ଭବାନୀପାଟଣା,୨୧ା୧୧(ଉତ୍ତମ କୁମାର ଦାଶ): କଳାହାଣ୍ଡି ଜିଲା ଜୁନାଗଡ଼ ବ୍ଲକ ତଳଜାରିଙ୍ଗ ପଞ୍ଚାୟତ ଲବଣିପୁର ମୌଜ଼ାର ବାଘବାଡ଼ିପଡ଼ାବାସୀ ୨୧ ବର୍ଷର ସଂଘର୍ଷ ପରେ ଶେଷରେ ଜଙ୍ଗଲ ଜମି ଶିରୋନାମା ପଟ୍ଟାରୁ ରାଜସ୍ବ ପଟ୍ଟା ପାଇଛନ୍ତି। ଏହାକୁ ନେଇ ସ୍ଥାନୀୟ ହିତାଧିକାରୀଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଛି। ପ୍ରକାଶ ଯେ, ବାଘବାଡ଼ିପଡାର ୨୨ ଜଣ ହିତାଧିକାରୀ ଜଙ୍ଗଲ ଅଧିକାର ଆଇନ -୨୦୨୫ ଅନୁଯାୟୀ ଶିରୋନାମା ପଟ୍ଟା ସ୍ବୀକୃତି ପାଇଥିଲେ। କିନ୍ତୁ ରାଜସ୍ବ ପଟ୍ଟା ହୋଇ ନ ଥିବାରୁ ଧାନ କିଣାବିକା କିମ୍ବା କୌଣସି ସରକାରୀ କାଗଜପତ୍ର, ପିଏମ୍ କିଷାନ ଓ ଅନ୍ୟାନ୍ୟ ସୁବିଧା ପାଇବାରୁ ବଞ୍ଚତ୍ତ ହେଉଥିଲେ। ରାଜ୍ୟ ସରକାରଙ୍କ ଅନୁସୂଚିତ ଜାତି ଓ ଜନଜାତି ବିଭାଗ ପତ୍ର (ଏସ୍ଟି/ଏସ୍ସି/ଏସ୍ଏସ୍ଡି ଏବଂ ଅନ୍ୟାନ୍ୟ ସଂଖ୍ୟା-୨୦୫୨୪ ଓ ସେହି ବିଭାଗର ପତ୍ର ସଂଖ୍ୟା-୦୦୩-୨୦୧୪/୨୬ା୧୦ା୨୦୨୧ରେ ସମସ୍ତ ଜିଲାପାଳଙ୍କୁ ଜଙ୍ଗଲ ଜମି ପାଇଥିବା ଶିରୋନାମା ପଟ୍ଟାକୁ ସଂଶୋଧନ କରି ଯଥାଶୀଘ୍ର ରାଜସ୍ବ ଜମିରେ ପରିବର୍ତ୍ତନ କରି ଦେବାକୁ ବିଭାଗୀୟ ସଚିବ ନିର୍ଦ୍ଦେଶ ଦେଇଥିଲେ। ତେବେ ସେତେବେଳେ ଥିବା କଳାହାଣ୍ଡି ଜିଲାପାଳ ଗାଭାଲି ପରାଗ ହର୍ଷଦ ମଧ୍ୟ ଜିଲାର ସମସ୍ତ ତହସିଲଦାର ଓ ଜିଲା ମଙ୍ଗଳ ଅଧିକାରୀ ଏ ସଂକ୍ରାନ୍ତରେ ପତ୍ର ସଂଖ୍ୟା -୩୨୬୬/ଏଫ୍ଆର୍ଏ -୧୨-୧୧-୨୦୧୮ ଜରିଆରେ ଏହା କାର୍ଯ୍ୟକାରୀ କରିବା ପାଇଁ ନିର୍ଦ୍ଦେଶ ଦେଇଥିଲେ। ହେଲେ ଏହା ପରେ ମଧ୍ୟ କାର୍ଯ୍ୟକାରୀ ହୋଇପାରୁ ନ ଥିଲା। ଏ ବିଷୟରେ ବାଘବାଡ଼ିପଡା ଗ୍ରାମବାସୀ ତଥା ଜ଼ଙ୍ଗଲ ଜମି ହିତାଧିକାରୀ ସ୍ଥାନୀୟ ଆଇନଜୀବୀ ସଞ୍ଜୀବ କୁମାର ଶତପଥିଙ୍କ ସାହାଯ୍ୟରେ ଗତ ଜାନୁୟାରୀ ୩, ୨୦୨୪ରେ କଳାହାଣ୍ଡି ଜିଲାପାଳ ଓ ଜୁନାଗଡ଼ ତହସିଲଦାରଙ୍କୁ ସମସ୍ତ ନଥିପତ୍ର ଦେଖାଇବା ସହ ରାଜସ୍ବ ପଟ୍ଟା ପାଇଁ ଦାବି କରିଥିଲେ। ଏହାର ୨୧ ମାସ ପରେ ମଙ୍ଗଳବାର ଜୁନାଗଡ଼ ତହସିଲ କାର୍ଯ୍ୟାଳୟରେ ବାଘବାଡ଼ିପଡାର ୨୨ ଜଣ ହିତାଧିକାରୀଙ୍କୁ ରାଜସ୍ବ ପଟ୍ଟା ବଣ୍ଟନ କରାଯାଇଥିଲା। ଜୁନାଗଡ଼ ତହସିଲଦାର ବିରୁପାକ୍ଷ ନନ୍ଦ, ଏଫ୍ଆର୍ଏ ସଂଯୋଜିକା ମଧୁମିତା ମହାନ୍ତି ଓ କମ୍ପ୍ୟୁଟର ସହଯୋଗୀ ହରିଶ ତପନ ଚଣ୍ଡୀ ପ୍ରମୁଖ ଉପସ୍ଥିତ ରହି ଏହା ବଣ୍ଟନ କରିଥିଲେ। ଏହି ସମୟରେ ସ୍ଥାନୀୟ ଗ୍ରାମର ଜଙ୍ଗଲ ଅଧିକାର କମିଟି ସଭାପତି ଯାଦବ ଖାଡ଼ିଆ ଓ ସମ୍ପାଦକ ମିଶ୍ର ଖାଡ଼ିଆ ତଥା ଆଦିବାସୀ ନେତା, ସାମାଜିକ କର୍ମୀ ଗୌରୀ ଶଙ୍କର ପାତ୍ର, ଗଣେଶ ପଧାନ ପ୍ରମୁଖ ଉପସ୍ଥିତ ଥିଲେ।
