ନୂଆଦିଲ୍ଲୀ, ୨୨।୮ : ଭବିଷ୍ୟତରେ ଭୋପାଳ ଗ୍ୟାସ ଦୁର୍ଘଟଣା କିମ୍ବା କାନପୁର ଆମୋନିୟା ଗ୍ୟାସ ଲିକ ଭଳି ଦୁର୍ଘଟଣା ଘଟିଲେ ପୀଡିତମାନେ ଦୁଇଟି ନୂତନ ଉଚ୍ଚ ବିଶେଷଜ୍ଞତା ବିଶିଷ୍ଟ ମେଡିକାଲରେ ଚିକିତ୍ସା ଯୋଗାଇ ଦିଆଯିବ। ଝାଜର ଏବଂ ଚେନ୍ନାଇରେ ଏଭଳି ହସ୍ପିଟାଲ ପ୍ରତିଷ୍ଠା ପାଇଁ କେନ୍ଦ୍ରୀୟ ସ୍ବାସ୍ଥ୍ୟ ମନ୍ତ୍ରଣାଳୟ ଏକ ପ୍ରସ୍ତାବ ପ୍ରସ୍ତୁତ କରିଛନ୍ତି। ଏଠାରେ ରାସାୟନିକ, ଜୈବିକ, ରେଡିଓଆକ୍ଟିଭ ଏବଂ ଆଣବିକ ଦୁର୍ଘଟଣା କିମ୍ବା ଆକ୍ରମଣର ଶିକାର ହୋଇଥିବା ବ୍ୟକ୍ତିଙ୍କୁ ଚିକିତ୍ସା ସୁବିଧା ମିଳିବ।
ମନ୍ତ୍ରଣାଳୟ ଅନୁଯାୟୀ, ଝାଜରର ଏମ୍ସ କ୍ୟାମ୍ପସରେ ଚେନ୍ନାଇର ଷ୍ଟାନଲି ମେଡିକାଲ କଲେଜରେ କେମିକାଲ, ଜୈବିକ, ରେଡିଓଲୋଜିକାଲ ଏବଂ ଆଣବିକ (ସିବିଆରଏନ) କେନ୍ଦ୍ର ପ୍ରତିଷ୍ଠା କରାଯିବ। ସ୍ବାସ୍ଥ୍ୟ ଏବଂ ପ୍ରତିରକ୍ଷା ମନ୍ତ୍ରଣାଳୟ ଏବଂ ପରମାଣୁ ଶକ୍ତି ବିଭାଗ ଏବଂ ଭାବା ପରମାଣୁ ଗବେଷଣା କେନ୍ଦ୍ର ପରି ଅନ୍ୟାନ୍ୟ ଅନୁଷ୍ଠାନ ସହିତ ପରାମର୍ଶ କରି ଏହାର ପ୍ରକଳ୍ପ ରିପୋର୍ଟ ଏଚଏଲଏଲ ଇନଫ୍ରା ଟେକ ସର୍ଭିସେସ ଦ୍ୱାରା ପ୍ରସ୍ତୁତ କରାଯାଇଛି ।
୨୩୦ କୋଟି ଟଙ୍କା ବ୍ୟୟରେ ଏହି କେନ୍ଦ୍ରଗୁଡ଼ିକ ଦେଢ଼ ବର୍ଷରେ ନିର୍ମାଣ ହେବ। ଉଭୟ ହସ୍ପିଟାଲରେ ୫୦ ଟି ଲେଖାଏଁ ଶଯ୍ୟା ସୁବିଧା ରହିବ। ସେଥିମଧ୍ୟରୁ ୧୬ ଟି ଶଯ୍ୟା ଆଇସିୟୁ ପାଇଁ, ୨୦ ଟି ଆଇସୋଲେଶନ ପାଇଁ ଏବଂ ୧୦ ଟି ପ୍ରି ଏବଂ ପୋଷ୍ଟ ଅପରେଶନ ରୁମ ପାଇଁ ରହିବ। ବୋନ୍ ମ୍ୟାରୋ ପ୍ରତିରୋପଣ କେନ୍ଦ୍ର ପାଇଁ ୪ ଟି ଶଯ୍ୟା ରଖାଯିବ। ସମସ୍ତ କେନ୍ଦ୍ରରେ ଆମ୍ବୁଲାନ୍ସ ସେବା ସହିତ ଗରମ, ଥଣ୍ଡା ଏବଂ ରାସାୟନିକ ସ୍ନାନ ପୀଡିତମାନଙ୍କୁ ସଂକ୍ରମଣମୁକ୍ତ କରିବା ପାଇଁ ଉପଲବ୍ଧ ହେବ।
ମନ୍ତ୍ରଣାଳୟ ଅନୁଯାୟୀ ଉତ୍ତରପ୍ରଦେଶ, ଝାଡଖଣ୍ଡ, ରାଜସ୍ଥାନ, ଗୁଜୁରାଟ ଏବଂ ତାମିଲନାଡୁରେ ମଧ୍ୟ ସାତୋଟି ସିବିଆରଏନ ମେଡିକାଲ ମ୍ୟାନେଜମେଣ୍ଟ ସେଣ୍ଟର ପ୍ରତିଷ୍ଠା କରାଯିବ। ଆଣବିକ ବିଦ୍ୟୁତ ଉତ୍ପାଦନ କେନ୍ଦ୍ର ଏବଂ ପ୍ରମୁଖ ସହର ନିକଟରେ ଏହା ନିର୍ମାଣ କରାଯିବ।
