ନୂଆଦିଲ୍ଲୀ,୨୪।୧ : ବରିଷ୍ଠ ଆଇନଜୀବୀ ମହେଶ ଜେଠାମାଲାନି କଂଗ୍ରେସ ନେତା ଜୟରାମ ରମେଶଙ୍କୁ କଡ଼ା ସମାଲୋଚନା କରିଛନ୍ତି। ସେ ଚାଇନା ସମର୍ଥକ ଭାବରେ ରମେଶଙ୍କୁ ସମ୍ବୋଧିତ କରିଛନ୍ତି। ଜେଠାମାଲାନି କହିଛନ୍ତି, ସେ ଚାଇନା ପଟେ ଥିବା ସ୍ପଷ୍ଟ ହୋଇଛି। ମୁଁ ଏକ ଲିଙ୍କ ଶେୟାର କରିଛି ଯେଉଁଥିରେ ଚାଇନାମାନେ ତାଙ୍କୁ ପ୍ରଶଂସା କରୁଛନ୍ତି ଏବଂ ସେ ଯାହା କହୁଛନ୍ତି ସେଥିପ୍ରତି ଧ୍ୟାନ ଦେବାକୁ ଭାରତ ସରକାରଙ୍କୁ ପରାମର୍ଶ ଦେଇଛନ୍ତି। ଜଣେ ଭାରତୀୟ ଭାବରେ ମୁଁ ଚିନ୍ତିତ ଯେ ସେ ସମ୍ବେଦନଶୀଳ ସୀମା ପ୍ରସଙ୍ଗରେ ଭାରତର ଆଭିମୁଖ୍ୟକୁ ଚ୍ୟାଲେଞ୍ଜ କରିବା ସହିତ ଦେଶର ସ୍ଥିତି ପାଇଁ ବିପଦ ସୃଷ୍ଟି କରୁଛନ୍ତି।
ଏପରି ପୃଷ୍ଠଭୂମି ଥିବା ବ୍ୟକ୍ତିଙ୍କ ବିଷୟରେ ଚିନ୍ତା କରାଯିବା ଉଚିତ। ଯଦି କେହି ଭାରତ ବିରୁଦ୍ଧରେ ଏବଂ ଚାଇନାକୁ ସମର୍ଥନ କରୁଛନ୍ତି, ତେବେ ସେ ଭାରତ ପାଇଁ ଚିନ୍ତା କରୁଛନ୍ତି ନା କୌଣସି ସ୍ବାର୍ଥ ପାଇଁ ଏଭଳି ଜାରି ରଖିଛନ୍ତି ତାହା ବିଚାର କରାଯିବା ଜରୁରୀ।
ଭାଜପାର ରାଜ୍ୟସଭା ସଦସ୍ୟ ମହେଶ ଜେଠାମାଲାନି କଂଗ୍ରେସର ମହାସଚିବ ଜୟରାମ ରମେଶଙ୍କ ପୁସ୍ତକ ସମ୍ପର୍କରେ ଉଲ୍ଲେଖ କରିଛନ୍ତି ଯେଉଁଥିରେ ସେ ଚାଇନା ଟେଲିକମ କମ୍ପାନୀ ହୁଆୱେଇର କାର୍ଯ୍ୟକଳାପକୁ ଭାରତରେ ପ୍ରୋତ୍ସାହିତ କରିଥିବା ଅଭିଯୋଗ ହୋଇଛି। ରମେଶଙ୍କ ପୁସ୍ତକରୁ କିଛି ଅଂଶ ଶେଆର କରି ଜେଠାମାଲାନି ଟୁଇଟ କରି କହିଛନ୍ତି ଯେ ୨୦୦୫ ମସିହାରୁ ଜୟରାମ ରମେଶ ଚାଇନାର ଟେଲିକମ କମ୍ପାନୀ ହୁଆୱେଇର ଭାରତରେ କାର୍ଯ୍ୟକଳାପ ପାଇଁ ଲବି କରୁଛନ୍ତି। ସୁରକ୍ଷା ପ୍ରତି ବିପଦ ଥିବାରୁ ଅନେକ ଦେଶରେ ହୁଆୱେଇକୁ ନିଷେଧ କରିଛନ୍ତି। ଚାଇନ ଉପରେ ଭାରତ ସରକାରଙ୍କ ଆଭିମୁଖ୍ୟ ଉପରେ ଜୟରାମ ମଧ୍ୟ ପ୍ରଶ୍ନ କରିଛନ୍ତି। ପ୍ରଥମେ ସେ ହୁଆୱେଇ ସହିତ ନିଜର ସମ୍ପର୍କ ପ୍ରକାଶ କରିବା ଉଚିତ।
ସୂଚନାଯୋଗ୍ୟ,ଚାଇନାର ନେଟୱାର୍କିଂ ପ୍ରମୁଖ ହୁଆୱେଇ ଟେକ୍ନୋଲୋଜିର ବେଙ୍ଗାଲୁରୁରେ ଏକ ବଡ଼ ଉପସ୍ଥିତି ରହିଛି ଏବଂ ଏହା ବିସ୍ତାର କରିବାକୁ ଚାହୁଁଛି। ଭାରତୀୟ ସୁରକ୍ଷା ଏଜେନ୍ସିଗୁଡ଼ିକ ଏନେଇ ଏକ ପ୍ରତିବନ୍ଧକ ପାଲଟିଛନ୍ତି।
