେ ସରପଞ୍ଚ ତାଙ୍କ ପ୍ରତିକ୍ରିୟା ରେ କହିଛନ୍ତି। ଏହି ସଫଳତା ପାଇବା ପରେ ପଞ୍ଚାୟତ ବାସୀ ସରପଞ୍ଚଙ୍କୁ ପ୍ରଶଂସା କରିଥିବା ବେଳେ ତାଙ୍କୁ ବିଭିନ୍ନ ମହଲରୁ ଶୁଭେଚ୍ଛାର ସୁଅ ଛୁଟିଥିବା ଜଣାପଡିଛି । ସେହିପରି ଦିଗପହଣ୍ଡି ବ୍ଲକ ଓଡ଼ିଶା ଆଦର୍ଶ ବିଦ୍ୟାଳୟ ଅଧ୍ୟକ୍ଷ ଚିନ୍ତାମଣି ପଲାଇ ଏବଂ ସାନଖେମୁଣ୍ଡି ବ୍ଲକ ମହାନଳା ଗ୍ରାମର ଜଣେ ପ୍ରମୁଖ ଫୁଲ ଚାଷୀ କେ. ଶ୍ୟାମ ସୁନ୍ଦର ଦୋରା ଙ୍କୁ ପ୍ରକୃତି ବନ୍ଧୁ ପୁରସ୍କାର ମିଳିଛି । ଉଭୟଙ୍କୁ ବିଭିନ୍ନ ମହଲରୁ ଶୁଭେଚ୍ଛାର ସୁଅ ଛୁଟୁଛି।ସେହିପରି ଚୁଡୁଙ୍ଗପୁର ଗ୍ରାମ ସ୍ଥିତ ସାନଖେମୁଣ୍ଡି ହାଇସ୍କୁଲ କୁ ପ୍ରକୃତି ମିତ୍ର ପୁରସ୍କାର ମିଳିଥିବା ଜଣାପଡ଼ିଛି।
