ଦିଗପହଣ୍ଡି,୯ା୭(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକର ଉସ୍ତପଲିରେ ହଇଜା ଆକ୍ରାନ୍ତରେ ୨ ଜଣଙ୍କ ମୃତ୍ୟୁ ଅଭିଯୋଗ ପରେ ବିଭିନ୍ନ ହୋଟେଲ ଓ ରାସ୍ତାକଡ଼ ଫାଷ୍ଟଫୁଡ୍ ଦୋକାନଗୁଡ଼ିରେ ଖାଦ୍ୟର ମାନ ଯାଞ୍ଚ କରିବା ନେଇ ସ୍ବାସ୍ଥ୍ୟ ପ୍ରଶାସନର ଚେତା ପଶିଛି।
ଦିଗପହଣ୍ଡି ଏନ୍ଏସି ଅନ୍ତର୍ଗତ ବିଭିନ୍ନ ଉଠା ଦୋକାନୀ ଓ ହୋଟେଲଗୁଡିକରେ ଅପମିଶ୍ରିତ ତଥା ରଙ୍ଗ ବୋଳା ଖାଦ୍ୟ ବିକ୍ରି, ବିକ୍ରୟ ଅନୁମତି ନଥାଇ ବ୍ୟବସାୟ ଚଳାଉଥିବା ଏବଂ ଅନୁପଯୁକ୍ତ ପରିବେଶରେ ଖାଦ୍ୟ ପଦାର୍ଥ ବିକ୍ରି କରୁଥିବା ଦୋକାନଗୁଡ଼ିକ ଉପରେ ଏହି ଚଢ଼ାଉ କରାଯାଇଛି। ସହରର ବିଭିନ୍ନ ସ୍ଥାନରେ ଥିବା ବେଆଇନ ଦେଶୀ ମଦ ଦୋକାନଗୁଡ଼ିକୁ ବନ୍ଦ କରି ଦିଆଯିବା ସହ ଖିଲାପକାରୀ କେତେକ ହୋଟେଲକୁ ମଧ୍ୟ ବନ୍ଦ କରି ଦିଆଯାଇଛି। ଚଢ଼ାଉ ସମୟରେ ବେଆଇନ ଭାବେ ଅପମିଶ୍ରିତ ଖାଦ୍ୟ ଦ୍ରବ୍ୟ ବିକ୍ରି ଚଳାଇଥିବା ବିଭିନ୍ନ ବ୍ୟବସାୟ ପ୍ରତିଷ୍ଠାନଗୁଡ଼ିକରୁ ପ୍ରାୟ ୩୫ ହଜାର ଟଙ୍କା ଜରିମାନା ଆଦାୟ କରାଯାଇଛି। ଖାଦ୍ୟ ସାମଗ୍ରୀ ବିକ୍ରି ସମୟରେ ଲୋକଙ୍କୁ ସ୍ବଚ୍ଛ ପରିବେଶରେ ଏବଂ ବିଶୁଦ୍ଧ ପାନୀୟଜଳ ଯୋଗାଇବା ପାଇଁ ହୋଟେଲ ମାଲିକମାନଙ୍କୁ ନିର୍ଦ୍ଦେଶ ଦିଆଯାଇଛି। ଏହି ଚଢ଼ାଉ ସମୟରେ ଖାଦ୍ୟ ସୁରକ୍ଷା ଓ ଗୁଣବତ୍ତା ବିଭାଗର ଯାଞ୍ଚ ଅଧିକାରୀ ଚିନ୍ମୟ ପାଢ଼ୀଙ୍କ ସମେତ ଦିଗପହଣ୍ଡି ଏନ୍ଏସି କାର୍ଯ୍ୟ ନିର୍ବାହୀ ଅଧିକାରୀ ଅବିନାଶ ମିଶ୍ର, କର୍ମଚାରୀ ହରିକୃଷ୍ଣ ସାହୁ, ବାଳକୃଷ୍ଣ ପାଣିଗ୍ରାହୀ, ସନ୍ତୋଷ କୁମାର ପାଢ଼ୀ, ସତ୍ୟନାରାୟଣ ଦାସ ପ୍ରମୁଖ ସାମିଲ ଥିଲେ।
