ନୂଆଦିଲ୍ଲୀ/ଶ୍ରୀନଗର,୧୦ା୭: ୨୦୧୧ ଜନଗଣନା ଅନୁସାରେ ଜମ୍ମୁ-କଶ୍ମୀରର ସୀମା ପୁନଃ ନିର୍ଦ୍ଧାରଣ କରାଯିବ। ଏଥିରେ ସମଗ୍ର ଉପତ୍ୟକାର ୭ ବିଧାନସଭା ଆସନ ବୃଦ୍ଧି କରାଯିବ। ପାକିସ୍ତାନ-ଅଧିକୃତ କଶ୍ମୀର (ପିଓକେ)ର ୨୪ ଆସନ ଖାଲି ରହିବ। ଏହି ସୀମା ପୁନଃ ନିର୍ଦ୍ଧାରଣ ପ୍ରକ୍ରିୟାରେ ଏହାକୁ ସାମିଲ କରାଯିବ ନାହିଁ। ୨୦୨୨ ମାର୍ଚ୍ଚ ସୁଦ୍ଧା ସୀମା ପୁନଃ ନିର୍ଦ୍ଧାରଣ ପ୍ରକ୍ରିୟା ଶେଷ ହେବ ବୋଲି ଶୁକ୍ରବାର ମୁଖ୍ୟ ନିର୍ବାଚନ କମିଶନର (ସିଇସି) ସୁଶୀଲ ଚନ୍ଦ୍ରା ସୂଚନା ଦେଇଛନ୍ତି।
ଜମ୍ମୁ-କଶ୍ମୀର ସୀମା ପୁନଃ ନିର୍ଦ୍ଧାରଣ କମିଶନ ଗୁରୁବାର ଜମ୍ମୁ-କଶ୍ମୀରର ରାଜନୈତିକ ଦଳଗୁଡ଼ିକର ନେତା ଓ ସିଭିଲ ସୋସାଇଟି ଗ୍ରୁପ୍ ସଦସ୍ୟଙ୍କୁ ଭେଟିଥିଲେ। ଉପତ୍ୟକାର ନିର୍ବାଚନମଣ୍ଡଳୀଗୁଡ଼ିର ପୁନର୍ଗଠନ ନିମନ୍ତେ ଆୟୋଗ ସେମାନଙ୍କ ମତାମତ ଲୋଡ଼ିଥିଲେ। ନ୍ୟାଶନାଲ କନ୍ଫରେନ୍ସ (ଏନ୍ସି), ପିପୁଲ୍ସ ଡେମୋକ୍ରାଟିକ୍ ପାର୍ଟି (ପିଡିପି), ସିପିଆଇ, ସିପିଆଇଏମ୍, ପାନ୍ଥର୍ଥ ପାର୍ଟି, କଂଗ୍ରେସ, ଭାଜପା, ଅପ୍ନି ପାର୍ଟି ଏବଂ ବହୁଜନ ସମାଜ ପାର୍ଟି ନେତାମାନେ କମିଶନଙ୍କ ଆଗରେ ନିଜ ଦାବି ଓ ମତ ଉପସ୍ଥାପନ କରିଥିଲେ। କମିଶନ ଅଧ୍ୟକ୍ଷା ଜଷ୍ଟିସ୍ ରଞ୍ଜନା ପ୍ରକାଶ ଦେଶାଇ, ସଦସ୍ୟ ସୁଶୀଲ ଚନ୍ଦ୍ରା ଏବଂ କେ.କେ. ଶର୍ମା ଶୁକ୍ରବାର ନୂଆଦିଲ୍ଲୀରେ ଏକ ଖବରଦାତା ସମ୍ମିଳନୀକୁ ସମ୍ବୋଧିତ କରିଛନ୍ତି। ସୁଶୀଲ ଚନ୍ଦ୍ରା କହିଛନ୍ତି, ୧୯୮୧ରେ ପ୍ରଥମ ସମ୍ପୂର୍ଣ୍ଣ ସୀମା ପୁନଃ ନିର୍ଦ୍ଧାରଣ ଆୟୋଗ ଗଠନ କରାଯାଇଥିଲା। ୧୯୮୫ ଜନଗଣନା ଆଧାରରେ ଉକ୍ତ କମିଶନ ଏହାର ୧୪ ବର୍ଷ ପରେ ଅର୍ଥାତ୍ ୧୯୯୫ରେ ସୁପାରିସ କରିଥିବାରୁ ସୀମା ପୁନଃ ନିର୍ଦ୍ଧାରଣ ହୋଇପାରି ନ ଥିଲା। ସମସ୍ତ ଦାବି ଓ ସୁପାରିସକୁ ଧ୍ୟାନରେ ରଖି ଏକ ଚିଠା ପ୍ରସ୍ତୁତ କରାଯିବ। ଲୋକଙ୍କ ମତାମତ ପାଇଁ ଏହାକୁ ପବ୍ଲିକ୍ ଡୋମେନ୍ରେ ସାର୍ବଜନୀନ କରାଯିବ। ସମସ୍ତ ମନ୍ତବ୍ୟକୁ ଅନୁଧ୍ୟାନ କରିବା ପରେ ସୀମା ପୁନଃ ନିର୍ଦ୍ଧାରଣ ପ୍ରକ୍ରିୟା ନେଇ ଚୂଡ଼ାନ୍ତ ଚିଠା ପ୍ରସ୍ତୁତ କରାଯିବ।
୧୯୯୫ରେ ୧୨ ଜିଲା ଥିଲା। ଏହି ସଂଖ୍ୟା ଏବେ ୨୦ରେ ପହଞ୍ଚତ୍ଛି। ସେହିପରି ତହସିଲ ସଂଖ୍ୟା ୫୮ରୁ ୨୭୦କୁ ବୃଦ୍ଧି ପାଇଛି। ୧୨ ଜିଲାରେ ନିର୍ବାଚନମଣ୍ଡଳୀ ସୀମା ଜିଲାର ସୀମା ବାହାରକୁ ଯାଇଛି। ୨୦୧୧ ଜନଗଣନା ଅନୁସାରେ ଜମ୍ମୁର ଜନସଂଖ୍ୟା ୫୩,୭୮,୫୩୮ ଥିବାବେଳେ କଶ୍ମୀରର ଜନସଂଖ୍ୟା ହେଉଛି ୬୮,୮୮,୪୭୫।
ନିର୍ବାଚନ ପାଇଁ ବାଟ ଫିଟିବ
୨୦୧୯ ଅଗଷ୍ଟ ୫ରେ କେନ୍ଦ୍ର ସରକାର ଜମ୍ମୁ-କଶ୍ମୀରକୁ ସ୍ବତନ୍ତ୍ର ମାନ୍ୟତା ପ୍ରଦାନକାରୀ ସମ୍ବିଧାନର ଅନୁଚ୍ଛେଦ ୩୭୦କୁ ଉଚ୍ଛେଦ କରିଥିଲେ। ଏହାସହ ଜମ୍ମୁ-କଶ୍ମୀର ଓ ଲଦାଖ ନାମରେ ଦୁଇଟି କେନ୍ଦ୍ରଶାସିତ ଅଞ୍ଚଳ ପ୍ରତିଷ୍ଠା କରିଥିଲେ। ଏହି ପଦକ୍ଷେପ ସହ ଉପତ୍ୟକାର ସୀମା ପୁନଃ ନିର୍ଦ୍ଧାରଣ ପାଇଁ ବାଟ ଫିଟିଥିଲା। କେନ୍ଦ୍ର ସରକାର ୨୦୨୦ ମାର୍ଚ୍ଚରେ ୩ ସଦସ୍ୟ ବିଶିଷ୍ଟ ସୀମା ପୁନଃ ନିର୍ଦ୍ଧାରଣ ଆୟୋଗ ଗଠନ କରିଥିଲେ। କରୋନା ମହାମାରୀକୁ ଦୃଷ୍ଟିରେ ରଖି ୨୦୨୧ ମାର୍ଚ୍ଚରେ ଉକ୍ତ କମିଶନଙ୍କ କାର୍ଯ୍ୟକାଳ ଆଉ ବର୍ଷେ ବଢ଼ାଯାଇଥିଲା। ଆୟୋଗ ୨୦୨୨ ମାର୍ଚ୍ଚ ପୂର୍ବରୁ କେନ୍ଦ୍ର ସରକାରଙ୍କ ନିକଟରେ ରିପୋର୍ଟ ଦାଖଲ କରିପାରନ୍ତି। ଏହା ପରେ ବିଧାନସଭା ନିର୍ବାଚନ ହେବ।
