ଭବାନୀପାଟଣା,୨୧।୧(ସ୍ବ.ପ୍ର.): କଳାହାଣ୍ଡି ଜିଲା ଜୁନାଗଡ ସହର କଲମପୁର ଛକରେ ଥିବା ଏସ୍ବିଆଇ ମୁଖ୍ୟ ଶାଖା ଏବେ ଅବ୍ୟବସ୍ଥାରେ ଚାଲିଥିବା ଦେଖିବାକୁ ମିଳିଛି। ଫଳରେ ଏହି ବ୍ୟାଙ୍କ ଉପରେ ନିର୍ଭର କରୁଥିବା ହଜାର ହଜାର ହିତାଧିକାରୀ, ଗ୍ରାହକ ଏବେ ନାହଁି ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏଠାରେ ବ୍ୟାଙ୍କ ଖାତା ଖୋଲିବା ପାଇଁ ନିୟୋଜିତ ହୋଇଥିବା କର୍ମଚାରୀ (କିରାଣି) ଏବେ କେସ୍ ଅଫିସର ଦାୟିତ୍ୱରେ ଥିବା ଓ ବ୍ୟାଙ୍କ ପରିଚାଳକ ଛୁଟିରେ ଥିବାରୁ ଗତ କିଛି ଦିନ ହେଲା ନୂତନ ବ୍ୟାଙ୍କ ଖାତା ଖୋଲା ଯାଇପାରୁ ନ ଥିବା ଅଭିଯୋଗ ହୋଇଛି। ଫଳରେ ଏହି ବ୍ୟାଙ୍କକୁ ଖାତା ଖୋଲିବାକୁ ଆସୁଥିବା ହିତାଧିକାରୀମାନେ ଖାତା ଖୋଲି ନ ପାରି ନିରାଶ ହୋଇ ଘରକୁ ଫେରୁଛନ୍ତି। ଯଦି କେହି ଖାତା ଖୋଲିବା ଜରୁରୀ ଅଛି କହିଲେ ଏସବିଆଇର ଅନ୍ୟ ବ୍ରାଞ୍ଚରେ ଯାଇ ଖାତା ଖୋଲନ୍ତୁ ବୋଲି କୁହାଯାଉଛି। ଅନ୍ୟପକ୍ଷରେ ଟଙ୍କା ଉଠାଇବାକୁ ଆସୁଥିବା ହିତାଧିକାରୀମାନଙ୍କୁ ଘଣ୍ଟା ଘଣ୍ଟା ଧରି କାଉଣ୍ଟର ଆଗରେ ଛିଡା ହେବାକୁ ପଡୁଛି। ଯଦି ୫୦ ହଜାରରୁ ଅଧିକ ଟଙ୍କା ଗ୍ରାହକ ଉଠାଇଛନ୍ତି ତାହାହେଲେ ଉକ୍ତ କାଉଣ୍ଟରରେ ଏଣ୍ଟ୍ରି କରି ସାରିଲା ପରେ ପୁଣି ଅନ୍ୟ କାଉଣ୍ଟରକୁ ଯାଇ ପାସ୍ କରି ଆଣିଲେ ତାପରେ ଯାଇ ଟଙ୍କା ମିଳୁଛି। ସେହିପରି ଏଠାରେ ନିୟୋଜିତ ଥିବା ସୁରକ୍ଷା କର୍ମୀମାନେ କୌଣିସ ଅବ୍ୟବସ୍ଥାକୁ ନେଇ ଯଦି କେହି ଗ୍ରାହକ ଅଭିଯୋଗ କଲେ ଓଲଟି ଗ୍ରାହକଙ୍କୁ ସେମାନେ ନିତୀବାଣୀ ଶୁଣାଉଛନ୍ତି। ଏଠାରେ କର୍ମଚାରୀ ଅଭାବ ଥିବା ସତ୍ତ୍ୱେ ମଧ୍ୟ ଏଠାକାର ଶାଖା ପରିଚାଳକ (ବିଏମ୍)ଙ୍କ ସମେତ ୩ କର୍ମଚାରୀ ଛୁଟିରେ ରହିଥିବା ଜଣାପଡିଛି। ଏପରି ଅବ୍ୟବସ୍ଥା ସାଙ୍ଗକୁ ଓ କାର୍ଯ୍ୟରତ କର୍ମଚାରୀଙ୍କ ଉତ୍ତମ ବ୍ୟବହାର ମିଳୁ ନ ଥିବାରୁ ଗ୍ରାହକ ଏବେ ଏସବିଆଇ ପ୍ରତି ଇଚ୍ଛା ଥିଲେ ମଧ୍ୟ ମୁହଁ ମୋଡି ବାଧ୍ୟ ହୋଇ ଅନ୍ୟ ବେସକାରୀ ବ୍ୟାଙ୍କକୁ ଯାଇ ଖାତା ଖୋଲି କାରବାର କରୁଛନ୍ତି। ଏ ନେଇ ସ୍ଥାନୀୟ ଶାଖା ପରିଚାଳକ (ବିଏମ) ମହେନ୍ଦ୍ର ଶବରଙ୍କୁ ପଚାରିବାରୁ ଏମିତି ଏକା ସିଷ୍ଟମ ଚାଲିଛି ବୋଲି କହିଥିଲେ। ଏଥିପ୍ରତି ଉଚ୍ଚକର୍ତ୍ତୃପକ୍ଷ ଦୃଷ୍ଟଦେଇ ପଦକ୍ଷେପ ନେବାକୁ ସାଧାରଣରେ ଦାବି ହୋଇଛି।
