ନୂଆଦିଲ୍ଲୀ,୨୪।୧ : ଅପରାଧୀଙ୍କୁ ସମୟ ପୂର୍ବରୁ ଖଲାସ କରିବା ନେଇ ସୁପ୍ରିମକୋର୍ଟ ଏକ ଗୁରୁତ୍ୱପୂର୍ଣ୍ଣ ମନ୍ତବ୍ୟ ଦେଇଛନ୍ତି। ଶୀର୍ଷକୋର୍ଟ କହିଛନ୍ତି, ଜଣେ ଦୋଷୀଙ୍କୁ ସମୟ ପୂର୍ବରୁ ମୁକ୍ତି ଦେବା ସରକାରଙ୍କ କାମ। ଏଭଳି ମୁକ୍ତି ମାମଲା ସରକାରଙ୍କ ନୀତି ଅନୁଯାୟୀ ହୋଇଥାଏ। ଏହା ସହିତ ସୁପ୍ରିମକୋର୍ଟ ହତ୍ୟା ମାମଲାରେ ଆଜୀବନ କାରାଦଣ୍ଡ ଭୋଗୁଥିବା ଦୋଷୀଙ୍କୁ ଖଲାସ କରିବା ଆଦେଶ ଦେବାକୁ କରିବାକୁ ମନା କରିଦେଇଛନ୍ତି।
ଏହା ସହିତ ମୁକ୍ତି ପାଇଁ ଆବେଦନକାରୀଙ୍କ ଅନୁରୋଧକୁ ବିଚାର କରିବାକୁ ଗୁଜରାଟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି। ଦୋଷୀ ସାବ୍ୟସ୍ତ ହେବା ସମୟରେ ଯେଉଁ ସରକାରୀ ନୀତି ଥିବ ତାହା ଆଧାରରେ ନିଷ୍ପତ୍ତି ଗ୍ରହଣ କରାଯିବ ବୋଲି କୋର୍ଟ କହିଛନ୍ତି।
ଉଲ୍ଲେଖନୀୟ ବିଷୟ ହେଉଛି, ବିଲକିସ ବାନୋଙ୍କ ମାମଲାରେ ଦୋଷୀଙ୍କୁ ସମୟ ପୂର୍ବରୁ ମୁକ୍ତ ହେବା ବିରୋଧରେ ସୁପ୍ରିମକୋର୍ଟରେ ଏକ ଆବେଦନ ବିଚାରାଧୀନ ଅଛି। ସେହି ଦୋଷୀମାନଙ୍କୁ ଗତ ବର୍ଷ ଗୁଜରାଟ ସରକାର ୯ ଜୁଲାଇ ୧୯୯୨ରେ ଥିବା ନୀତି ଅଧାରରେ ମୁକ୍ତ କରିଥିଲେ। ଏହା ପରେ ସୁପ୍ରିମକୋର୍ଟରେ ବିଲକିସ ବାନୋ ଏବଂ ଅନ୍ୟମାନେ ଏହାକୁ ଚ୍ୟାଲେଞ୍ଜ କରିଥିଲେ।
ଗୁଜରାଟରେ ହତ୍ୟା ମାମଲାରେ ଦୋଷୀ ସାବ୍ୟସ୍ତ ହିତେଶଙ୍କ ମାମଲାରେ ଭାରତର ପ୍ରଧାନ ବିଚାରପତି ଡିଓ୍ବାଇ ଚନ୍ଦ୍ରଚୂଡ, ଜଷ୍ଟିସ ପିଏସ ନରସିଂହ ଏବଂ ଜଷ୍ଟିସ ଜେ.ବି ପାରଦୀୱାଲାଙ୍କ ନେତୃତ୍ୱରେ ଗଠିତ ବେଞ୍ଚର ନିଷ୍ପତ୍ତି ଆସିଛି। ହତ୍ୟା ମାମଲାରେ ଆଜୀବନ ଦୋଷୀ ସାବ୍ୟସ୍ତ ହୋଇଥିବା ହିତେଶଙ୍କୁ ସମୟ ପୂର୍ବରୁ ଖଲାସ ପାଇଁ ହୋଇଥିବା ଆବେଦନକୁ ପ୍ରତ୍ୟାଖ୍ୟାନ କରାଯାଇଛି।
ବେଞ୍ଚ ତାଙ୍କ ନିଷ୍ପତ୍ତିରେ କହିଛନ୍ତି, ଆମର ମତ ଯେ ପରିସ୍ଥିତିକୁ ଦୃଷ୍ଟିରେ ରଖି ଏହା ରାଜ୍ୟ ଦ୍ୱାରା ପୁନର୍ବିଚାର କରାଯିବା ଯୋଗ୍ୟ। ଅସମୟ ମୁକ୍ତି ପ୍ରଦାନ ଏକ ନ୍ୟାୟିକ କାର୍ଯ୍ୟ ହୋଇଥିବାରୁ ରାଜ୍ୟ ସରକାରଙ୍କ ପୁନର୍ବିଚାର ପାଇଁ ଏହା ଉପଯୁକ୍ତ ଅଟେ। ରାଜ୍ୟ ସରକାରଙ୍କ ଅସମୟ ମୁକ୍ତି ପାଇଁ ଅନୁରୋଧକୁ ବିଚାର କରିବାକୁ ଆମେ ଉପଯୁକ୍ତ ଅଧିକାରୀଙ୍କୁ ନିର୍ଦ୍ଦେଶ ଦେଉଛୁ ଯାହା ୧୯୯୨ ନୀତି ଆଧାରରେ କାର୍ଯ୍ୟକାରୀ ହେବ।
