ମୁମ୍ବାଇ,୨୭।୪: ଆଇପିଏଲ ୨୦୨୧ର ୧୯ତମ ମ୍ୟାଚରେ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ) ଅଲରାଉଣ୍ଡର ରବିନ୍ଦ୍ର ଜାଡେଜା ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁର (ଆରସିବି) ବିପକ୍ଷରେ ଚମତ୍କାର ପ୍ରଦର୍ଶନ କରିଥିଲେ। ସେ ବଲ, ବ୍ୟାଟ ଏବଂ ଫିଲ୍ଡିଂ ସମେତ ତିନୋଟି ବିଭାଗରେ ସିଏସ୍କେର ବିଜୟରେ ଏକ ପ୍ରମୁଖ ଭୂମିକା ଗ୍ରହଣ କରିଥିଲେ ଏବଂ ଦଳ ପଏଣ୍ଟ ଟେବୁଲରେ ପ୍ରଥମ ସ୍ଥାନରେ ପହଞ୍ଚିଥିଲା। ଆରସିବି ବିପକ୍ଷ ମ୍ୟାଚରେ ପାଞ୍ଚ ନମ୍ବରରେ ବ୍ୟାଟିଂ କରିବାକୁ ଆସିଥିବା ଜାଡେଜା ୨୮ ବଲରୁ ଅପରାଜିତ ୬୨ ସ୍କୋର କରିଥିଲେ। ଏହି ଇନିଂସରେ ଜାଡେଜାଙ୍କ ଷ୍ଟ୍ରାଇକ ହାର ୨୨୧ରୁ ଅଧିକ ଥିଲା। ସେ ଚଳିତ ସିଜନରେ ସର୍ବାଧିକ ଉଇକେଟ ଟେକର ହର୍ଷଲ ପଟେଲଙ୍କ ଏକ ଓଭରରେ ୫ ଛକା ମାରି ମୋଟ ୩୭ ରନ ସଂଗ୍ରହ କରିଥିଲେ। ଏଥିସହ ସେ ୪ ଓଭରରେ ୧୩ ରନ ଦେଇ ତିନୋଟି ଉଇକେଟ ନେଇଥିଲେ।
ତାଙ୍କର ଅଲରାଉଣ୍ଡର ପ୍ରଦର୍ଶନ ପାଇଁ ସମସ୍ତେ ଜାଡେଜାଙ୍କୁ ପ୍ରଶଂସା କରୁଛନ୍ତି। ସିଏସକେ ଅଧିନାୟକ ମହେନ୍ଦ୍ର ସିଂ ଧୋନୀଙ୍କ ପରେ ତାଙ୍କ ସ୍ତ୍ରୀ ସାକ୍ଷୀ ମଧ୍ୟ ଏହି ଅଲରାଉଣ୍ଡରଙ୍କୁ ଏକ ନିଆରା ପ୍ରଶଂସା କରିଥିଲେ। ସାକ୍ଷୀ ଏହି ପୋଷ୍ଟକୁ ଇନଷ୍ଟାଗ୍ରାମରେ ଶେୟାର କରି ଲେଖିଛନ୍ତି, ବିଷ୍ଟ ମୋଡ। ଅର୍ଥାତ୍ ଜାଡେଜାଙ୍କୁ ‘ବନ୍ୟ ଅବତାର’ କହିଛନ୍ତି। ନଜାଡେଜାଙ୍କ ଇନିଂସ ଦେଖି ଆରସିବି ଅଧିନାୟକ ବିରାଟ କୋହଲି ମଧ୍ୟ ବହୁତ ପ୍ରଶଂସା କରିଥିଲେ। ମ୍ୟାଚ ପରେ ସେ ଜାଡେଜାଙ୍କୁ ପ୍ରଶଂସା କରି କହିଥିଲେ ଯେ ସେ ଏପରି ଜଣେ ଖେଳାଳି, ଯାହାଙ୍କ ଉପରେ ମୁଁ ସବୁବେଳେ ବିଶ୍ୱାସ କରିଆସୁଛି।
