ଦୁବାଇ,୧୫।୬: ଆଇସିସି ଦ୍ୱାରା ପ୍ରକାଶିତ ର଼୍ୟାଙ୍କିଙ୍ଗରେ ଇଂଲଣ୍ଡର ଜୋ ରୁଟ ଟେଷ୍ଟରେ ନମ୍ବର ୧ ବ୍ୟାଟ୍ସମ୍ୟାନ ହୋଇଛନ୍ତି। ସେ ନ୍ୟୁଜିଲାଣ୍ଡ ବିପକ୍ଷ ଦ୍ୱିତୀୟ ଟେଷ୍ଟରେ ୧୭୬ର ଏକ ପାଳି ଖେଳିଥିଲେ। ଗତ ବର୍ଷ ଡିସେମ୍ବରରୁ ଅଷ୍ଟ୍ରେଲିଆର ମାର୍ନସ ଲାବୁସେନ୍ ନମ୍ବର -୧ରେ ରହିଥିଲେ। ଏବେ ସେ ଦୁଇ ନମ୍ବରରେ ପହଞ୍ଚିଛନ୍ତି। ୩୧ ବର୍ଷୀୟ ଜୋ ରୁଟ୍ ମୋଟ ୮୯୭ ପଏଣ୍ଟ ପାଇଛନ୍ତି। ମାର୍ନସଙ୍କର ୮୯୨ ପଏଣ୍ଟ ଅଛି। ଟପ-୧୦ ବିଷୟରେ କହିବାକୁ ଗଲେ, ଅନ୍ୟ କାହାର କିଛି ପରିବର୍ତ୍ତନ ହୋଇନାହିଁ। ୮୪୫ ପଏଣ୍ଟ ସହ ଅଷ୍ଟ୍ରେଲିଆର ଷ୍ଟିଭ ସ୍ମିଥ ତୃତୀୟ, ପାକିସ୍ତାନର ଅଧିନାୟକ ବାବର ଆଜମ ୮୧୫ ପଏଣ୍ଟ ସହ ଚତୁର୍ଥ ଏବଂ ନ୍ୟୁଜିଲାଣ୍ଡର ଅଧିନାୟକ କେନ ୱିଲିୟମସନ ୭୯୮ ପଏଣ୍ଟ ସହ ପଞ୍ଚମ ସ୍ଥାନରେ ଅଛନ୍ତି।
ଶ୍ରୀଲଙ୍କାର ଟେଷ୍ଟ ଅଧିନାୟକ ଡିମୁଥ କରୁଣାତ୍ନେ ୭୭୨ ପଏଣ୍ଟ ସହ ଷଷ୍ଠ ସ୍ଥାନରେ ଅଛନ୍ତି, ଅଷ୍ଟ୍ରେଲିଆର ଉସମାନ ଖ୍ବାଜା ୭୫୭ ପଏଣ୍ଟ ସହ ୭ ତମ ସ୍ଥାନରେ ଅଛନ୍ତି, ଭାରତୀୟ ଅଧିନାୟକ ରୋହିତ ଶର୍ମା ୭୫୪ ପଏଣ୍ଟ ସହ ଅଷ୍ଟମ ସ୍ଥାନରେ ଅଛନ୍ତି, ଅଷ୍ଟ୍ରେଲିଆର ଟ୍ରାଭିସ ହେଡ ୭୪୪ ପଏଣ୍ଟ ସହ ୯ମ ସ୍ଥାନରେ ଅଛନ୍ତି ଏବଂ ବିରାଟ କୋହଲି ୭୪୨ ପଏଣ୍ଟ ସହ ୧୦ତମ ସ୍ଥାନରେ ଅଛନ୍ତି।
ସେହିପରି ବୋଲିରେ ୯୦୧ ପଏଣ୍ଟ ସହ ଅଷ୍ଟ୍ରେଲିଆର ଦ୍ରୁତ ବୋଲର ପ୍ୟାଟ କମିନ୍ସ ପ୍ରଥମ ଏବଂ ୮୫୦ ପଏଣ୍ଟ ସହ ଆର ଅଶ୍ୱିନ ଦ୍ୱିତୀୟ ସ୍ଥାନରେ ରହିଛନ୍ତି। ଭାରତୀୟ ଦ୍ରୁତ ବୋଲର ଜସପ୍ରୀତ ବୁମ୍ରା ତୃତୀୟ ସ୍ଥାନକୁ ଉନ୍ନୀତ ହୋଇଛନ୍ତି। ତାଙ୍କର ୮୩୦ ପଏଣ୍ଟ ଅଛି। ଚତୁର୍ଥ ସ୍ଥାନରେ ପାକିସ୍ତାନର ଶାହିନ ଆଫ୍ରିଦି ଅଛନ୍ତି।
