ଓ୍ବାଶିଂଟନ,୭।୧୧-ଆମେରିକାର ୪୬ତମ ରାଷ୍ଟ୍ରପତି ଭାବେ ଡେମୋକ୍ରାଟିକ୍ ପାର୍ଟି ପ୍ରାର୍ଥୀ ଜୋ ବାଇଡେନ୍ ଶନିବାର ବିଜୟୀ ହୋଇଛନ୍ତି। ସେ ରିପବ୍ଲିକାନ ପାର୍ଟି ନେତା ତଥା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କୁ ପରାସ୍ତ କରି ମହାମାରୀ ଓ ସାମାଜିକ ତଥା ଅର୍ଥନୈତିକ ଦୁଃସ୍ଥିତି ସମୟରେ ଦେଶର ନେତୃତ୍ୱ ନେବାକୁ ଯାଉଛନ୍ତି।
ନିର୍ବାଚନ ଶେଷ ହେବାର ତିନିଦିନ ଅନିଶ୍ଚିତତା ପରେ ଫଳାଫଳ ସ୍ପଷ୍ଟ ହୋଇଛି। ସମୁଦାୟ ୫୩୮ ଇଲେକ୍ଟୋରାଲ କଲେଜ ଭୋଟ ମଧ୍ୟରୁ ଶନିବାର ଭାରତୀୟ ସମୟ ରାତି ୧୧ଟା ସୁଦ୍ଧା ଗଣତି ସରିଥିବା ୪୮୭ ଇଲେକ୍ଟୋରାଲ କଲେଜ ଭୋଟ ମଧ୍ୟରୁ ବାଇଡେନ୍ଙ୍କୁ ୨୭୩ ମିିଳିଥିବାବେଳେ ଟ୍ରମ୍ପ୍ଙ୍କୁ ୨୧୪ରେ ସନ୍ତୁଷ୍ଟ ହେବାକୁ ପଡ଼ିଛି। ସେଠାରେ କୁହୁକ ନମ୍ବର ୨୭୦। ପେନ୍ସିଲଭାନିଆରୁ ବିଜୟୀ ହେବା ପରେ ବାଇଡେନଙ୍କ ସପକ୍ଷରେ ୨୭୩ ଭୋଟ ମିଳିଛି। ୭୭ ବର୍ଷୀୟ ବାଇଡେନ ଅଧିକ ୪୦ ଲକ୍ଷରୁ ପପୁଲାର ଭୋଟ ପାଇଥିବାବେଳେ ବାଲଟ ଗଣନା ଜାରି ରହିଥିବାରୁ ଏହି ସଂଖ୍ୟା ବଢ଼ିପାରେ ବୋଲି ଜଣାପଡିଛି। ଅନ୍ୟପକ୍ଷରେ ଭୋଟ ଗଣତିରେ ଜାଲିଆତି ହୋଇଥିବା ମିଥ୍ୟା ଅଭିଯୋଗ କରି ଟ୍ରମ୍ପ୍ କେତେକ ରାଜ୍ୟରେ ଗଣତି ପ୍ରକ୍ରିୟାକୁ ବିଳମ୍ବ କରିଥିଲେ। କିନ୍ତୁ ବାଇଡେନ୍ ଉତ୍ତେଜନାକୁ ହ୍ରାସ କରିବା ପାଇଁ ଉଦ୍ୟମ କରିବା ସହ ଦେଶବ୍ୟାପୀ ଦେଖାଦେଇଥିବା ବିଶୃଙ୍ଖଳାକୁ ପ୍ରଶମିତ କରିବାରେ ସଫଳ ହୋଇଛନ୍ତି। ବିଜୟୀ ପ୍ରାର୍ଥୀ ଭାବେ ଶନିବାର ତାଙ୍କୁ ଦର୍ଶାଯିବା ପରେ ଦେଶର ରାଜନୀତିର ଉଦ୍ଦେଶ୍ୟକୁ ବୁଝିବା ଦରକାର ବୋଲି ସେ କହିଛନ୍ତି। ପ୍ରତ୍ୟେକ ନାଗରିକଙ୍କୁ ନ୍ୟାୟ ଦେବା ସହ ଦେଖାଦେଉଥିବା ସମସ୍ୟାକୁ ସମାଧାନ କରିବା ପାଇଁ ବାଇଡେନ୍ ଆହ୍ବାନ ଦେଇଛନ୍ତି।
ଆମେରିକା ନିର୍ବାଚନରେ ଚଳିତ ଥର ଆଉ ଏକ ଇତିହାସ ସୃଷ୍ଟି ହୋଇଛି। ପ୍ରଥମ ଅଣଶ୍ୱେତାଙ୍ଗ ତଥା ଭାରତୀୟ ବଂଶୋଦ୍ଭବ ମହିଳା ଭାବେ କମଲା ହାରିସ୍ ଉପରାଷ୍ଟ୍ରପତି ନିର୍ବାଚିତ ହୋଇଛନ୍ତି। ହିଲାରୀ କ୍ଲିଣ୍ଟନଙ୍କୁ ପରାସ୍ତ କରି ଟ୍ରମ୍ପ୍ ରାଷ୍ଟ୍ରପତି ହେବାର ୪ ବର୍ଷ ପରେ କାଲିଫର୍ନିଆ ସିନେଟର କମଲା ସରକାରରେ ସର୍ବୋଚ୍ଚ ପଦବୀରେ ଆସୀନ ହେବାରେ ନିଜର ସ୍ଥିତି ଜାହିର କରିଛନ୍ତି। ୧୯୯୨ରେ ରିପବ୍ଲିକାନ୍ ଏଚ୍.ଡବ୍ଲ୍ୟୁ. ବୁଶ୍ଙ୍କ ପରେ ରାଷ୍ଟ୍ରପତି ଥାଇ ପୁନଃନିର୍ବାଚନ ହାରିବାରେ ଟ୍ରମ୍ପ୍ ପ୍ରଥମ ବ୍ୟକ୍ତି ବୋଲି କୁହାଯାଉଛି।
