ଲୋଇସିଂହା,୧୯।୮(ଡି.ଏନ.ଏ.): ବଲାଙ୍ଗୀର ଜିଲା ଲୋଇସିଂହା ବନ ରେଞ୍ଜ ଆଗଲପୁର ବ୍ଲକ ନଅଗାଁ(ଖ) ଗ୍ରାମର ଟାଙ୍ଗରା ପଡିଥିବା ଝାଙ୍କର ଏବଂ ଖର୍ଡିଆ ଡୁଙ୍ଗୁରି ସବୁଜିମାକୁ ଫେରିବ। ବନ ବିଭାଗ ସହଯୋଗ ଏବଂ ରାମଜୀ ଯୁବକ ସଂଘ ଉଦ୍ୟମକ୍ରମେ ଉକ୍ତ ଟାଙ୍ଗରା ଡୁଙ୍ଗୁରିରେ ଚାରା ଲଗାଇ ସବୁଜିମା ଫେରାଇ ଆଣିବାକୁ ଉଦ୍ୟମ ଆରମ୍ଭ ହୋଇଛି। ୨୦୨୨-୨୩ ଆର୍ଥିକ ବର୍ଷରେ ୧୦ ହେକ୍ଟର ଜମିରେ ଚାରା ଲଗାଇବାକୁ ରାମଜୀ ଯୁବକ ସଂଘ ଏବଂ ବନ ବିଭାଗ ପକ୍ଷରୁ ଯୋଜନା ରହିଛି।
ନଅଗାଁ(ଖ) ପଞ୍ଚାୟତର ସଦର ପଞ୍ଚାୟତ କାର୍ଯ୍ୟାଳୟ ସଂଲଗ୍ନ ଝାଙ୍କର ଏବଂ ଖର୍ଡିଆ ଡୁଙ୍ଗୁରି(ପାହାଡ) ରହିଛି। ଏହାର ପରିସୀମା ୧୦ ହେକ୍ଟର। ଦୁଇଦଶନ୍ଧି ତଳେ ଗ୍ରାମର ରାମଜୀ ଯୁବକ ସଂଘ ଉଦ୍ୟମରେ ଉକ୍ତ ଦୁଇ ଲଣ୍ଡା ଡୁଙ୍ଗରିରେ ଶାଗୁଆନ ଚାରାରୋପଣ କରାଯାଇଥିଲା। ପଥୁରିଆ ମାଟି ଏବଂ ଉପଯୁକ୍ତ ରକ୍ଷଣାବେକ୍ଷଣ ଅଭାବରୁ ସେତେବେଳେ ଅଧିକାଂଶ ଚାରା ମରି ଯାଇଥିଲା। ଏବେ ୧୦ ହେକ୍ଟର ପରିମିତ ଡୁଙ୍ଗୁରି ଉପରେ କେତେକଙ୍କ ଲୋଲୁପ ଦୃଷ୍ଟି ପଡିଛି। ଡୁଙ୍ଗରି ସୀମାନ୍ତକୁ ଜବରଦଖଲ କରି କେତେକ ନ୍ୟସ୍ତସ୍ବାର୍ଥ ବ୍ୟକ୍ତି ଚାଷଜମି ପାଇଁ ପ୍ରସ୍ତୁତ କଲେଣି। ଡୁଙ୍ଗୁରିକୁ ସୁରକ୍ଷା ଦେବା ପାଇଁ ରାମଜୀ ଯୁବକ ସଂଘ ଏବେ ଅଣ୍ଟା ଭିଡିଛି। ଦେଢମାସ ତଳେ ସଂଘର ସଭାପତି ନରସିଂହ ସାହୁଙ୍କ ଆହ୍ବାନ ଓ ସମ୍ପାଦକ ସଦାନନ୍ଦ ପଶାୟତଙ୍କ ଆବାହକତ୍ୱରେ ଏକ ବୈଠକ ଅନୁଷ୍ଠିତ ହୋଇଥିଲା। ସମ୍ପୃକ୍ତ ଡୁଙ୍ଗୁରିର ସୁରକ୍ଷା ପାଇଁ ପୁଣି ଥରେ ଚାରା ଲଗାଇବାକୁ ଗ୍ରାମବାସୀଙ୍କୁ ଆହ୍ବାନ ଦିଆଯାଇଥିଲା। ଗ୍ରାମବାସୀଙ୍କ ସହମତି ପରେ ସ୍ଥାନୀୟ ବନ ବିଭାଗର ଏନେଇ ଦୃଷ୍ଟି ଆକର୍ଷଣ କରାଯାଇଥିଲା। ବନ ବିଭାଗ ପକ୍ଷରୁ ଆମ ଜଙ୍ଗଲ କାର୍ଯ୍ୟକ୍ରମରେ ଚାରା ଯୋଗାଇ ଦେବାକୁ ସ୍ଥାନୀୟ ରେଞ୍ଜ ଅଫିସର ପାଉଲ ହରପାଲ ପ୍ରତିଶ୍ରୁତି ଦେଇଥିଲେ। ଗତ ମଙ୍ଗଳବାର ସ୍ଥାନୀୟ ବିଧାୟକ ମୁକେଶ ମହାଲିଙ୍ଗ, ସରପଞ୍ଚ ବୃନ୍ଦାବନ ସେଠ, ଫରେଷ୍ଟ ଗାର୍ଡ ଚିନ୍ମୟ ପ୍ରଧାନ, ଅନୁଷ୍ଠାନର କର୍ମକର୍ତ୍ତା, ସ୍ବେଚ୍ଛାସେବୀ ଅନୁଷ୍ଠାନ ପଲ୍ଲୀ ଆଲୋକ ପାଠାଗାର ସଦସ୍ୟ ଏବଂ ଗ୍ରାମବାସୀଙ୍କୁ ନେଇ ଆଲୋଚନା ହୋଇଥିଲା। ୨୦୨୨-୨୩ ଆର୍ଥିକ ବର୍ଷରେ ସମ୍ପୃକ୍ତ ଡୁଙ୍ଗରିରେ ଚାରା ଲଗାଯିବାକୁ ଚୂଡାନ୍ତ ହୋଇଛି। ଏହି ଅବସରରେ ମିଳିତ ଉଦ୍ୟମରେ ଗ୍ରାମର ତେଲିକଣ୍ଟା ନିକଟରେ ପ୍ରଥମ ଦଫାରେ ୧ ଶହ ଚାରା ରୋପଣ କରାଯାଇଛି।
