ନୂଆଦିଲ୍ଲୀ,୧୯।୪(ପି.ଟି.): ସମଲିଙ୍ଗୀ ବିବାହକୁ ଆଇନଗତ ବୈଧତା ପ୍ରଦାନ ଲାଗି ହୋଇଥିବା ଆବେଦନଗୁଡ଼ିକର ଶୁଣାଣ ସୁପ୍ରିମକୋର୍ଟଙ୍କ ୫ ଜଣିଆ ସାମ୍ବିଧାନିକ ପୀଠରେ ମଙ୍ଗଳବାର ଆରମ୍ଭ ହୋଇଛି। ତେବେ ବିବାହ ସମ୍ପର୍କିତ ପର୍ସନାଲ ଲ’ ଆଧାରରେ ଉକ୍ତ ଆବେଦନର ବିଚାର କରାଯିବ ନାହିଁ ବୋଲି ସର୍ବୋଚ୍ଚ ଅଦାଲତ ସ୍ପଷ୍ଟ କରିଦେଇଛନ୍ତି। ସ୍ବତନ୍ତ୍ର ବିବାହ ଆଇନ ଉପରେ ଯୁକ୍ତି ଉପସ୍ଥାପନ କରିବା ଲାଗି ଆଇନଜୀବୀମାନଙ୍କୁ ଅଦାଲତ ପରାମର୍ଶ ଦେଇଛନ୍ତି। ଭାରତର ପ୍ରଧାନ ବିଚାରପତି ଡି.ଓ୍ବାଇ. ଚନ୍ଦ୍ରଚୂଡ଼ଙ୍କ ଅଧ୍ୟକ୍ଷତାରେ ସାମ୍ବିଧାନିକ ପୀଠ ଆବେଦନକୁ ଏକ ଜଟିଳ ପ୍ରସଙ୍ଗ ଭାବେ ଅଭିହିତ କରି କହିଛନ୍ତି, ସ୍ବତନ୍ତ୍ର ବିବାହ ଆଇନରେ ରହିଥିବା ପୁରୁଷ ଓ ମହିଳା ଧାରଣା ସମ୍ପୂର୍ଣ୍ଣ ପ୍ରଜନନ ଅଙ୍ଗ ଆଧାରିତ ନୁହେଁ। ସାମ୍ବିଧାନିକ ପୀଠର ଅନ୍ୟ ବିଚାରପତିମାନେ ହେଲେ ଜଷ୍ଟିସ୍ ଏସ୍.କେ. କୌଲ, ଏସ୍.ଆର୍. ଭଟ୍ଟ, ହିମା କୋହଲି ଏବଂ ପି.ଏସ୍. ନରସିଂହ।
ଯଦି ସମଲିଙ୍ଗୀ ବିବାହକୁ ସର୍ବୋଚ୍ଚ ଅଦାଲତ ବୈଧ ବୋଲି ରାୟ ଦିଅନ୍ତି, ତେବେ ହିନ୍ଦୁ ବିବାହ ଆଇନ ଏବଂ ଅନ୍ୟ ଧର୍ମୀୟ ସମ୍ପ୍ରଦାୟଗୁଡ଼ିକ ପାଇଁ ରହିଥିବା ପର୍ସନାଲ ଲ’ ପାଇଁ ସମସ୍ୟା ତଥା ଜଟିଳ ଓ ଅବାଞ୍ଛିତ ପରିଣାମ ସୃଷ୍ଟି ହେବ। ସେଥିପାଇଁ ପର୍ସନାଲ ଲ’କୁ ବାଦ୍ ଦେଇ ଆଇନଜୀବୀମାନେ ସ୍ବତନ୍ତ୍ର ବିବାହ ଆଇନ (ଧର୍ମ ଆଧାରିତ ହୋଇ ନ ଥିବା ବିବାହ ଆଇନ) ଆଧାରରେ ଯୁକ୍ତି ଉପସ୍ଥାପନ କରିବା ପାଇଁ ସାମ୍ବିଧାନିକ ପୀଠ ପରାମର୍ଶ ଦେଇଥିଲେ। ସ୍ବତନ୍ତ୍ର ବିବାହ ଆଇନ, ୧୯୫୪ ହେଉଛି ଭିନ୍ନ ଧର୍ମ କିମ୍ବା ଜାତିର ବ୍ୟକ୍ତିମାନଙ୍କୁ ବିବାହ ବନ୍ଧନରେ ଆବଦ୍ଧ ହେବା ଲାଗି ଉଦ୍ଦିଷ୍ଟ ଆଇନ।
କେନ୍ଦ୍ର ସରକାରଙ୍କ ପକ୍ଷରୁ ସଲିସିଟର ଜେନେରାଲ ତୁଷାର ମେହେଟ୍ଟା ଟ୍ରାନ୍ସଜେଣ୍ଡର ଅଧିକାର ଅଧିନିୟମ ପ୍ରସଙ୍ଗ ଉଠାଇଥିଲେ, ଯେଉଁଥିରେ ଯୋଡ଼ି ଚୟନ କରିବା ଅଧିକାର, ବ୍ୟକ୍ତିଗତ ଗୋପନୀୟତା ଅଧିକାର ଆଦି ରହିଛି। ସେମାନଙ୍କ ପ୍ରତି ଭେଦଭାବକୁ ଆପରାଧିକ ମାମଲା ଭାବେ ବିଚାର କରାଯାଇଥାଏ। ଅଦାଲତଙ୍କ ନିଷ୍ପତ୍ତି ମାଧ୍ୟମରେ ବିବାହକୁ ସାମାଜିକ-ଆଇନଗତ ମାନ୍ୟତା ପ୍ରଦାନ କରାଯାଇ ପାରିବ ନାହିଁ। ଏପରିକି ବ୍ୟବସ୍ଥାପିକା ଦ୍ୱାରା ନୁହେଁ। ଏହା ସମାଜ ଦ୍ୱାରା ଗ୍ରହଣୀୟ ହେବା ଆବଶ୍ୟକ ବୋଲି ସଲିସିଟର ଜେନେରାଲ କହିଥିଲେ। ଜଣେ ବ୍ୟକ୍ତି ହିନ୍ଦୁ ଥାଇ ସମଲିଙ୍ଗୀରେ ବିବାହ ଅଧିକାର ଉପଲବ୍ଧ କରିବାକୁ ଚାହିଁଲେ ସମସ୍ୟା ଉପୁଜିବ। ଏହା ଦ୍ୱାରା ହିନ୍ଦୁ, ମୁସଲମାନ ଏବଂ ଅନ୍ୟ ସମ୍ପ୍ରଦାୟ ପ୍ରଭାବିତ ହେବେ। ସେଥିପାଇଁ ରାଜ୍ୟଗୁଡ଼ିକର ଯୁକ୍ତିକୁ ଅଦାଲତ ଶୁଣିବା ଆବଶ୍ୟକ ବୋଲି ମେହେଟ୍ଟା କହିଥିଲେ। ଏହାର ଜବାବରେ ସାମ୍ବିଧାନିକ ପୀଠ କହିଥିଲେ, ଆମେ ପର୍ସନାଲ ଲ’କୁ ଯାଉ ନାହୁଁ। ଆମକୁ ଉକ୍ତ ଆଇନକୁ ଯିବା ଲାଗି କାହିଁକି କୁହାଯାଉଛି। ଏହାର ନିଷ୍ପତ୍ତି କିପରି ନିଆଯିବ, ତାହା ଆପଣ କହିପାରିବେ ନାହିଁ। ସବୁକିଛି ଶୁଣିବାକୁ ଆମେ ବାଧ୍ୟ ନୋହୁଁ ବୋଲି ଅଦାଲତ କହିଥିଲେ।
