ପଞ୍ଚକୁଲା(ହରିୟାଣା),୨୯ା୬(ପି.ଟି.): ଡୋପ୍ ଟେଷ୍ଟରେ ଆନାବୋଲିକ୍ ଷ୍ଟେରଏଡ୍ ପାଇଁ ପଜିଟିଭ ଆସିବାରୁ ଅଲିମ୍ପିକ ଆଶାୟୀ ଭାରତୀୟ ଜାଭେଲିନ ଥ୍ରୋୟର ଡି.ପି. ମନୁଙ୍କୁ ନ୍ୟାଶନାଲ ଆଣ୍ଟି ଡୋପିଙ୍ଗ ଏଜେନ୍ସି(ନାଡା) ପକ୍ଷରୁ ସସ୍ପେଣ୍ଡ କରାଯାଇଛି। ଚଳିତ ବର୍ଷ ଏପ୍ରିଲରେ ଅନୁଷ୍ଠିତ ଇଣ୍ଡିଆନ ଗ୍ରାଁ ପ୍ରି ସମୟରେ ମନୁଙ୍କର ଡୋପ୍ ଟେଷ୍ଟ ହୋଇଥିବା କୁହାଯାଉଛି। ପୂର୍ବରୁ ମନୁଙ୍କୁ ପ୍ରତିଯୋଗିତାରୁ ଦୂରେଇ ରଖିବା ଲାଗି ନାଡା ଆଥ୍ଲେଟିକ୍ସ ଫେଡେରେଶନ ଅଫ୍ ଇଣ୍ଡିଆ(ଏଏଫ୍ଆଇ)କୁ ନିର୍ଦ୍ଦେଶ ପ୍ରଦାନ କରିଥିବା ବେଳେ ସେ ଡୋପ୍ ଜାଲରେ ପଡ଼ିଥିବା ସନ୍ଦେହ କରାଯାଉଥିଲା। ୨୦୨୩ ଏସିଆନ ଚାମ୍ପିୟନଶିପ୍ରେ ଏକ ରୌପ୍ୟ ଜିତିଥିବା ୨୪ ବର୍ଷୀୟ ମନୁ ବିଶ୍ୱ ର଼୍ୟାଙ୍କିଙ୍ଗ ଭିତ୍ତିରେ ଅଲିମ୍ପିକ କ୍ୱାଲିଫାଏ କରିବା ନିଶ୍ଚିତ ଥିଲା। ମାତ୍ର ସଦ୍ୟତମ ପରିସ୍ଥିତିକୁ ନେଇ ସେ ପ୍ୟାରିସ ଗେମ୍ସରୁ ବଞ୍ଚତ୍ତ ହେବାକୁ ଯାଉଛନ୍ତି। ଗୁରୁବାରଠାରୁ ଆରମ୍ଭ ହୋଇଥିବା ଜାତୀୟ ଆନ୍ତଃରାଜ୍ୟ ଚାମ୍ପିୟନଶିପ୍ରେ ଭାଗ ନେଉଥିବା ଆଥ୍ଲେଟମାନଙ୍କ ପ୍ରଥମ ତାଲିକା ମଧ୍ୟରେ ଡି.ପି. ମନୁଙ୍କ ନାମ ରହିଥିଲା। ମାତ୍ର ପରେ ତାଙ୍କୁ ଏଥିରୁ ବାଦ୍ ଦିଆଯାଇଥିଲା। ଏଏଫ୍ଆଇ ସଭାପତି ଆଡିଲ ସୁମାରିଓ୍ବାଲାଙ୍କୁ ଏ ବିଷୟରେ ପଚରାଯିବାରେ ପ୍ରତିଯୋଗିତାରୁ ମନୁଙ୍କୁ ବାଦ୍ ଦେବାଲାଗି ଫେଡେରେଶନକୁ ନାଡା କହିଥିବା ସେ କହିଥିଲେ। ମାତ୍ର ଆଥ୍ଲେଟ ଜଣକ କୌଣସି ଡୋପିଙ୍ଗ ଅପରାଧ କରିଛନ୍ତି କି ନା ସେ ବିଷୟରେ କିଛି ସ୍ପଷ୍ଟ କରି ନ ଥିଲା। ଏଏଫ୍ଆଇ କାର୍ଯ୍ୟାଳୟକୁ ନାଡାରୁ ଏକ ଫୋନ୍ କଲ୍ ଆସିଥିଲା। ମନୁଙ୍କୁ ଏଣିକି ପ୍ରତିଯୋଗିତାରୁ ବାରଣ କରିବା ଲାଗି ନିର୍ଦ୍ଦେଶ ଆସିଥିଲା। ସମ୍ଭବତଃ ଏହି ଆଥ୍ଲେଟଙ୍କ ସମ୍ପର୍କରେ ନାଡା କୌଣସି ସୂଚନା ପାଇ ଥିଲା। ସୂଚନାଯୋଗ୍ୟ, ଗତ ମେ’ ୧୫ରୁ ୧୯ ତାରିଖ ପର୍ଯ୍ୟନ୍ତ ଭୁବନେଶ୍ୱରରେ ଅନୁଷ୍ଠିତ ଫେଡେରେଶନ କପ୍ରେ ମନୁ ୮୨.୦୬ ମିଟର ଥ୍ରୋ କରି ଅଲିମ୍ପିକ ଚାମ୍ପିୟନ ନୀରଜ ଚୋପ୍ରାଙ୍କ ପଛକୁ ଦ୍ୱିତୀୟ ସ୍ଥାନରେ ରହିଥିଲେ। ପରେ ସେ ଜୁନ୍ ୧ରେ ତାଇପେ ସିଟିରେ ଅନୁଷ୍ଠିତ ତାଇଓ୍ବାନ ଆଥ୍ଲେଟିକ୍ସ ଓପନରେ ୮୧.୫୮ମିଟର ଥ୍ରୋ କରି ସ୍ବର୍ଣ୍ଣ ଜିତିଥିଲେ। ପ୍ୟାରିସ ଅଲିମ୍ପିକ୍ସ ପୁରୁଷ ଜାଭେଲିନ୍ ଥ୍ରୋରେ ୩୨ ଜଣ ଆଥ୍ଲେଟ ଭାଗ ନେବେ। ଓ୍ବାଲର୍ଡ ଆଥ୍ଲେଟିକ୍ସ ରୋଡ୍ ଟୁ ପ୍ୟାରିସ ତାଲିକାରେ ମନୁ ୧୫ତମ ସ୍ଥାନରେ ଅଛନ୍ତି। ଯୋଗ୍ୟତା ହାସଲ ସମୟସୀମା ଜୁନ୍ ୩୦ ତାରିଖ ରହିଛି। ଚୋପ୍ରା ଓ କିଶୋର ଜେନା ଅଲିମ୍ପିକ ମାନଦଣ୍ଡ ୮୫.୫୦ ମିଟର ଅଙ୍କ ହାସଲ କରି ଆପେ ଅଲିମ୍ପିକ୍ସ ଯୋଗ୍ୟତା ହାସଲ କରିସାରିଛନ୍ତି। ଏକ ଅଲିମ୍ପିକ୍ସ ଟ୍ରାକ୍ ଆଣ୍ଡ୍ ଫିଲ୍ଡ ଇଭେଣ୍ଟରେ ଗୋଟିଏ ଦେଶର ସର୍ବାଧିକ ୩ଜଣ ଆଥ୍ଲେଟ ଅଂଶଗ୍ରହଣ କରିପାରିବେ।
