ନବରଙ୍ଗପୁର,୨୮।୩(ବି.ପ୍ର.): ନବରଙ୍ଗପୁର ଜିଲାର ନବରଙ୍ଗପୁର ଓ ଉମରକୋଟ ପୌର ନିବାଚନ ଫଳାଫଳ ପ୍ରକାଶ ପ୍ରକାଶ ପାଇବା ପରେ ଏବେ ନବରଙ୍ଗପୁରରେ କଂଗ୍ରେସ ଓ ବିଜେଡି ଏବଂ ଉମରକୋଟରେ ଭାଜପା ଓ କଂଗ୍ରେସର ପାଇଁ ସମୀକ୍ଷାର ବେଳ ଆସିଛି। କଂଗ୍ରେସର ଗଡ଼ ଭାଙ୍ଗି ବିଜେଡି ୨୦ ବର୍ଷ ପୌର ପରିଷଦ ଗଠନ କରିଥିଲା। ଚଳିତ ଥର ସବୁ ଓଲଟ ପଲଟ ହୋଇଛି। ପୌରାଧ୍ୟକ୍ଷ ପାଇଁ ସିଧାସଳଖ ମତଦାନ ହେବାପରେ ଭାଜପା ପୌରାଧ୍ୟକ୍ଷ ପଦ ହାତେଇ ଦେଇଛି।
ବିଜେଡି ପୂର୍ବତନ ଏମ୍ପି ପ୍ରଦୀପ ମାଝିଙ୍କୁ ନେବାପରେ ତାଙ୍କ ସମର୍ଥକମାନେ ମଧ୍ୟ ବିଜେଡିର ଯୋଗ ଦେଲେ। ଭୀମ ହରିଜନ କଂଗ୍ରେସ ପୌରାଧ୍ୟକ୍ଷ ପ୍ରାର୍ଥୀ ପାଇଁ ଆବେଦନ କରି ପ୍ରାର୍ଥତ୍ପତ୍ର ଦାଖଲ ଦିନ ବିଜେଡିରେ ଯୋଗଦେଲେ। ଭୀମ କଂଗ୍ରେସ ପ୍ରାର୍ଥୀ ହେଲେ ବିଜେଡିକୁ ଅଡୁଆ ହେବ। ତେଣୁ ବିଜେଡିରେ ଅଲଗା ପ୍ରକାର ସମୀକରଣ କରାଯାଇ ଚତୁରତାର ସହ ଗୁପ୍ତ ବୈଠକ ଉମରକୋଟରେ କରାଯାଇ ଭୀମଙ୍କୁ ବିଜେଡିକୁ ନେବାରେ ସକ୍ଷମ ହେଲେ। ଅନ୍ୟପକ୍ଷରେ ପୌରାଞ୍ଚଳରେ ବିଜେଡିରୁ ଟିକଟ ଆଶାକରି ଭାଜପା ପ୍ରାର୍ଥୀ କୁନୁ ନାୟକ ନିରାଶ ହେଲେ। ତାଙ୍କୁ ଭାଜପା ପ୍ରାର୍ଥୀ କଲା। ଠିକଣା ସମୟରେ କଂଗ୍ରେସ ଜିଲା ସଭାପତି ମୁନା ତ୍ରିପାଠୀ ଅସୁସ୍ଥ ହେବା ଓ ପ୍ରଚାରକୁ ବାହାରି ନ ପାରିବାରୁ ନବରଙ୍ଗପୁରର ୧୭ ୱାର୍ଡ ମଧ୍ୟରୁ ୧୦ଟିରେ ପ୍ରାର୍ଥୀ ଦେଇ ପାରି ନ ଥିଲେ। ପୌରାଧ୍ୟକ୍ଷା ପ୍ରାର୍ଥତ୍ନୀ ଭାବେ ନିଲମ ହରିଜନଙ୍କୁ କଂଗ୍ରେସ ପ୍ରାର୍ଥୀ କରିଥିଲା। କଂଗ୍ରେସର ପ୍ରଚାର କମିବା ଦ୍ୱାରା ବିଜେଡି ଖୁସି ହୋଇଥିଲା। ଭୀମଙ୍କ ବିଜେଡିର ଯୋଗଦେବା ଘଟଣାକୁ କଂଗ୍ରେସ ପ୍ରେମୀ ନାପସନ୍ଦ କରିଥିଲେ। ଭୀମ କିଭଳି ପରାଜୟ ହେବେ ତାହାର କଣ୍ଟା ସାଜିଲେ। ଏହା ଭାଜପାକୁ ସୁହାଇଥିଲା। ଯେଉଁ ୱାର୍ଡ ଗୁଡ଼ିକରେ କଂଗ୍ରେସ ପ୍ରାର୍ଥୀ ନ ଥିଲେ ସେହି ୱାର୍ଡରେ ଭାଜପାକୁ ଅଧିକ ମତଦାନ ମିଳିଥିଲା। ଅନ୍ୟପକ୍ଷରେ ଚଳିତ ଥର ଭୋଟର ମଧ୍ୟ ବ୍ୟକ୍ତିଗତ ଭାବମୂର୍ତ୍ତିକୁ ଅଧିକ ଗୁରୁତ୍ୱ ଦେଇଛନ୍ତି। ନବରଙ୍ଗପୁର ପୌରାଞ୍ଚଳରେ ପ୍ରଦୀପଙ୍କ ଯେଉଁ ସବୁ ଅନୁଗତଙ୍କୁ ପ୍ରାର୍ଥୀ କରାଗଲା ସେମାନେ ପରାଜୟର ଶିକାର ହେଲେ।
ସେହିଭଳି ଉମରକୋଟ ପୌରାଞ୍ଚଳରେ କଂଗ୍ରେସ ପରେ ଲଗାତର ବିଜେଡି ପୌର ପରିଷଦ ଗଠନ କରିଥିଲା। ସାଧାରଣ ନିର୍ବାଚନ ସମୟରେ ବିଜେଡିକୁ ପରାଜିତ କରି ଭାଜପା ପକ୍ଷରୁ ନିତ୍ୟାନନ୍ଦ ଗଣ୍ଡ ବିଧାୟକ ହେଲେ। ଚଳିତ ପୌର ନିର୍ବାଚନରେ ଉମରକୋଟ ନିର୍ବାଚନ ମଣ୍ଡଳୀରେ ଭାଜପା ବିଧାୟକ ନିତ୍ୟାନନ୍ଦ ଗଣ୍ଡ ରହି ଦଳ ପକ୍ଷରୁ ନିର୍ବାଚନ ପରିଚାଳନା କରୁଥିଲେ। ତଥାପି ଭାଜପା ଗଡ଼ କୁହାଯାଇଥିବା ଉମରକୋଟ ବିଧାନସଭା ନିର୍ବାଚନ ମଣ୍ଡଳୀକୁ ବିଜେଡି ଭାଙ୍ଗିବାରେ ସଫଳ ହୋଇଛି। ବିଧାୟକ ନିତ୍ୟାନନ୍ଦଙ୍କ ଉପରେ ଲୋକଙ୍କ ଭରସା ଥିଲେ ମଧ୍ୟ ଅନ୍ୟ ନେତୃମଣ୍ଡଳୀ ତଥା କର୍ମୀଙ୍କ ଉପରେ ଭୋଟରଙ୍କ ଆସ୍ଥା ରହିଲାନି। ଫଳରେ ଚଳିତ ପୌର ନିର୍ବାଚନରେ ଉମରକୋଟରେ ବିଜେଡି ବାଜି ମାରିଛି। ପୌରାଧ୍ୟକ୍ଷା ଭାବେ ରାଧା ଭତରା ବିଜୟୀ ହୋଇଛନ୍ତି।
ନବରଙ୍ଗପୁରରେ ଭାଜପାର ପୌରାଧ୍ୟକ୍ଷ ପ୍ରାର୍ଥୀ କୁନୁ ନାୟକ ୮୯୪୪ ଭୋଟ ପାଇଛନ୍ତି। ସେହିପରି ବିଜେଡି ପ୍ରାର୍ଥୀ ଭୀମ ହରିଜନ ୬୯୪୪, କଂଗ୍ରେସ ପ୍ରାର୍ଥୀ ନିଲାମ ହରିଜନ ୮୨୯ ଏବଂ ସ୍ବାଧୀନ ପ୍ରାର୍ଥୀ ସାଗର ନାୟକ ୨୮୧ ଭୋଟ ପାଇଛନ୍ତି । ୨୧୬ ଭୋଟ ନୋଟାକୁ ଯାଇଛି। ଭାଜପା ପ୍ରାର୍ଥୀ କୁନୁ ନାୟକ ବିଜେଡି ପ୍ରାର୍ଥୀ ଭୀମଙ୍କ ଠାରୁ ୨ ହଜାର ଭୋଟରେ ଆଗୁଆ ରହି ବିଜୟୀ ହୋଇଛନ୍ତି। ସେହିଭଳି ନବରଙ୍ଗପୁର ପୌରାଞ୍ଚଳରେ ୧୭ ୱାର୍ଡରୁ ୯ଟିରେ ବିଜେଡି, ୬ଟିରେ ଭାଜପା ଏବଂ ୨ ଟି ୱାର୍ଡରେ ସ୍ବାଧୀନ ପ୍ରାର୍ଥୀ କାଉନସିଲର ଭାବେ ବିଜୟୀ ହୋଇଛନ୍ତି। ନବରଙ୍ଗପୁର ପୌରାଞ୍ଚଳରେ କାଉନସିଲର ଭାବେ କଂଗ୍ରେସ ଖାତା ଖୋଲି ପାରିନାହିଁ। ସେହିଭଳି ଉମରକୋଟ ପୌରାଧ୍ୟକ୍ଷ ପଦ ପାଇଁ କଂଗ୍ରେସର ଦମୟନ୍ତି ଦିଶାରୀ ୨୪୭୩, ବିଜେଡିରୁ ରାଧା ଭତରା ୮୬୬୯, ଭାଜପାରୁ ରିଙ୍କି ଗଣ୍ଡ ୫୦୯୯, ବିଏସ୍ପିରୁ ସନ୍ତୋଷୀ ମାଝି ୧୩୨ ଭୋଟ ପାଇଛନ୍ତି। ନୋଟାକୁ ୨୨୬ ଭୋଟ ଯାଇଛି। ବିଜେଡି ପ୍ରାର୍ଥୀନୀ ରାଧା ୩୫୭୦ ଭୋଟରେ ଭାଜପା ପ୍ରାର୍ଥୀଙ୍କ ଠାରୁ ଆଗୁଆ ରହି ବିଜୟୀ ହୋଇଛନ୍ତି। ଅନ୍ୟପକ୍ଷରେ ଉମରକୋଟ ପୌରାଞ୍ଚଳର ୧୪ ୱାର୍ଡ ମଧ୍ୟରୁ ୧୧ଟିରେ ବିଜେଡି, ୨ଟିରେ କଂଗ୍ରେସ ଏବଂ ଗୋଟିଏରେ ଭାଜପା ପ୍ରାର୍ଥୀ କାଉନ୍ସିଲରଭାବେ ବିଜୟୀ ହୋଇଛନ୍ତି।
