ଚନ୍ଦ୍ରପୁର,୨୭।୨(ଡି.ଏନ୍.ଏ.) ରାୟଗଡ଼ା ଜିଲା ଚନ୍ଦ୍ରପୁର ବ୍ଲକ ହନୁମନ୍ତପୁରର ପୁରାତନ ଶୈବପୀଠ ମୀନାଝୋଲା। ଶିବରାତ୍ରି ଉପଲକ୍ଷେ ଜାଗରଯାତ୍ରାରେ ଏଠାରେ ଶତାଧିକ ଶ୍ରଦ୍ଧାଳୁଙ୍କ ଭିଡ଼ ଜମିଥାଏ। ଚଳିତ ବର୍ଷ ମାର୍ଚ୍ଚ ୧ରେ ଶିବରାତ୍ରି ପଡ଼ୁଛି। ତେଣୁ ୩ଦିନିଆ ଜାଗରଯାତ୍ରା ଓ ନବକୁଣ୍ଡୀୟ ଗାୟତ୍ରୀ ମହାଯଜ୍ଞ ପାଇଁ ପ୍ରସ୍ତୁତି ଆରମ୍ଭ ହୋଇଯାଇଛି। ମୀନାଝୋଲା ନିକଟ ଜନକଲ୍ୟାଣ ଆଶ୍ରମଠାରେ ସୋମବାର ଅପରାହ୍ନରେ କଳସଯାତ୍ରା ଓ କଳସାଧିବାସ କାର୍ଯ୍ୟକ୍ରମ ଅନୁଷ୍ଠିତ ହେବ। ସେହିପରି ମଙ୍ଗଳବାର ପୂର୍ଣ୍ଣାହୁତି ଓ ନଗର ସଂକୀର୍ତ୍ତନ କାର୍ଯ୍ୟକ୍ରମ ପାଇଁ ସମସ୍ତ ପ୍ରସ୍ତୁତି ଚାଲିଛି। ମୁଖ୍ୟ ପୁରୋଧା ଭାବେ ଜନକଲ୍ୟାଣ ଆଶ୍ରମର ବାବା ଜନକାନନ୍ଦ ଗିରି ଦାୟିତ୍ୱ ତୁଲାଉଥିବାବେଳେ ମୀନାଝୋଲା କମିଟିର ସଭାପତି ପ୍ରମୋଦ ମୁଗୁଲି, ସହଯୋଗୀ ସଦସ୍ୟ ପ୍ରମୋଦ ସାହୁକାର ପ୍ରମୁଖ ସହଯୋଗ କରୁଛନ୍ତି। ଶନିବାର ଅନେକ ଶ୍ରଦ୍ଧାଳୁ ଏହି ଶୈବପୀଠରେ ମୁଣ୍ଡନ ହେଉଥିବା ଦେଖିବାକୁ ମିଳିଛି। ସେହିପରି ଜାଗରଯାତ୍ରା ପାଇଁ ବ୍ୟବସାୟୀମାନେ ପୀଠ ନିକଟରେ ଅସ୍ଥାୟୀ ଦୋକାନ ଖୋଲିବାର ପ୍ରସ୍ତୁତି ଆରମ୍ଭ କରିଛନ୍ତି।
