ଜଗନ୍ନାଥପ୍ରସାଦ,୩।୭(ବିଭୁ ପ୍ରସାଦ ପଟ୍ଟନାୟକ): ଗଞ୍ଜାମ ଜିଲା ଜଗନ୍ନାଥପ୍ରସାଦ ବ୍ଲକ କାର୍ଯ୍ୟାଳୟ ସମ୍ମୁଖରେ ଗୁରୁବାର ଦେଖିବାକୁ ମିଳିଛି ଏକ ଅଭାବନୀୟ ଦୃଶ୍ୟ । ଚାରିକୋଣିଆ ଗୌଡ଼ ସାହିରେ ଅଙ୍ଗନବାଡି ଗୃହ ପାଇଁ ଦୀର୍ଘ ଦିନର ଦାବି ପୂରଣ ନହେବାରୁ, ଶେଷରେ ଲୋକେ ବ୍ଲକ ଘେରାଉ କରିବା ସହ ଆନ୍ଦୋଳନକୁ ଓହ୍ଲାଇଛନ୍ତି। ଆଶ୍ଚର୍ଯ୍ୟର କଥା ହେଉଛି, ଏହି ପ୍ରତିବାଦ ସଭାରେ ବଡ଼ମାନଙ୍କ ସହ କୁନି କୁନି ଅଙ୍ଗନବାଡି ଶିଶୁମାନେ ମଧ୍ୟ ସାମିଲ ହୋଇ ନିଜର ହକ୍ ମାଗୁଛନ୍ତି ।
ଆନ୍ଦୋଳନକାରୀଙ୍କ ସିଧାସଳଖ ଅଭିଯୋଗ, ଯେଉଁଠି ପିଲାଙ୍କ ସଂଖ୍ୟା ଅଧିକ ରହିଛି, ସେଠାରେ ହିଁ ଅଙ୍ଗନବାଡି ଗୃହ ନିର୍ମାଣ କରାଯାଉ। ସରକାରଙ୍କ ନିୟମ ଅନୁଯାୟୀ ଶିଶୁଙ୍କ ସୁବିଧାକୁ ପ୍ରାଥମିକତା ଦିଆଯାଉ।
ଗାଁରେ ଆଜକୁ ୨୦୧୩ ମସିହାରୁ ଅଙ୍ଗନବାଡି କେନ୍ଦ୍ରଟି ଚାଲୁଅଛି । କେନ୍ଦ୍ରଟି ଭୁଲରେ ଜଗନ୍ନାଥ ପାଟଣା ଗ୍ରାମ ନାଁରେ ରହିଯାଇଛି । ଏହାର ସଂଶୋଧନ କରିବାକୁ ବାରମ୍ବାର ଗୁହାରି ଜଣାଇଥିଲେ ସୁଧା କିଏ ଶୁଣି ନଥିଲେ । ଯାହା ଫଳରେ ବର୍ତ୍ତମାନ କେନ୍ଦ୍ରଟି ଜଗନ୍ନାଥ ପାଟଣାରେ ଖୋଲାଯିବା ନେଇ ନିଷ୍ପତ୍ତି ହୋଇଥିବା ନେଇ ଗାଁର ଭାସ୍କର ବାରିକ ଚିତ୍ରସନ ପ୍ରଧାନ ଅଭିଯୋଗ ଆଣିଛନ୍ତି ।
ନାମକୁ ସଂଶୋଧନ କରା ଯାଉନି କି ଆମ ଗାଁରେ ଗୃହ ନିର୍ମାଣ କରାଯାଉନାହିଁ, ସ୍ଥାନୀୟ ପିଲାଙ୍କ ଭବିଷ୍ୟତ ସହ ଖେଳୁଛନ୍ତି ବୋଲି ସିଧାସଳଖ ପ୍ରଶାସନ ଭୁଲ କହୁଛନ୍ତି ଗ୍ରାମବାସୀ । ଦୀର୍ଘ ଦିନ ଧରି ସ୍ଥାୟୀ ଗୃହ ନଥିବାରୁ ପିଲାଙ୍କ ପାଠପଢ଼ା ଏବଂ ପୁଷ୍ଟିକର ଖାଦ୍ୟ ବଣ୍ଟନ ସମ୍ପୂର୍ଣ୍ଣ ବାଧାପ୍ରାପ୍ତ ହେଉଥିବା ଗ୍ରାମବାସୀ ପ୍ରକାଶ କରିଛନ୍ତି।
ଅପରପକ୍ଷରେ, ଏହି ବିବାଦ ସମ୍ପର୍କରେ ଗୋଷ୍ଠୀ ଉନ୍ନୟନ ଅଧିକାରୀ କହିଛନ୍ତି ଯେ, ଅଙ୍ଗନବାଡି ଗୃହର ସ୍ଥାନ ନିରୂପଣକୁ ନେଇ ଦୁଇଟି ଗାଁର ଲୋକେ କୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ବର୍ତ୍ତମାନ ଏହି ମାମଲା ବିଚାରାଧୀନ ଅଛି। କୋର୍ଟଙ୍କ ପକ୍ଷରୁ ଯେଉଁ ଆଦେଶ ଆସିବ, ପ୍ରଶାସନ ସେହି ଅନୁଯାୟୀ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବ ବୋଲି ବିଡ଼ିଓ ସ୍ପଷ୍ଟ କରିଛନ୍ତି।
