ସତରେ, ୟାକୁ ହିଁ କହନ୍ତି ହାତୀ ମୁଣ୍ଡରେ ସୁନା କଳସ ଢାଳିବା। ଶାହରୁଖଙ୍କ ଖୁସିି ଏବେ କହିଲେ ନ ସରେ। କାରଣ ଯେଉଁ ୟଶରାଜ ଫିଲ୍ମସ ବ୍ୟାନର ତାଙ୍କୁ ନେମ୍ ଫେମ୍ ଦେଇଛି ସେହି ବ୍ୟାନରରେ ପ୍ରସ୍ତୁତ ହେବାକୁ ଯାଉଥିବା ସିନେମାରେ ସେ ପୁଣି ଥରେ ଅଭିନୟ କରିବାକୁ ଯାଉଛନ୍ତି। ପ୍ରଯୋଜକ ଆଦିତ୍ୟ ଚୋପ୍ରା ଏହି ବିଗ୍ ବଜେଟ୍ ଫିଲ୍ମର ଟାଇଟଲ ପରଲୋକଗତ ପ୍ରଯୋଜକ ତଥା ତାଙ୍କର ପିତା ୟଶ ଚୋପ୍ରାଙ୍କ ୮୮ତମ ଜନ୍ମବାର୍ଷିକୀ ଅବସରରେ ଘୋଷଣା କରିବେ। କେବଳ ସେତିକି ନୁହେଁ, ଶାହରୁଖଙ୍କୁ ନେଇ ନିର୍ମିତ ହେବାକୁ ଯାଉଥିବା ନୂଆ ହିନ୍ଦୀ ସିନେମା ‘ପଠାନ୍’ର ଶୁଟିଂ ଆସନ୍ତା ମାସରେ ଇଂଲଣ୍ଡରେ ଆରମ୍ଭ ହେବାକୁ ଯାଉଛି। ତେଣୁ ଏ ନେଇ ଶାହରୁଖ ପ୍ରସ୍ତୁତି ଆରମ୍ଭ କରିଦେଇଛନ୍ତି। ଫିଲ୍ମଟିର ନିର୍ଦ୍ଦେଶନା ଦେବେ ‘ଓ୍ବାର୍’ ଚଳଚ୍ଚିତ୍ରର ନିର୍ଦ୍ଦେଶକ ସିଦ୍ଧାର୍ଥ ଆନନ୍ଦ। ଅପରପକ୍ଷରେ ରାଜ କୁମାର ହିରାନୀଙ୍କ ଆଗାମୀ ଫିଲ୍ମରେ ମଧ୍ୟ ଶାହରୁଖ ଅଭିନୟ କରିବେ। କଥା କ’ଣ କି ଗତ କିଛି ବର୍ଷ ଧରି ଶାହରୁଖଙ୍କ ଅଭିନୀତ ସିନେମାଗୁଡିକ ଫ୍ଲପ୍ ହେଉଛି, ଯାହା ତାଙ୍କ ପାଇଁ ଚିନ୍ତାର କାରଣ ସାଜିଛି। ଏବେ ସେ ଅଭିନୟ କରିବାକୁ ଯାଉଥିବା ନୂଆ ଫିଲ୍ମଗୁଡ଼ିକ ତାଙ୍କ କ୍ୟାରିୟର ପାଇଁ ଶୁଭପ୍ରଦ ସାବ୍ୟସ୍ତ ହେବ ବୋଲି ଆଶା ରଖିଛନ୍ତି ଶାହରୁଖ।
