ସେମିଳିଗୁଡ଼ା/ସୁନାବେଡ଼ା, ୧୨।୫(ସ୍ବ.ପ୍ର.): କୋରାପୁଟ ଜିଲା ସେମିଳିଗୁଡ଼ା ବ୍ଲକ୍ ସାଡାମ ପଞ୍ଚାୟତ ଅନ୍ତର୍ଗତ ଜଙ୍ଗରଡ଼ା ଗ୍ରାମରେ ବିଭିନ୍ନ ସମସ୍ୟାରେ ଗ୍ରାମବାସୀ ଚଳୁଛନ୍ତି। ସ୍ବାଧୀନତାର ଦୀର୍ଘ ୭୫ ବର୍ଷ ପରେ ମଧ୍ୟ ଲୋକଙ୍କୁ ସର୍ବନିମ୍ନ ମୌଳିକ ସୁବିଧା ମିଳିପାରିନାହିଁ। ସରକାରଙ୍କ ସବୁ ଯୋଜନା ଏଠାରେ ଫେଲ୍ ମାରିବା ପରି ମନେହୁଏ। ୧୨୦ ପରିବାରର ୫ଶହରୁ ଊର୍ଦ୍ଧ୍ୱ ଲୋକ ବସବାସ କରୁଥିବା ଜଙ୍ଗରଡ଼ା ଗ୍ରାମରେ ବର୍ଷ ତମାମ ପାଣି ସମସ୍ୟା ଲାଗି ରହିଛି। ଦୁଇଟି ନଳକୂଅ ଥିଲେ ମଧ୍ୟ ସେଥିରୁ ଗୋଟିଏ ଅଚଳ ଥିବାବେଳେ ଅନ୍ୟଟି ଆଂଶିକ କାମ କରୁଛି। ଅଳ୍ପ ସମୟ ଭଲ ପାଣି ବାହାରିବା ପରେ ମାଟିପାଣି ବାହାରୁଛି। ଫଳରେ ଗ୍ରାମବାସୀ ୨ କି.ମି. ଦୂରରେ ଥିବା ବଡ଼ନଦୀ ଉପରେ ପାନୀୟ ଜଳ ପାଇଁ ନିର୍ଭର କରନ୍ତି। ଗ୍ରାମରେ ଏକ ସୌରଶକ୍ତି ଚାଳିତ ମୋଟର ପମ୍ପ ବସାଯାଇଛି ସତ, ମାତ୍ର ଏହା ଟାଣଖରା ହେଲେ କାର୍ଯ୍ୟକ୍ଷମ ହୁଏ ନଚେତ୍ ସକାଳୁ କିମ୍ବା ମେଘୁଆ ପାଗ ହେଲେ ଚାଲେ ନାହିଁ। ଗ୍ରାମରେ ଥିବା ବିଦ୍ୟାଳୟରେ ପ୍ରଥମରୁ ଦଶମ ଶ୍ରେଣୀ ପର୍ଯ୍ୟନ୍ତ ୨୫୦ରୁ ଅଧିକ ଛାତ୍ରୀଛାତ୍ର ପାଠ ପଢ଼ନ୍ତି। ଏତେ ସଂଖ୍ୟକ ପିଲାଙ୍କ ପାଇଁ ଶ୍ରେଣୀଗୃହ ରହିଛି ମାତ୍ର ୬ଟି। ଗ୍ରାମରେ ବିଦ୍ୟୁତ୍ ବ୍ୟବସ୍ଥା ଥାଇ ନ ଥିବା ସହ ସମାନ। ସବୁବେଳେ ବିଦ୍ୟୁତ୍ କାଟ ଯୋଗୁ ଗ୍ରାମବାସୀ ଅତିଷ୍ଠ ହୋଇପଡ଼ନ୍ତି। ଛାତ୍ରୀଛାତ୍ରଙ୍କ ପାଠପଢ଼ା ମଧ୍ୟ ବାଧାପ୍ରାପ୍ତ ହୋଇଥାଏ। ଗ୍ରାମର ଯୋଗ୍ୟ ହିତାଧିକାରୀଙ୍କୁ ୩ ବର୍ଷ ହେବ ଆବାସ କିମ୍ବା ବିଜୁ ପକ୍କାଘର ଯୋଜନାରେ ସାମିଲ କରାଯାଇନାହିଁ। ପ୍ରଶାସନ ପକ୍ଷରୁ ଏ ଦିଗରେ ପଦକ୍ଷେପ ନେଇ ସମସ୍ୟା ଦୂରକରିବା ଲାଗି ସାଧାରଣରେ ଦାବି ହେଉଛି।
