ବେଙ୍ଗାଲୁରୁ,୨୬ା୧୨ : କର୍ନାଟକ ବିଧାନସଭା ନିର୍ବାଚନ ପୂର୍ବରୁ ଗଲି ଜନାର୍ଦ୍ଦନ ରେଡ୍ଡୀ ରବିବାର ନିଜର ନୂଆ ଦଳ ଗଢ଼ିଛନ୍ତି। ତାଙ୍କ ଦଳର ନାଁ ରହିଛି କଲ୍ୟାଣ ରାଜ୍ୟ ପ୍ରଗତି ପକ୍ଷ (କେଆର୍ପିପି)। ରେଡ୍ଡୀ ଆଗାମୀ ନିର୍ବାଚନରେ କୋପ୍ପାଲର ଗଙ୍ଗାବତୀ ଆସନରୁ ଲଢ଼ିବାକୁ ନିଷ୍ପତ୍ତି ନେଇଛନ୍ତି। ୧୫ ବର୍ଷ ପୂର୍ବେ ସେ ବେଆଇନ ଖଣି ଦୁର୍ନୀତି ମାମଲାରେ ଫସିଥିଲେ। ତାଙ୍କୁ କର୍ନାଟକ ଖଣି ଦୁର୍ନୀତିର କିଙ୍ଗ୍ପିନ୍ କୁହାଯାଇଥିଲା। ଭାଜପା ତାଙ୍କୁ ଦଳରେ ଗ୍ରହଣ କରିବାକୁ ମନା କରିଦେବା ପରେ ସେ ନୂଆ ଦଳ ଗଢ଼ିବାକୁ ନିଷ୍ପତ୍ତି ନେଇଥିଲେ। ତାଙ୍କ ପ୍ରତି ଯାହା ହୋଇଛି ଏବଂ ଦେଶର ସାମ୍ପ୍ରତିକ ରାଜନୈତିକ ସ୍ଥିତିକୁ ନେଇ ସେ ଅତିଷ୍ଠ ହୋଇପଡ଼ିଥିବା କହିଛନ୍ତି।
ରେଡ୍ଡୀ କହିଛନ୍ତି, ୨୦୧୮ କର୍ନାଟକ ବିଧାନସଭା ନିର୍ବାଚନ ବେଳେ ସେ ରାଜନୀତିଠାରୁ ଦୂରେଇ ରହିଥିଲେ। ସ୍ବରାଷ୍ଟ୍ରମନ୍ତ୍ରୀ ଅମିତ୍ ଶାହା ଗଣମାଧ୍ୟମକୁ ଏକ ବିବୃତି ଦେଇ ରେଡ୍ଡୀ ସହ ଭାଜପାର କୌଣସି ସମ୍ପର୍କ ନାହିଁ ଓ ସେ ଦଳରେ ନାହାନ୍ତି ବୋଲି କହିଥିଲେ। ଏହାର ଦୁଇଦିନ ପରେ ଶାହା ତାଙ୍କୁ ଦିଲ୍ଲୀ ଡକାଇ ଶ୍ରୀରାମୁଲୁ ଏବଂ ୟେଦୁରପ୍ପାଙ୍କ ପାଇଁ କାମ କରିବାକୁ କହିଥିଲେ। ତାଙ୍କୁ ଖୁବ୍ଶୀଘ୍ର ଦଳରେ ଏକ ପଦବୀ ଦିଆଯିବ ବୋଲି ସ୍ବରାଷ୍ଟ୍ରମନ୍ତ୍ରୀ ପ୍ରତିଶ୍ରୁତି ଦେଇଥିଲେ। ତାହା ପରିବର୍ତ୍ତେ ତାଙ୍କ ଘର ଉପରେ ସିବିଆଇ ଚଢ଼ାଉ ହେଲା। ସେ ଆଇନଗତ ଭାବେ ଖଣି ବ୍ୟବସାୟରେ ସମ୍ପୃକ୍ତ ଥିଲେ ଓ ୫,୦୦୦ ଲୋକଙ୍କୁ ନିଯୁକ୍ତି ଦେଇଥିଲେ। ଅଥଚ ୧୨ ବର୍ଷର ଖଣି ଦୁର୍ନୀତି ମାମଲା ତାଙ୍କ ମର୍ଯ୍ୟାଦା ହାନି କଲା ବୋଲି ରେଡ୍ଡୀ କହିଛନ୍ତି। ଗତ ସେପ୍ଟେମ୍ବରରେ ସିବିଆଇ ତାଙ୍କ ବିରୋଧରେ ଚାର୍ଜଶିଟ୍ ଦାଖଲ କରିଛି।
