ଦଶମନ୍ତପୁର,୨୪।୪(ଡି.ଏନ୍.ଏ.): କୋରାପୁଟ ଜିଲା ଦଶମନ୍ତପୁର ବ୍ଲକ ସମନ୍ବିତ ଶିଶୁ ବିକାଶ କାର୍ଯ୍ୟାଳୟ ଏକ ମାସ ହେଲା ବିଦ୍ୟୁତ୍ ନ ଥାଇ ଅନ୍ଧାରରେ ରହିଛି। ବିଦ୍ୟୁତ ବିଲ୍ ବକେୟା ପଡ଼ିଥିବା ବାହାନାରେ ବିଭାଗୀୟ କର୍ମଚାରୀ ବିନା ନୋଟିସରେ କାର୍ଯ୍ୟାଳୟରେ କାହାକୁ ନ କହି ଛୁଟିଦିନରେ ବିଦ୍ୟୁତ୍ ସଂଯୋଗ କାଟିଦେଇଥିବା ଶିଶୁ ବିକାଶ କାର୍ଯ୍ୟାଳୟ ପକ୍ଷରୁ ଅଭିଯୋଗ କରାଯାଇଛି। ଅଫିସରେ ବିଦ୍ୟୁତ୍ ସଂଯୋଗ ନ ଥିବାରୁ ସରକାରୀ କାର୍ଯ୍ୟ ଠପ୍ ହୋଇଯାଇଛି। ବିଭିନ୍ନ କାର୍ଯ୍ୟରେ ଆସୁଥିବା ହିତାଧିକାରୀମାନେ ଅସୁବିଧାର ସମ୍ମୁଖୀନ ହେଉଛନ୍ତି। ପ୍ରତିଦିନ ଅନ୍ଲାଇନରେ ମାଆ ଓ ଶିଶୁମାନଙ୍କ ଖାଦ୍ୟ ସାମଗ୍ରୀ ଓ ମମତା ଯୋଜନାର କାର୍ଯ୍ୟ ହୋଇଥାଏ। ମାତ୍ର ବିଦ୍ୟୁତ୍ ନ ଥିବାରୁ ଏହି କାର୍ଯ୍ୟଗୁଡ଼ିକ ହୋଇପାରୁନାହିଁ। ଏନେଇ ସିଡିପିଓ ମମତାରାଣୀ ଦାସଙ୍କୁ ପଚାରିବାରୁ ସେ କହିଛନ୍ତି, ଗତ ଫେବୃୟାରୀରେ ୨୯ ହଜାର ଟଙ୍କା ବକେୟା ବିଦ୍ୟୁତ୍ ବିଲ୍ ପୈଠ କରାଯାଇଥିଲା। ଆମ ଅଫିସର ଆଉ ବିଦ୍ୟୁତ୍ ବିଲ୍ ବକେୟା ଥିବା ନେଇ ବିଦ୍ୟୁତ୍ ବିଭାଗ କୌଣସି ସୂଚନା ପୂର୍ବରୁ ଦେଇନାହାନ୍ତି। କାର୍ଯ୍ୟ ଦିବସରେ ବିଦ୍ୟୁତ୍ ସଂଯୋଗ ନ କାଟି ଏକ ଛୁଟିଦିନରେ କାଟି ଦେଇଛନ୍ତି। ବିଦ୍ୟୁତ୍ ସଂଯୋଗ ନ ଦେଲେ ଆଗକୁ ଜିଲାପାଳଙ୍କୁ ଜଣାଇବେ ବୋଲି ଦାସ କହିଛନ୍ତି। ଏନେଇ ଦଶମନ୍ତପୁର ଲାଇନମ୍ୟାନ ଗୋପୀନାଥ ଖଟାଇଙ୍କୁ ପଚାରିବାରୁ ଏ ସମ୍ପର୍କରେ ସେ ଉପରସ୍ଥ ଅଧିକାରୀଙ୍କୁ ଜଣାଇଛନ୍ତି। ବିଭାଗ ବିଦ୍ୟୁତ୍ ବିଲ୍ ପୈଠ ନ କଲେ ବିଦ୍ୟୁତ୍ ସଂଯୋଗ ନ ଦେବାକୁ ନିର୍ଦ୍ଦେଶ ଦେଇଥିବା କହିଥିଲେ।
