ନୟାଗଡ଼ ଅଫିସ,୧୮।୪: ଜବରଦଖଲକୁ ଜାଗା ମିଶନ ଯୋଜନା ପ୍ରୋତ୍ସାହିତ କରୁଛି। ଏହି ଯୋଜନାରେ ୮୦୨ରୁ ୪୯୬ ହିତାଧିକାରୀଙ୍କୁ ଭୂମି ଯୋଗ୍ୟତା ପ୍ରମାଣପତ୍ର (ପଟ୍ଟା) ମିଳିବା ପରେ ନୟାଗଡ଼ ସଦର ମହକୁମାରେ ଜବରଦଖଲକାରୀଙ୍କ ସଂଖ୍ୟା ବଢ଼ି ଚାଲିଛି। ଜାଗା ମିଶନର ସରକାରୀ ସୁବିଧା ସୁଯୋଗ ଦେଖି ଜିଲା ସଦର ମହକୁମାରେ ଲୋକସଂଖ୍ୟା ବଢ଼ିଛି। ସହରର ଯଜାଙ୍ଗୀ, ରୁକ୍ଷୀ, ବଳରାମ ଓ ଟାଙ୍ଗିଣୀ ପାହାଡ଼ର ଉପର ଓ ପାଦଦେଶ ସହିତ ବିଭିନ୍ନ ସ୍ଥାନ, ରାସ୍ତାକଡ଼, ଗୋଚର ଜମି ଏବେ ଜବରଦଖଲକାରୀଙ୍କ କବ୍ଜାରେ ରହିଛି। ଏପରି କି ସହରର ପ୍ରଭାବଶାଳୀ ଲୋକମାନେ ମୂଲ୍ୟବାନ୍ ଜମିକୁ ଜବରଦଖଲ କରି ରଖିଛନ୍ତି। ପୁଣି ଜବରଦଖଲରେ ପ୍ରଭାବଶାଳୀ ଲୋକଙ୍କ ହାତ ରହିଥିବା ଅଭିଯୋଗ ହୋଇଆସୁଛି । ଏଥିପାଇଁ ସରକାରୀ ଜମି ଗୁଣ୍ଠ ପ୍ରତି ୧ ଲକ୍ଷରୁ ଆରମ୍ଭ କରି ୫ ଲକ୍ଷ ଟଙ୍କାରେ ବିକ୍ରି ହେଉଛି । ନିକଟରେ ଜଣେ ସରପଞ୍ଚ ବେବର୍ତ୍ତାପଲ୍ଲୀରେ ସରକାରୀ ଜମି ବିକ୍ରି କରିଥିବା ଅଭିଯୋଗ ହୋଇଥିଲା। ୬ ପରିବାର ମାଡ଼ି ବସିଥିବା ଜମିରୁ ଜବରଦଖଲ ଉଚ୍ଛେଦ ପରେ ଏକଥା ଜଣାପଡିଥିଲା। ହେଲେ ସେମାନଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ। ମ୍ୟୁନିସିପାଲିଟି ପକ୍ଷରୁ ଯଦିଓ ଉଚ୍ଛେଦ କରାଯାଉଛି, ତେବେ ଏହା ଜବରଦଖଲକୁ ରୋକିପାରୁନି ବୋଲି ମତ ପ୍ରକାଶ ପାଇଛି ା
ଆଇନର ଗଳା ବାଟ ଦେଇ ସ୍ବଚ୍ଛଳ ବର୍ଗ ହାତେଇ ଚାଲିଛନ୍ତିି ସରକାରୀ ଜମି। ଗଁାରେ ସେମାନଙ୍କ ଜମି, ଘରବାରି ଥିଲେ ମଧ୍ୟ ପୁଣି ଥରେ ସହରର ମୂଲ୍ୟବାନ୍ ଜମିକୁ ନେବାକୁ ନାନା ଉଦ୍ୟମ ଜାରି ରଖିଛନ୍ତି। ଭୋଟ ରାଜନୀତି ଜବରଦଖଲକାରୀଙ୍କୁ ସୁହାଇଛି। ସହରରେ ସ୍ଥାନୀୟ ବାସିନ୍ଦା ଠିକ୍ ସମୟରେ ଟିକସ ଦେଇ ଆସୁଥିଲେ ମଧ୍ୟ ସେମାନଙ୍କୁ ସର୍ବନିମ୍ନ ସୁବିଧା ମିଳୁନି। କିନ୍ତୁ ଜବରଦଖଲକାରୀଙ୍କୁ ପଟ୍ଟା, ଆବାସ ଯୋଜନାରେ ଘର, ପାର୍କ ଓ ଅନ୍ୟାନ୍ୟ ସର୍ବନିମ୍ନ ସୁବିଧା ଯୋଗାଇ ଦିଆଯାଉଛି। କେତେଜଣ ଟିକସଧାରୀଙ୍କ ଅଭିଯୋଗ ହେଉଛି, ଗରିବ ଓ ଭୂମିହୀନଙ୍କୁ ଜମିପଟ୍ଟା ଦେଇ ସରକାରୀ ସୁବିଧା ସୁଯୋଗ ଦେବାରେ ପ୍ରତିବାଦ ନାହିଁ । କିନ୍ତୁ ଗରିବ ଓ ଭୂମିହୀନ ନଁାରେ ସ୍ବଚ୍ଛଳ ବର୍ଗ ସୁବିଧା ସୁଯୋଗ ହାତେଇ ନେଉଥିଲେ ମଧ୍ୟ ତାହା ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ। ଅନ୍ୟପକ୍ଷେ ଅଧିକାଂଶ କ୍ଷେତ୍ରରେ ଟିକସଧାରୀଙ୍କୁ ଯେପରି ଅଣଦେଖା କରାଯାଉଛି, ତାହା ଗଣତନ୍ତ୍ର ପାଇଁ ଶୁଭଙ୍କର ନୁହେଁ ବୋଲି ମତ ପ୍ରକାଶ ପାଇଛି ।
ସୂଚନାଯୋଗ୍ୟ, ସରକାରୀ ଜମିରେ ୩୦ ବର୍ଷ ତଳୁ ବସବାସ କରୁଛନ୍ତି ବୋଲି ଦର୍ଶାଇ ୮୦୨ ଜଣ ବାସହୀନ ଲୋକ ୨୦୧୭ରେ ନୟାଗଡ଼ ମ୍ୟୁନିସିପାଲିଟିରେ ଆବେଦନ କରିଥିଲେ। ଏହି ଜବରଦଖଲକାରୀମାନେ ଜାଗା ମିଶନରେ ସାମିଲ ହେବା ପାଇଁ ଅନୁମତି ମାଗିଥିଲେ। ସେମାନଙ୍କ ମଧ୍ୟରୁ ୩ଟି ପର୍ଯ୍ୟାୟରେ ୪୯୬ ହିତାଧିକାରୀଙ୍କୁ ଜାଗା ମିଶନ ଯୋଜନାରେ ପଟ୍ଟା ବଣ୍ଟନ କରାଯାଇଛି। ଏଥିରୁ ୩୫୦ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ପାଇ ସାରିଲେଣି। ଅବଶିଷ୍ଟ ୮୦୨ରୁ ୩୦୬ ହିତାଧିକାରୀ ଜଙ୍ଗଲ ଜମି, ଗୋଚର ଜମିରେ ରହିଥିବାରୁ ପଟ୍ଟା ପାଇ ପାରିନାହାନ୍ତି। ଏଥିରୁ ୨୦୦ ହିତାଧିକାରୀଙ୍କୁ ପଟ୍ଟା ଦେବାପାଇଁ ମ୍ୟୁନିସିପାଲିଟି ପକ୍ଷରୁ ପ୍ରାୟ୧ବର୍ଷତଳେ ଯୋଗ୍ୟତା ପ୍ରମାଣ ପତ୍ର ବଣ୍ଟନ କରାଯାଇଛି ।
