ଓଡ଼ିଶା ପ୍ରଶାସନିକ ସେବା(ଓସିଏସ୍) ପରୀକ୍ଷା ଫଳ ସୋମବାର ପ୍ରକାଶ ପାଇଛି। ଏଥିରେ କେନ୍ଦୁଝର ଜିଲା ପାଟଣା ବ୍ଲକ୍ ଟାଙ୍ଗରପଡ଼ାର ସୁଦେବ କୁମାର ପୃଷ୍ଟି ରାଜ୍ୟରେ ଟପ୍ପର ହୋଇଛନ୍ତି। ବର୍ତ୍ତମାନ ସେ ଭାରତୀୟ ବାୟୁ ସେନାରେ ଜାହାଜ ଟେକ୍ନିସିଆନ ଭାବେ କାର୍ଯ୍ୟରତ। ଚାକିରି ଜୀବନ ସହ ଓଡ଼ିଶା ପ୍ରଶାସନିକ ସେବା ପାଇଁ ପାଠ ପଢ଼ି ସଫଳତା ପାଇପାରିଛନ୍ତି। ତାଙ୍କର ଏହି ସଫଳତା ସମ୍ପର୍କରେ ସେ ଯାହା କୁହନ୍ତି…
ପ୍ରଶ୍ନ-ଆପଣ ରାଜ୍ୟରେ ପ୍ରକାଶିତ ଓସିଏସ ପରୀକ୍ଷାରେ ଟପ୍ପର ହୋଇଛନ୍ତି, କ’ଣ କହିବେ?
ଉତ୍ତର-ମୁଁ କେବେ ଟପ୍ପର ହେବି ବୋଲି ସ୍ବପ୍ନରେ ବି ଭାବି ନ ଥିଲି। ଏହା ଓଡ଼ିଶାର ଆରାଧ୍ୟ ଦେବତା ଶ୍ରୀଜଗନ୍ନାଙ୍କ କୃପା ବୋଲି ମୁଁ ଭାବୁଛି।
ପ୍ରଶ୍ୱ-ଏୟାରଫୋର୍ସରେ ଏକ ଗୁରୁତ୍ୱପୂର୍ଣ୍ଣ ପଦବୀରେ ଚାକିରି କରି କିଭଳି ପ୍ରସ୍ତୁତି କରୁଥିଲେ?
ଉତ୍ତର-ଏୟାରଫୋର୍ସର ଗୁଆହାଟୀ ତେଜପୁର ଏୟାରଫୋର୍ସରେ ମୁଁ ବର୍ତ୍ତମାନ ଜାହାଜ ଟେକ୍ନିସିଆନ ଭାବେ କାର୍ଯ୍ୟ କରୁଛି। ଏ ପଦବୀରେ ଥାଇ ସମୟ ବାହାର କରି ପାଠ ପଢ଼ିବା ମୋ ପାଇଁ ଅନେକ ଚ୍ୟାଲେଞ୍ଜ ଥିଲା।
ପ୍ରଶ୍ନ-ସଫଳତାର ଶ୍ରେୟ କାହାକୁ ଦେବେ?
ଉତ୍ତର-ମା’, ବାପା, ସ୍ତ୍ରୀ ଓ ସାଙ୍ଗଙ୍କ ପ୍ରେରଣା ମୋତେ ଆଜି ଏଠାରେ ପହଞ୍ଚାଇଛି। ମୋ ସ୍ତ୍ରୀ ମୋତେ ସହଯୋଗ ନ କରିଥିଲେ ମୁଁ ପାଠ ପଢ଼ିପାରି ନ ଥାନ୍ତି। ତାଙ୍କ ସହଯୋଗ ବିନା ଏ ସଫଳତା ସମ୍ଭବ ନ ଥିଲା।
ପ୍ରଶ୍ନ-ଆପଣ ଏଥିପାଇଁ କୌଣସି କୋଚିଂ ନେଉଥିଲେ କି?
ଉତ୍ତର-ନା ଏଥିପାଇଁ ମୁଁ ବିଧିବଦ୍ଧ ଭାବେ କୌଣସି କୋଚିଂ ନେଇନାହିଁ। ତେବେ ଭୁବନେଶ୍ୱରର ଏକ କୋଚିଂ ସେଣ୍ଟରର ଅଶୋକ ପଣ୍ଡା ଓ ଦୀପକ ସ୍ବାଇଁ ସାର୍ଙ୍କ ଗାଇଡ୍ରେ ପାଠ ପଢ଼ୁଥିଲି।
ପ୍ରଶ୍ନ-ବର୍ତ୍ତମାନର ଛାତ୍ର ଓ ଯୁବପିଢ଼ିଙ୍କୁ କ’ଣ କହିବେ?
ଉତ୍ତର-ସବୁ ସଫଳତା ପଛରେ କଠିନ ପରିଶ୍ରମ ଦରକାର। ବର୍ତ୍ତମାନ ଯୁବପିଢ଼ି ମୋବାଇଲମନସ୍କ ନ ହୋଇ ପଠନମନସ୍କ ହେବା ଦରକାର। ଏଥିପ୍ରତି ମା’ ବାପା ଗୁରୁତ୍ୱ ଦେବା ଆବଶ୍ୟକ।
ପ୍ରଶ୍ନ- ଚାକିରିରେ ଯୋଗଦେଲେ କେଉଁ ଦିଗ ପ୍ରତି ପ୍ରାଥମିକତା ଦେବେ?
ଉତ୍ତର- ଏୟାରଫୋର୍ସରେ ମୋର ଆଉ ୨ ବର୍ଷ ଚାକିରି। ଏହା ଏକ ଶୃଙ୍ଖଳିତ କାର୍ଯ୍ୟ। ଏଣୁ ମୁଁ ଭିଆରଏସ୍ ନେଇ ଓଡ଼ିଶା ପ୍ରଶାସନିକ ସେବା ଚାକିରିରେ ଯୋଗଦେବି। ପିଲାବେଳୁ ମୁଁ ଓ ଆମ ପରିବାର ଅଭାବରେ ଗତି କରିଛୁ। ଏଣୁ ଦୂରଦୂରାନ୍ତରୁ ଆସୁଥିବା ଗରିବ ଲୋକଙ୍କ କାର୍ଯ୍ୟ କିଭଳି ଗୋଟିଏ ଦିନରେ ହୋଇପାରିବ ସେଥିପ୍ରତି ଗୁରୁତ୍ୱ ଦେବି। ଏଥିସହ ବୃତ୍ତିରେ ସ୍ବଚ୍ଛତା ଅବଲମ୍ବନ କରିବି।
ପ୍ରଶ୍ନ-ବହୁ ଅଫିସରଙ୍କ ଘରେ ଭିଜିଲାନ୍ସ, ଇଡି ଚଢ଼ାଉ ହେଉଛି। ସେ ବିଷୟରେ କ’ଣ କହିବେ?
ଉତ୍ତାର-ମଣିଷ ମଣିଷ ଭିତରେ ପାର୍ଥକ୍ୟ ରହିବ। ବହୁ ଭଲ ଅଫିସର ମଧ୍ୟ କାର୍ଯ୍ୟ କରୁଛନ୍ତି। କେତେକ ଭଲ ଲୋକଙ୍କ ପାଇଁ ସୃଷ୍ଟି ବଞ୍ଚତ୍ଛି। ମୁଁ ଦୁର୍ନୀତିକୁ ପ୍ରଶ୍ରୟ ଦେବି ନାହିଁ।
– ସାକ୍ଷାତକାର: ବୀରକିଶୋର ଦାଶ, ପାଟଣା
