ବେଜିଂ, ୧୧।୫ : ଚାଇନାର ରାଷ୍ଟ୍ରପତି ଶି ଜିନପିଙ୍ଗ ଏକ ବିପଜ୍ଜନକ ମସ୍ତିଷ୍କ ରୋଗରେ ପୀଡିତ ହୋଇଛନ୍ତି। ଗଣମାଧ୍ୟମ ରିପୋର୍ଟରେ ଦର୍ଶାଯାଇଛି ଯେ ଜିନପିଙ୍ଗ ବର୍ତ୍ତମାନ ମସ୍ତିଷ୍କର ଗୁରୁତର ରୋଗରେ ପୀଡିତ ଅଛନ୍ତି। ତାଙ୍କୁ ସେରିବ୍ରାଲ ଆନେୱରାଜାଇମ ହୋଇଥିବା କୁହାଯାଉଛି।
ଏହି ରୋଗରୁ ମୁକ୍ତି ପାଇବା ପାଇଁ ଡାକ୍ତରମାନେ ଅସ୍ତ୍ରୋପଚାର କରିବାକୁ ପରାମର୍ଶ ଦେଇଥିଲେ, କିନ୍ତୁ ଜିନପିଙ୍ଗ କେବଳ ଚାଇନାର ପାରମ୍ପାରିକ ଔଷଧ ସହିତ ତାଙ୍କର ଚିକିତ୍ସା କରୁଛନ୍ତି। ରିପୋର୍ଟ ଅନୁଯାୟୀ, ରାଷ୍ଟ୍ରପତି ଜିନପିଙ୍ଗ ଗତ କିଛି ମାସ ହେବ ଏହି ରୋଗରେ ପୀଡିତ ଥିଲେ।
ଏହି କାରଣରୁ ତାଙ୍କୁ ଡିସେମ୍ବର ୨୦୨୧ରେ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଜିନପିଙ୍ଗଙ୍କ ସ୍ବାସ୍ଥ୍ୟ ଖରାପ ଖବର ଅନେକ ଥର ସାମ୍ନାକୁ ଆସିଛି। ତାଙ୍କ ସ୍ବାସ୍ଥ୍ୟକୁ ନେଇ ପୂର୍ବରୁ କଳ୍ପନାଜଳ୍ପନା ଚାଲିଛି। ଯେତେବେଳେ ବେଜିଂରେ ଶୀତକାଳୀନ ଅଲିମ୍ପିକ୍ସ ପର୍ଯ୍ୟନ୍ତ ରାଷ୍ଟ୍ରପତି କୌଣସି ବିଦେଶୀ ନେତାଙ୍କ ସହ ସାକ୍ଷାତ କରିବାକୁ ମନା କରିଦେଲେ ସେତେବେଳେ ଚର୍ଚ୍ଚା ଅଧିକ ହୋଇଥିଲା।
ଏହାପୂର୍ବରୁ ମାର୍ଚ୍ଚ ୨୦୧୯ରେ, ଜିନପିଙ୍ଗଙ୍କ ଇଟାଲୀ ଗସ୍ତ ସମୟରେ ତାଙ୍କୁ ଚାଲିବାରେ ଅସୁବିଧା ହେଉଥିବାର ଦେଖିବାକୁ ମିଳିଥିଲା। ତାଙ୍କର ଚାଲିବାର ଶୈଳୀରେ କିଛି ତ୍ରୁଟି ଦେଖାଯାଉଥିଲା। ପରେ ଫ୍ରାନ୍ସ ଭ୍ରମଣ ସମୟରେ ସେ ଚାଲିବାରେ ଅସୁବିଧାର ସମ୍ମୁଖୀନ ହୋଇଥିଲେ। ସେହି ସମୟରେ, ବସିବା ପାଇଁ ସେ ଅନ୍ୟର ସହାୟତା ଆବଶ୍ୟକ କରୁଥିଲେ।
ଏହା ବ୍ୟତୀତ, ୨୦୨୦ରେ, ସେ ଶେନ୍ଝେନରେ ଏକ ରାଲିରେ ସମ୍ବୋଧିତ କରୁଥିବା ସମୟରେ ତାଙ୍କୁ ଲଗାତାର କାଶ ହେଉଥିବା ଦେଖିବାକୁ ମିଳିଥିଲା। ରାଲିରେ ସେ କମ ସ୍ବରରେ ଭାଷଣ ଦେଉଥିବାବେଳେ ବିଳମ୍ବରେ ମଞ୍ଚରେ ମଧ୍ୟ ପହଞ୍ଚିଥିଲେ। ଏସବୁ କାରଣ ତାଙ୍କର ଖରାପ ସ୍ବାସ୍ଥ୍ୟକୁ ସୂଚାଇ ଦେଉଛି। ମସ୍ତିଷ୍କରେ ଥିବା ଏକ ରକ୍ତବାହୀ ନଳୀ ଦୁର୍ବଳ ହେବାଯୋଗୁ ଗୋଟିଏ ପାର୍ଶ୍ୱ ବେଲୁନ ପରି ଫୁଲି ଯାଇଥାଏ। ଏହାକୁ ସେରିବ୍ରାଲ ଆନେୱରାଜାଇମ କୁହାଯାଏ।
ଏହି ରୋଗ ମସ୍ତିଷ୍କର ଯେକୌଣସି ଅଂଶରେ ହୋଇପାରେ। ଏହି ରୋଗ ଯେକୌଣସି ବୟସର ବ୍ୟକ୍ତିଙ୍କୁ ମଧ୍ୟ ହୋଇଥାଏ। ୫୦ ବର୍ଷରୁ ଅଧିକ ବୟସ୍କ ବ୍ୟକ୍ତିଙ୍କ ଠାରେ ଏଭଳି ସମସ୍ୟା ଦେଖାଯିବାର ଆଶଙ୍କା ଅଧିକ ରହିଥାଏ। ବିଶେଷକରି ଯେଉଁମାନଙ୍କର ଉଚ୍ଚ ରକ୍ତଚାପ, ଜେନେଟିକ ସ୍ନାୟୁ ଦୁର୍ବଳତା, ସଂକ୍ରମଣ, ଆଘାତ ଏବଂ ମସ୍ତିଷ୍କର କ୍ଷତି କିମ୍ବା ଟ୍ୟୁମର ଥାଏ ସେମାନେ ଏହି ସମସ୍ୟାରେ ଆକ୍ରାନ୍ତ ହେବାର ଅଧିକ ଆଶଙ୍କା ରହିଥାଏ।
