ଅଯୋଧ୍ୟାରେ ଭବ୍ୟ ରାମମନ୍ଦିର ନିର୍ମାଣ ଲାଗି ଆସନ୍ତା ୫ ତାରିଖରେ ଭୂମିପୂଜନ ଉତ୍ସବ ଅନୁଷ୍ଠିତ ହେବାକୁ ଯାଉଛି। ଏହାକୁ ନେଇ ଜୋରସୋରରେ ଚାଲିଛି ପ୍ରସ୍ତୁତି। ତେବେ ରାମମନ୍ଦିର ନିର୍ମାଣ ଲାଗି ପ୍ରତ୍ୟକ୍ଷରେ ହେଉ ଅବା ପରୋକ୍ଷରେ ଅନେକ ଲୋକ ବର୍ଷ ବର୍ଷ ଧରି ସଂଘର୍ଷ କରିଛନ୍ତି। ସେଭଳି ଜଣେ ହେଉଛନ୍ତି ମଧ୍ୟପ୍ରଦେଶର ଜବଲପୁରରେ ରହୁଥିବା ୮୧ ବର୍ଷୀୟା ବୃଦ୍ଧା ଉର୍ମିଳା ଚତୁର୍ବେଦୀ। ୨୮ ବର୍ଷ ତଳେ ବିବାଦୀୟ ଢ଼ାଞ୍ଚା ଭାଙ୍ଗିବା ପରେ ସେ ଏକ ସଂକଳ୍ପ ନେଇଥିଲେ। ରାମମନ୍ଦିର ନିର୍ମାଣ ଆରମ୍ଭ ନ ହେବା ଯାଏ ଅନ୍ନ ଗ୍ରହଣ କରିବେ ନାହିଁ ବୋଲି ଉର୍ମିଳା ସଂକଳ୍ପ କରିଥିଲେ। ଏବେ ଏହା ସାକାର ହେବାକୁ ଯାଉଥିବାରୁ ତାଙ୍କ ସଂକଳ୍ପ ପୂରଣ ହୋଇଛି ବୋଲି ସେ କହିଛନ୍ତି।
୧୯୯୨ରେ ବିବାଦୀୟ ଢାଞ୍ଚା ଭଙ୍ଗା ଯାଇଥିଲା। ସେତେବେଳେ ୫୩ ବର୍ଷ ହୋଇଥିଲା ଉର୍ମିଳାଙ୍କୁ। ଏହାକୁ ୨୮ ବର୍ଷ ବିତିସାରିଛି। ଏବେ ସେ ଭୂମିପୂଜନ ଉତ୍ସବରେ ଯୋଗଦେବାକୁ ଇଚ୍ଛା ରଖିବା ସହ ସାରାଜୀବନ ସେଠାରେ ବିତାଇବାକୁ ଇଚ୍ଛା ପ୍ରକାଶ କରିଛନ୍ତି।
କେବଳ ରାମ ନାମ ଜପ କରି ସେ ଏତେ ବର୍ଷ ହେଲାଣି ଅନ୍ନ ଗ୍ରହଣ କରିନାହାନ୍ତି। ହେଲେ ଏସବୁ କଷ୍ଟର ମୂଲ୍ୟ ତାଙ୍କୁ ମିଳିଛି। ସେ ନିଜେ ଅଯୋଧ୍ୟା ଯାଇ ରାମ ମନ୍ଦିର ନିର୍ମାଣ କାର୍ଯ୍ୟ ଆଖିରେ ଦେଖିବାକୁ ଚାହାନ୍ତି। ହେଲେ କେବଳ ଆମନ୍ତ୍ରିତ ଅତିଥି ଯୋଗଦେବାର କାର୍ଯ୍ୟକ୍ରମ ରହିଥିବାରୁ ତାହା ହେବା ପରି ଲାଗୁନାହିଁ। ହେଲେ ଏଥିରେ ମନଦୁଃଖ କରିନାହାନ୍ତି ସେ। ସଂକଳ୍ପ ପୂରଣ ହୋଇଛି। ବାକି ଅଯୋଧ୍ୟାରେ କିଛି ଜାଗା ମିଳିଲେ ସେ ସାରା ଜୀବନ ସେଠାରେ ବିତାଇବାକୁ ଚାହୁଁଥିବା ପ୍ରକାଶ କରିଛନ୍ତି।
