କେନ୍ଦୁଝର,୧୦।୧୧(ନରେଶ ଚନ୍ଦ୍ର ପଟ୍ଟନାୟକ): ଝାଡ଼ଖଣ୍ଡ ବିଧାନସଭା ନିର୍ବାଚନ ୨ଟି ପର୍ଯ୍ୟାୟରେ ହେବ। ଆସନ୍ତା ୧୩ ଓ ୨୦ତାରିଖରେ ଝାଡ଼ଖଣ୍ଡ ନିର୍ବାଚନ ପାଇଁ ଭୋଟ ଗ୍ରହଣ କରାଯିବ।
୧୩ ତାରିଖରେ ହେବାକୁ ଥିବା ୪୩ଟି ବିଧାନସଭା ଆସନରୁ ୧୪ଟି ଆସନରେ ଓଡ଼ିଆଙ୍କ ପ୍ରଭାବ ରହିଛି। ଏହି ଆସନ ପାଇଁ ଓଡ଼ିଆ ନେତାମାନେ ପ୍ରଚାର କରୁଥିବା ଦେଖିବାକୁ ମିଳିଛି। ମୁଖ୍ୟମନ୍ତ୍ରୀ ମୋହନ ମାଝୀଙ୍କଠାରୁ ଆରମ୍ଭ କରି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ବିଭିନ୍ନ ସମାବେଶରେ ସାମିଲ ହେଉଛନ୍ତି।
ଚକ୍ରଧରପୁର, ଚାଇଁବସା, ଜଗନ୍ନାଥପୁର, ଷଢ଼େଇକଳା, ମାଜଗାଁ, ମନୋହରପୁର, ଜାମସେଦପୁର(ପୂର୍ବ) ଓ ଜାମସେଦପୁର (ପଶ୍ଚିମ) ପ୍ରମୁଖ ବିଧାନସଭା ଅଞ୍ଚଳରେ କେନ୍ଦୁଝର ଜିଲାର ନେତା ଡେରା ପକାଇଥିବା ସୂଚନା ମିଳିଛି। ଜିଲାର ୨ ଭାଜପା ବିଧାୟକ ଅଖିଳ ନାୟକ ଏବଂ ଡ. ଫକିର ନାୟକଙ୍କ ସହ ପୂର୍ବତନ ଜିଲା ସଭାପତି ରାଧାକାନ୍ତ ମହାନ୍ତ ପ୍ରମୁଖ ବିଭିନ୍ନ ବିଧାନସଭା ଦାୟିତ୍ୱରେ ରହି ନିର୍ବାଚନ ପ୍ରଚାର କାର୍ଯ୍ୟରେ ସହଯୋଗ କରୁଛନ୍ତି।
ପୂର୍ବତନ ଜିଲା ସଭାପତି ମହାନ୍ତ ଜଗନ୍ନାଥପୁର ବିଧାନସଭା କ୍ଷେତ୍ରର ପ୍ରବାସୀ ପ୍ରଭାରୀ ଭାବେ ରଣନୀତି କରୁଥିବା ସୂଚନା ମିଳିଛି। ପ୍ରକାଶଯୋଗ୍ୟ, ଏହି ଆସନରୁ ପୂର୍ବତନ ମୁଖ୍ୟମନ୍ତ୍ରୀ ମଧୁ କୋଡାଙ୍କ ସ୍ତ୍ରୀ ଗୀତା କୋଡା ଭାଜପାର ପ୍ରାର୍ଥୀ ହୋଇଛନ୍ତି।
ସେହିପରି ଯୁବମୋର୍ଚ୍ଚା ରାଜ୍ୟ ସଂଯୋଜକ ଯଜ୍ଞ ପ୍ରସାଦ ସାହୁ ଷଢ଼େଇକଳା, ଜଗନ୍ନାଥପୁର, ଚକ୍ରଧରପୁର ନିର୍ବାଚନ ମଣ୍ଡଳୀରେ ବୈଠକ କରୁଛନ୍ତି। ଚମ୍ପୁଆ ମଣ୍ଡଳ ସଭାପତି ରାଜେଶ ଆଚାର୍ଯ୍ୟ, ନାରୀନେତ୍ରୀ ଦାସମତି ଚାତାର, ଝରଣା ମହାନ୍ତ, ମମିତା ଭୌମିକ, ତୃପ୍ତିମୟୀ ମହାନ୍ତ, ଜୟନ୍ତୀ ମହାକୁଡ, ମଞ୍ଜରୀ ମୁର୍ମୁ, ପାଟଣାର ସମବାରି ମୁଣ୍ଡା ପ୍ରମୁଖ ବିଭିନ୍ନ ପଞ୍ଚାୟତ ଦାୟିତ୍ୱରେ ରହି ନିର୍ବାଚନ ପରିଚାଳନା କରୁଛନ୍ତି।
